¹ We bhashila muhaa ya Amfipoli na Apolonia, bhahinza muhaaya iya Sesalonike mwembali ishibhanza isha Bhayahudi. ² Inza she yili imwata ya Paulo, ahabhala kukwabho, kuhabhalilo ahinsiku zitaatu izya kupuuta ahabhuzilizanya nabho kunongwa yawusimbe. ³ Ahabhagubulilaga uwusimbe nakubhabhuzya kunti, yamuhonde u Klisiti kuyimba na winza kuzwuha kufuma kubhafwe, abhabhuzizye, u Yesu unu wingubhabhuzya inongwa zyakwe wewu Klisiti" ⁴ Bhamu Abhayahudi bhahintiha na kubha peeka nu Paulo nu Sila, peeka nabha Giliki bhaha kumupuuta u Mulungu, abhandanda abhinji bhebhapindushile nimpuga impinti iyabhandu. ⁵ Ileelo bhamu Abhayahudi bhehatitishile, bhahizulwa numwone, bhahabhala kumunaalo nakubhega bhamu abhandu abhabhibhi, bhaha bhunganya impuga iyabhandu peeka, na kwaazya uwuyanzi pamujini, pe bhaha vwamila inyumba ya Jasoni, bhakwa kubhalema u Paulo nu Sila inga bhabhaleete pilongolela ya bhandu. ⁶ Ileelo webhatabhaaga, bhamulema u Yasoni naholo bhamu nakubhatwala pilongolela ya palongozi abhihaya, bhakohoma shoongo, "Ibha bhaahala bhebha galulanyinye insi bhafiha uku winza. ⁷ Abhasahaala ibha bhu Yasoni abhaleteli bhakunanganya indajizyo zya Kaisari, bhakunti kulu mweene uwunji webhakunti u Yesu" ⁸ Impuga na bhalongozi abhihaya webhizwa amambo igo, bhahinjilwa nilyooga. ⁹ Weleelo bhejile ihela iyawinji ya kuziga kufuma kwa Yasoni na bhamwabho, bhahabhaleha bhabhale. ¹⁰ Uwusiku wuwu abhaholo bhahamusondelezya u Paulo nu Sila ku Beloya. Webhafiha kula bhahabhala mushibhanza isha Bhayahudi. ¹¹ Abhandu bhala bhali bhebha kuzyaganya haani kushila abhandu abhaku Thesalonike, kwekunti bhitishile kuposhela amazwi kunjele zyabho nakwinanji zya uwusimbe wila bhulo inga bhalole kunti amazwi gegalongiwe gegigo. ¹² Aleelo abhinjibhabha bhantiha, bhalipo na bhandanda ibha kudeba paapiti abha Kigiriki nabhasahala abhinji. ¹³ Ileelo Abhayahudi na bha sesalonike webhamanya kunti Paulo akulalasya izwi lya Mulungu kuleya ukwo, bhahabhala ukwo kusonjelezya na kwanda uwuyanzi kubhandu. ¹⁴ Nalubhilo, abhaholo bhaha mufwala u Paulo idala ilya sumbi, ileelo Sila nu Timotheo bhahasyala pala. ¹⁵ Bha bhaholo bhebha mutwali u Paulo bhabhalinawo mupa Athene, webhamuleha u Paulo ukwo, bhahaposhela indajizyo kufuma kukwakwe kwekuti, Sila nu Timotheo bhabha kukwaakwe nalubhilo shikwanzilwa. ¹⁶ Pe wakubhagulila ukwo Athene, umwoyo wakwe wuhavitilwa muhanti yakwe yaani shawulolile umuji wula she wizuye iviholanyo ivwinji. ¹⁷ Ipo bhahapangana na Bhayahudi mushibhanza bhala bhebhaha mupuutaga u Mulungu nabhalo bhondi bhahahomanaga nabho kumunaalo. ¹⁸ Ileelo bhamu abhindajizyo abha Waepikuleo nabha Wastoiko bhaha mubijila. Na bhamu bhahalonga, "Hooni hakuloonga unu akulonga munsi? Bhamu bhaloonga, "Yikuloleha akulumbilila intumu ya Mulungu mujeni," Kunongu ya kulumbilila intumi iya Yesu kuzwuha. ¹⁹ Bhaha mwega u Paulo na kumuleta Aleopago, bhakulonga, "Tungamanya kumanya iga ge mukumanyizya amapwa gukuloonga? ²⁰ Kwekunti ukuleta inongwa ipwa muma kutwe giitu. Ileelo tukwanza kumanya iga gukubhomba wukunti bhuli?" ²¹ (Na bhandu bhondi abha Athene peeka na bhamwabho bhebhali kukwabho, bhakubhela ahabhali habho awe na kuloonga kutejeelevwa zyakuloonga injeni.) ²² Pe u Paulo ahimilila pahanti ya bhandu ibha Aleopago ahalonga, "Imwe mubhandu mubha Athene, ingulola kunti imwe mwabhandu amwemupindushiye kulyolyondi. ²³ Kwekunti kushila kwani nakwenya ivindu vwinyu vwe mukuupuuta, nalola uwusimbe we wusimbilwe kusheka ishigemo shinyu, shikutishi, "KWA MULUNGU WATAKUMANYIHA". Ipo leelo, uyo we mukumupuuta mutamumanyile wikubhabhuzya iimwe. ²⁴ U Mulungu wagombile insi na hohondi hehali muhanti, kwekunti wumweene uwimwanya na pansi, atangawezya kwiha muvibhanza vwe vingilwe ninyoobhe. ²⁵ Na winza atakubhombelwa ninyoobhe zyabhandu unga kunti pakwanza ahandu kukwabho, ileelo awe wuyo akubha bhandu uwumi umwoyo ni vindu ivwamwabho vwondi. ²⁶ Kushilila umundu weka, abhombile abhandu bhondi amunsi bhebhakwihala pamwanya pansi, pe ahabhabhishila ahabhalilo ni nyoli muhaya mwebhakubha. ²⁷ Ileelo, bhakwanzilwa kumwanza u Mulungu, nayikwanzilwa bhamufishile nakumwaaga, nizyanayoli atali ukutali na kila weka witu. ²⁸ Kukwakwe tubha, tukujenda nakubha nuwumi witu, unganti shishila she mutunzi winyu weka uwa shayili wahalonga 'twe bhapopwe bhakwe.' ²⁹ Ileelo, ingitwe twabhapapwe bha Mulungu, tutakwanzilwa kukwina kunti uwu Mulungu unganti zahabu, awe shaba, awe mawe, awe ishiholanyo she bhabhinzile kuwumanyi na kukwina kwa mundu. ³⁰ Ileelo, u Mulungu ampumiye ahabhalilo hala ahawulema, ileelo ishi ayamuye abhandu bhondi pebhali bhintishe. ³¹ Ili kunongwa yabhishile isiku lya hifumu uwulonji insi uwanayoli kwa mundu we amusebhile, u Mulungu afumizye izyanayoli kwa mundu unu kwa wowondi umundu pala pa muzwusizye kufuma kubhafwe. ³² Nabhandu ibha Athene webhivwa imbembu izya kuzyuha kubhafwe, bhabho bhaha muzwunga u Paulo, ileelo bhamu bhahalonga "Tutikutejelevye awinza kumbembu iya jambo ili" ³³ Peepu naapo, u Paulo ahabhaleha. ³⁴ Ileelo bhamu abhandu bhahabha peeka nawo bhahintiha, aliipo Dionisio Mwaleopago, nu mwandanda bho peeka nabho.