¹ Pe panepo, u Paulo asogoye ku Athene kubhala Korintho. ² Ukwo ahamwaga Umuyahudi webhahantinji Akwila umundu uwashiholo sha Ponto, aweene numushi wakwe we bhahantinji wu Prisila bhinzile kufuma ku Italia, kwekunti uKlaudia ayamuye abhayahudi bhondi bhasogole ku Roma; ³ Paulo ahihala nakubhomba imbombo nabho kwekunti awena akubhomba imbombo yiholine ni yabho. Abhene bhali bhagomba amahema. ⁴ U Paulo ahalonga nabho mushibhanza wula bhulo webhakupuuta. Abhasonganyinye abhayahudi peeka na bha Giliki. ⁵ Ileelo Sila nu Timotheo webhinza kufuma Kumakedoniya, Paulo abushiliwe numupepu umufinjile kubhapanjila Abhayahudi kunti u Yesu wu Klisiti. ⁶ Wa Bhayahudi webhamuhoma na kumusupizya, ipo u Paulo ahakunyunda umwenda wakwe pilingolela yabho, nakubhabhuzya, "Amabhanda ginyu gabhe pamwanya pamatwe giinyu munemwe, ine itali ninongwa, kufuma ishi nakwendelela, nabhabhali laabhapanzi". ⁷ Ipo ahasogola kufuma pala ahabhala kunyumba ya Tito Yusto, umundu wakuputa u Mulungu. Inyumba yakwe yilipapipi nishibhanza. ⁸ Krispo, umulongozi uwa shibhanza peeka na bhandu ibha munyumba yaakwe bhaha mwintiha Umweene, abhandu abhinji abha Mukorintho bhaha mwivwa u Paulo akulonga bhahintiha na kwozilwa. ⁹ Umweene ahamubhuzya u Paulo uwusiku kwidala ilya kuloota, "Utahogope, ileele longa utahapume. ¹⁰ Honi ine hindi peeka niwe, atalipo wantilinjizye, kukuhoma, alelo indi nabhandu abhinji muhaya ini". ¹¹ U Paulo aihala ukwo ahabhalilo aha mwaha weka namezi umutanda akumanyizya izwi lya Mulungu mukasi yabho. ¹² Ileelo Galio wabhombwa mwimili uwa Akaya, Abhayahudi bhahimili peeka ishingunga nu Paulo nakumutwaala pilongole pitengo ilya wulonji, ¹³ bhahalonga, "Umundu unu akusonganya abhandu kunti bhamupuutaje u Mulungu ishingunga nu wamulo". ¹⁴ Wu Paulo akwanza kunti alonje, u Galio ahabhabhuzya Abhayahudi, "Imwe Bhayahudi, inga wamili wupibhi awe wunanjisu, ahani yabha hinza kubhabhombela. ¹⁵ Ileelo kwekunti mwe mbuzilizyo, gega kwanza amazwi namataawa, nindajizyo zyinyu, ishi lonji imwe muneemwe, ine indakusunguha kubha na mulonji kunongwa yaganaago." ¹⁶ Galio ahabhamula bhasogole pilongole pitengo ilya wulonji. ¹⁷ Ipo bhaha mulema u Sosthene, umwimilili uwa shibhanza, bhaha muhana pilongolela pitengo ilya wulonji, ileelo u Galio atasajiye shebhabhombile. ¹⁸ U Paulo, we ayihala pala kuhabhalilo ahatali, ahabhaleha abhaholo na kubhala ni mbokoso Siria peeka nu Prisila nu Akwila. Webhashili kusogola ahakata insinsi zyakwe kwekunti amile alapile kunti wene. ¹⁹ Webhafiha ku Efeso, Paulo ahamuleha Prisila nu Akwila paala, ileelo wuyo wene ahinjila mushibhanza nakupanga nabho Abhayahudi. ²⁰ Webhamubhuza u Paulo kunti ayihale nabho kuhabhali ahatali, uwene ahahana. ²¹ Ileelo ahasogo kukwabho, ahabhabhuzya, "Ihayiduga awinza kukwinyu, inga lugano lwa Mulungu". Pe panapo, ahasogo nimbokoso kufuma ku efeso. ²² U Paulo wafiha Kaisaria, ahazubha kubhala kulamuha ishibhanza isha Kuyerusalemu, awinza ahiha kushibhanza isha Antiokia. ²³ Wayihala kuhabhalilo pala, u Paulo asogolo kushilila imbali iya Galatia na Frigia nakubhapa umwo abhalandanti bhondi. ²⁴ Umuyahudi weka webhahantinji Apolo, wapapilwe ukwo Alexandria, amile ku Efeso. Amile nu ahinza kwa kulonga lwamanyi nuwusimbe. ²⁵ Apolo bhamile bhamulanjile muhanti mumanyizyo ya Mweene. Aza shemali na maha muhanti umupepu, alonjile nakumanyizwa kuwinza amambo gega kwanzilwa kwa Yesu, ileela amanyile yoli uwozwi wa Yohana. ²⁶ Apolo ahanda kulonga kumaha muhanti mushibhanza. Ileelo Prisila na Akwila wabhamwivwa, bhahabhomba uwumanyani nawo pebhamubhuzya kunongwa yamalala ga Mulungu kuhinza. ²⁷ Wasunguha kusogola kubhala Akaya, abhaholo bhahamupa umwoyo nakumusimbila ikalata abhalandati bhebhali Akaya anga bhabhe bhakuposhela, wafiha kuwila ahabhavwa nifwa bhala bhebhintishile. ²⁸ Kumaha gaakwe ni njele, Apolo abhashilile Abhayahudi pawinji akulolesya kushilila uwusimbe kwekunti u Yesu wewu Klisiti.