¹ U Paulo winza wayinzile Derbe na Lystra; yeenya, pala pali numulandati bhahantinji u Timotheo, umutunda wapapilwe nu nyina uwa kubhayahudi wa apindushile nu yise wakwe ni Mgiliki. ² Abhandu abha Listra na Ikonia bhamupanjiye ahinza. ³ U Paulo ahamwanzaga anga shule nawo, ipo ahamwega nakumwata kunongwa ya Bhayahudi bhebhali kunukwo kwekuti bhondi bhamumanyile kunti uyise wakwe Mugiriki. ⁴ Webhakubhala bhashilile muhaya na kufumwa indajizyo kuvibhanza abhazyitishe indajizyo iga gasimbilwe nabhazehe nabhasundikwa Kuyerusalemu ukwo. ⁵ Ipo ivibhanza bhahaviha ahinza kulwitiho nabhebhintishile bhahonjelaga uwinji kila lisiku. ⁶ U Paulo nuwamwabho bhahabhala Firigia na Galatia, kunti umupeepu uwa Mulungu abhanile kulumbilila izwi ukwo kwijimbo ilya Asia. ⁷ Webhapalamila Misia, bhahalingaga kubhala Bithinia, ileelo Umupepu wa Yesu ahabhahana. ⁸ Ileelo webhashila Misia bhahinza mupaka muhaya iya Troa. ⁹ Injonzi zihamufumila u Paulo uwusiku, kwamile numudu Kumakedonia alimiliye, amubhishila na kukuloonga, zaaji mutwaavwe Kumakedonia uku". ¹⁰ U Paulo walola injozi, pe tuyibhihaga ahinza anga tubhale Kumakedonia, amanyile kunti u Mulungu atubhilishiye kubhala Kumakedonia kulumbilila intumi. ¹¹ Petuhasogola kubhala ku Troa, tuhabha yiniiyo Samothrake, isiku lyelikufwaata tuhafiha muhaya iya Neapoli. ¹² Kufuma ipo tuhabhala ku Filipi kuweka iyihaya iya Makedoniya, ihaya iya lusubhilo mu wilaya nuwulongozi uwa Kirumi pe tuhihala insi zimo. ¹³ Isiku ilyakupuuta, twabhalile panzi kwidala ilya mwoto, imbali ye tuhantinji tuntipaje apa kupuutila ipuuto. Twihaye pansi nakulonga nabhandanda bhebhinzi peeka. ¹⁴ Umwandanda weka wamali wu Lidia, umukazya meenda, kufuma muhanti mu muji uwa Tiatira, we hamupuutaga u Muluungu, atutejelevwizye. Umweene ahigula umwoyo wakwe na kubhiha ahinza amazwi gegalongiwe nu Paulo. ¹⁵ We ayozelwa, aweene ni nyumba yaakwe yondi, ahatubhuzya hanti, anga mwalola ine na mutosu kwa Mweene, ilelo ikubhabhuzya mwinjile na kwihala kukwaani". Ahatubhuzya nifwa. ¹⁶ Ihabha kunti, wetukubhala pala apakupuuta, umulindu weka wamadi nipepu ilya kumanya ahahomana nitwe. Amuleteye Umweene wakwe uwukabhi uwinji wakukisila. ¹⁷ Umwandanda unu ahamulandatila u Paulo peeka nitwe, akuhoma ishoongo na kulonga, "Abhasahaala ibha bhabhombi bha Mulungu umpinti we bhakubha lalasizya imwe impembu izya wuposhi". ¹⁸ Abhombile isho kunsiku inyinji, ileelo u Paulo avitilwe kulilyo, ahagaluhana kulusalo nakumubhuzya wali pepu, "Nakwamula mwitawa lya Yesu mwepe muhanti yakwe." Wope ahepa nakumule panapo. ¹⁹ Aga mwene gaakwe webhalola kunti ulusubhilo ulwa uwukabhi wabho lyasogola, bhahabhalema u Paulo nu Sila na kubhahushila kumanaalo pilongolela iya bhebhali nuwamulo. ²⁰ Webhabhafisya kubhasongo bhalonga, "Ibha asahala Bhayahudi bhakuleta uwuyanzi uwumpinti muhaya yitu. ²¹ Bhakumanyizya gete hinza itwe kugaposheela awe kugalandata itwe twa Bhalumi." ²² Impuga yihabhimililila ishingunga u Paulo nu Sila, abhalonji bhahazula amenda gabho nakubhazula nakwamula bhahomwe indisa. ²³ We bhabhahomu indisa inyinji, bhahabhasumba mwijela nakubhamula abhakolokoloni kubhadima ahinza. ²⁴ We bhaposhela uwamu uyo, ukolokoloni uwijela ahabha sumba pahanti pahapitu ahi jeela nakubhapinya ivihama vwabho kuhapintu habhabhishile. ²⁵ Pahabhalilo pawusiku pakaasi, Paulo nu Sila bhahabha bhakuputa nakwimba izya kumupaala u Mulungu uku abhapinywe abhamwabho bhakubha tejelevwa. ²⁶ Panapo bhulo shiha fumila ishiyingayinga ishipiti uwalo wondi uwi gelela wuhayizwa, amalyango agi jeela gahiguha, nimbingwa izya bhapinywe bhondi zihazegemba. ²⁷ Ukolokoloni awa pijeela ahadamuha kufuma mutulo nahalola amalyango goondi igijeela migule; ipo ahega ipanga lyakwe ilelo ahanzaga ayigoje kwekunti ahantinji abhapinywe bhondi bhasogooye. ²⁸ Ilelo, u Paulo ahahoma ishoongo kwizi impinti, akutishi "Utahayininganye kwekunti twendi tulipo panaapa". ²⁹ Ukolokoloni ahalabha ivihozyo vwinze pe ahinjila muhanti mwijeela nalubhilo, akuyinga na kutuuya, ahabhagwila u Paulo nu Sila, ³⁰ na kubhafumwa panzi pi jeela nakulonga, "Bhasongo, imbombe lyoohi ingipate kwokoha?" ³¹ Bhope bhahamubhuzya, "Mwintishye Umweene u Yesu na utiyokoshe peeka ni nyumba yaho." ³² Bhahalo izwu lya Mulungu kukwakwe, peeka na bhandu bhondu ibha munyumba yaakwe. ³³ Ukolokoloni uwi jeela ahabhega uwusiku wula nakubhageezya mula mwebhavwalaye, uwene peeka na bhandu ibha munyumba yakwe bhahozelwa panapo. ³⁴ Ahabhaleta u Paulo nu Sila munyumba yakwe nakubhapa ishakulya. Wope ahabha nulusesholo ulumpinti peeka na bhandu abha munyumba yakwe kwekunti bhahamwintiha u Mulungu. ³⁵ Weyabha shamusanya, abhalonji bhahasondelezya amazwi kwa kolokoloni uwi jeela bhaholonga, "Bhaleshe abhandu bhala bhabhale". ³⁶ Ukolokoloni uwijeela ahamumanyisya u Paulo kunongwa ya mazwi kunti, "Abhalonji musogole: Ileelo fumi panzi mubhale kuwihalo." ³⁷ Ileelo u Paulo ahabhabhuzya, "Bhatuhomile pawelu, abhandu bhebhalumi sita kutuloonga ahamula kutusumba mwijeela, ishilele bha kwanza kutwefwa kukwilu? Ndali, teyibheshinisho, bhibho bhene bhinzi kutwefwa ipa". ³⁸ Abha kolokoloni bhahabhamanyisya abhalonji kunongwa ya mazwi igo, abhalonji bhahogopa ahaani pala pe bhahamanya kunti u Paulo nu Sila bhalumi. ³⁹ Alonji bhahinza nakubhabhuzya bhasogole, webhabhafumwa pazi pijeela, bhahabhalabha u Paulo nu Sila bhafume unzi ni haya yabho. ⁴⁰ Pe u Paulo nu Sila bhahafuma panzi pijeela bhahinza kuhaya kwa Lidia. Paulo nu Sila webhabalola abhaholo, wahabhapa umwoyo pebhahasogola ihaya iyo.