¹ Wetwafiha ahinzabhulo, tuhamanya kunti ahasiwa iha bhakuti Malita. ² Abhandu abhahaya abhapala tekunti bhatuposheleye ishihaya, bhahapemba umwoto nakutubhishila twendi kunongu yi vula ni mpepu yeyali ikwendelela. ³ Ileelo u Paulo wabhunganya izigo ilyingu nakubhiha mumwoto, injohha inyisi yeyili nisumu ihafuma mukwi zila kunongwa yamafuku pe ahayizwungulizya munyobhe yakwe. ⁴ Abhandu abhahaya abhapala webhaloola ishihano shikwembela kufuma kunyobhe yakwe, bhahalonga bhibho kwabhibho, "Umundu unu yoli mugoji we abhelengushile kwasumbi, ileelo yoli itakwanzilwa abhe." ⁵ Ileelo awene ahamusumbila unu ishihano mu mwoto ahapa uwubhibhi ngaweka. ⁶ Abhene bhaguliye ayizule nizegema awe agwe panapo bhulo afwe. Ileelo we bha mwenya kuhabhalilo ahatali nakulola kunti hatalipo nahamu hehata kwanzilwa kukwakwe, bhahagalulanya ikwino zyabho nakulonga ali wu Mulungu. ⁷ Ishi pala paapipi pali ni ninsi yeyamili ya musongo uwa hahaya, umundu wamali wu Pablio. Atubhilisheye nakuntulisya insiku zitatu. ⁸ Ihaloleha kunti uyise wa Pablio alemwa nizegema nuwubhinu uwa kupeela. Pu Paulo wa bhala ahapuuta, ahabhiha inyombe pamwanya yakwe pe ahamuponwa. ⁹ We ilyo lya loleha abhandu abhamwabho pahahaya hala bhebhali bhabhinu bhope bhahala bhahaponwa. ¹⁰ Abhandu bhahatushindiha kuhashindiho ahinji, wetukuyipanganya kushula, bhahatupa vila vwe tuhanzaga. ¹¹ We gashila ameezi gatatu, tuhashula muhanti mumbokoso iya Iskanda yeyamile yihomilwe ni pepu pahahaya ipo, pabhalongozi bhakwe bhamile bhaholo bhabhili amapasa. ¹² Panapo wetwafiha muhanti muhaya iya Silakusa, twihaye paala insiku zitatu. ¹³ Kufumila ipo tuhashula tuhafiha muhanti muhaya iya Regio. Welyashila isiku lye ka impepu iya kusini ihinza panapo bhulo wezyashila insiku zibhili tuhafiha muhaya iya Putoli. ¹⁴ Ukwo tubhaga bhamu abhaholo pebhatubhilishila twihale nabho insiku saba. Kwidala ili tuhinza Kulumi. ¹⁵ Kufuma ukwo abhaholo bhala, panapo we bhivwa impembu zyitu, bhinzile kutuposhela ukwo kumunalo uwa Apias ni Hoteli zitatu. U Paulo wabhalola bhala abhaholo ahamusalifwa u Mulungu ahayipa amaha. ¹⁶ Wetwinjila Kuloma, u Paulo ahazilwa kwihala amweene bhulo peeka nu masinjala wamali akumwimililila. ¹⁷ Ishi peeyihabha wezyashila insiku zitaatu u Paulo ahabhabhilishila peeka bhala abhasahala bhebhali bhalongozi muhanti mubhayahudi. Webhinza peeka, ahalonga nabho, "Bhaholo, peeka nakunti indubhombile ibhibhi angalyeka kubhandu ibha awekubho ishingunga nashebhanzaga abhayise bhitu bhebhalongoleye, afumizye unganti na mufungwe kufuma Kuyerusalemu paaka kunyobhe iya Warumi. ¹⁸ We bhambuzilizya, bhahasunguha kundeha bhulo, kwekunti kutali nahamu kukwaani ine yiyikwanzilwa amayimba aga wufwe. ¹⁹ Ileelo Abhayahudi webhalonga ishingunga isha shingane shabho, ihanzilwa kupilula shipwa kwa Kaisaria, alelo sheyitali kunti ikuleta isitako kushila itayifa lyani. ²⁰ Kunongwa yakupilukwani, ipo, ihalabha kubhalola nakulonga nimwe pe kwekunti yahala he Israeli ilinamaha kuhanaho, ipinyile nuwupinwe unu. ²¹ Ipo bhahamubhuzya, "Tutaposheleya nalumo ikalata kufuma Yudea lyelikukulonga iwe, awatalipo uholo we ayinzile kufuwa impembu awe kulonga izwu lyolyondi ibhibhi kukulonga iwe. ²² Ilelo tukwanza kwivwa kufuma kukwaho ukukwina ahooni kulili impuga iya bhandu ibha kwekunti yimanyishile kukwitu kunti likulona ishingunga popondipala." ²³ Webhabhiha isiku kunongwa yakwe, abhandu abhinji hani bhahamwinzila pala pahabhanga. Ahalonga lila lyelali kukwabho nakupanjila kunongwa yashinamwena isha Mulungu. Ahalinjizya kubhasonganya kunongwa ya Yesu, kumadala goondi gabhili kufuma mundajizyo zya Musa nakuma mubha kuwi, kwandila ishilabhila paka shalyabhela. ²⁴ Bhanu bhabho bhahasonjelezwa nagala ge galongiwe, weabhinji bhatitishile. ²⁵ Webhapotwa kubhomba bhibho kubhibho, bhasogolo wu Paulo alonga ijambo lyeka, "Umupepu umufinjile alonjile ahinza kushilila Isaya umukuwe kubhayise bhinyu. ²⁶ Alonjile, 'Bhalaga kubhandu ibha ulonje, "Kumakutwe mutiyivwe, ileelo temumanyaje na kumisogiinyu mutilolaje ileelo temulolaje. ²⁷ Kunongwa ya moyo gabhandu ibha gegabha mabhinu, akutwe gaabho givwa kumayimba, bhasiziliye amisogabho ingalelo bhatahamanye kumiso gabho na kwivwa kumakutwe gaabho, nakumanya kumoyo gaabho, nakugaluhana awinza, na hani nabhaponizye." ²⁸ Ipo, mukwanzilwa kwinza kukwaani kunti unu uwoposhi wa Mulungu wutwaliwe kubhandu abhapanzi, nabhatitejelevwe." (Lema: Ilwoli ili ²⁹ "Ahabhalilo wakulonga amambo igo, abhayahudi bhahasogola, bhahabha nuluwilizanyo ulumpinti bhibho." Wutalipo muwusimbe uwinza uwimandi). ³⁰ U Paulo ayihaye muhanti munyumba yakwe ya alemile kuhabhalilo aha maha gabhili, pe ahabhabhilishila bhondi bhebhinzile kukwakwe. ³¹ Ali akulumbilila ishana mwene isha Mulungu pe amili akumanyizya amambo iga Mweene u Yesu Klisiti kumaha gondi. Numo atamudindile.