¹ Abhandu bhamu bhishile kuwuyahudi kubhanyizya abhaholo, bhatishi, "Angamutakwata anza miho ga Musa, mutangawezya kwokoha." ² Ahabhalilo hu Paulo nu Barnaba webhali kuwilizinya kulonga nabho, abhaholo bhahamula kunti u Paulo, Barnaba, na bhamwabho bhamu bhabhale Kuyerusalemu kubhasontelezyi abhabha zehe kunongwa yibhuzilizyo ini. ³ Ileelo, kwakubhasotelezya kwabho nishibhanza, bhahashilila ku Foinike na Kusamaliya bhakulalasya uluseshelo ulupinti kubhaholo bhondi. ⁴ Webhinza Kuyerusalumu, bhaha bhintishizya nishibhanza abhasotelazya nabhasehe, nabhaleta imbantiho ya gondi ge u Mulungu abhombile peka nabho. ⁵ Ileelo abhandu bhamu bhebhintishile bhebhali mumpuga iya Mafalisayo, bhahimilila na kulonga, "Hinza kubhaata nakubhamula bhaleme indajizyo zya Musa." ⁶ Ipo abhasundikwa peeka nabhazehe bhahimilila peeka kukwimiliha inongwa izi. ⁷ We bhabhuzilizanya ahatali, u Petro ahimilila nakulonga kukwabho, "Bhaholo mumanyile kunti ahabhalilo ahinza hehashilile u Mulungu abhombile kusebha wani kunti abhapanzi wivyaje izwi ilya uwoposhi nakwintiha. ⁸ U Mulungu, wamanyile amoyo, akupanjila kukwabho, akubhapa umupepu umufinjile, anza shabhombile kukwintu; ⁹ Na kugoomba ishiinji itwe nabheene, ahabhiha amoyo gabho aminza kulwintiho. ¹⁰ Ileelo, hooni he mukumulinga Umulungu kunti mubhishile peeka mumwanya munsingo zya bhalandanti zye pope abhayise bhitu awe itwe tutawezizye kujimbilila? ¹¹ Ileelo twitishile kunti tutiyokolewe ku wiha wa Mweene u Yesu, anza shebhali." ¹² Impuga yondi yapumile wikumutejelevya u Barnaba nu Paulo webha kufumwa impembu ivilolesyo namayele ge Umulungu abhombile peka nabho peeka nabhapanzi. ¹³ Webhaleha kulonga, u Yakobo ahagalusya ahalonga, "Bhaholo natejelevwe. ¹⁴ U Simoni alonjela kunti abhaji kufuma kukwabho abhandu kunongwa yitawa lyakwe. ¹⁵ Amazwi abhakuwi gakwintihana nili anza she lyasimbilwe. ¹⁶ 'Peleelo ganagp ihayiduga na kuzeenga awinza inyumba ya Daudi, yeyaguye pasi, ihaibhusya nakudaamusya uwunanjisu wakwe, ¹⁷ inga kunti abhandu bhebhasyalile bhamwa umweene, peeka nabhandu abhapanzi bhebhilishililwe nitawa lyaani.' ¹⁸ Ishi sha kulonga Umweene wabhombile amambo iga kunti gamayihaje kufuma imaandi. ¹⁹ Ishi leelo, ulupanzyo lwani, tutabhapanje amayimba abhandu abhanzi bhamudujile u Mulungu; ²⁰ Ilelo tusiimbe kukwabho kunti bhepaje ukutali nuwunanjisu uwa shiholanyo, kusungaha uwubhembu na vye nwoonjile, na mabhaanda. ²¹ Kufuma kupaapwa kubhazehe kuli nabhandu kwondi bhebhakulumbilila na kumubhazya u Musa muvibhanza pa Sabato." ²² Ileelo ihaloleha yabhahondela abhasundikwa na bhazehe, peeka nishibhanza shoondi, kumusebha u Yuda we bhahantinji wu Barsaba, na Silasi, bhebhali bhalongozi bhashibhanza, nakubhasontelezya ku Antiokia peeka u Paulo nu Barnaba. ²³ Bhasimbile ishi, "Abhasundikwa, azehe nabhaholo, kubhaholo bhabhapanzi bhebhali ku Antiokia, Shamu ni Kilikia, kulamuha. ²⁴ Tuhivya kunti abhandu bhamu bhe tutabhapiye indajizyo iyo, bhahafuma kukwitu nabhahabhayivwa kumanyizyo zyezikuleta amayimba muhanti yinyu. ²⁵ Ileelo yaloleha ahinza kukwitu twendi kusebha abhandu nakubhasondelezya kukwinyu peeka nabheganwe bhitu u Barnaba nu Paulo, ²⁶ abhandu bhebhazizye uwihelo wabho kunongwa ya Mweene wetu u Yesu Klisiti. ²⁷ Ileelo tumusondelezizye u Yuda nu Sila, bhantibhabhuzye inongwa ziniizyo. ²⁸ Kwekunti yaloleshile hinza kwa mupeepu umufinjile na kukwiitu, mudahabhiha ishililo ishimwanu pamwanya yinyu kushila amambo iga gegalazima. ²⁹ Kunti mugaluhana kufuma kuvindu vwevikufuma kushiholanyo, ibhaanda, ivindu ivwakunyoonga, nu wubhembu, anga mwayibhiha ukatali navinivyo, hantibhe hinza kukwinyu pe nasogola." ³⁰ Ipo leelo, shabhahasatana, bhahiha ku Antiokia, we bhabhungana ulubhungano peeka, bhatwala uwusimbe. ³¹ Webhayisoma, bhahasha kwekunti bhahabhapa umwooyo. ³² U Yuda nu Sila, na bhakuwi, bhahabhapa umwooyo abhalo kumazwi aminji nakubhapa amaha. ³³ Webhalya ahabhali amu ukwo, bhahasatana kuwinza kufuma kubhaholo kubhala bhebhabhasondelezizye. ³⁴ [Ileelo yaloleshile ahinza u Sila kusyala ukwo] ³⁵ Ileelo u Paulo nabhamwabho bhihaye Antioki peeka na bhamwabho abhinji, anga bhamanyizyaga na kulumbilila izwu lya Mweene. ³⁶ Pee wisiku zimo zyashila u Paulo ahalonga kwa Barnaba, "Tu dujele ele kubhajendela abhaholo kila haaya mwa Twa lumbiliye izwu lya Mulungu nakubhalola shebhali. ³⁷ U Barnaba ahanzaga awinza kumweega peeka nu Yohana webhahantinji Maliko. ³⁸ Ileelo u Paulo akwiniliya yitali hinza kumweega u Maliko, wabhaleshile ukwo kupamufilia atahajendelela nabho kubhomba imbombo. ³⁹ Ipo gahabha amadali amampiti pebhahalehana, u Barnaba ahamwega Maliko na kushula nawo mumbokoso bhahabhala ku Kipro, ⁴⁰ Ileelo u Paulo ahamweega u Sila nakusogola nawo, wabhaholo bhamupa kuwila wa Mweene. ⁴¹ Ahabhala kushilila Shamu na Kilikia, akubhiha ahinza ivibhanza.