¹ Ubhwandilo bhwa luho lwa Yesu Kristu umwana wa Daudi, umwana wa Ibraimu. ² Ibraimu ali u tata wa Isaka, na Isaka utata wa Yakobo, nu Yakobo utata wa Yuda nu mjenzi wakwe. ³ Uyuda amali utata wa Peresi nu Sera kwa Tamari, Peresi tata wa Hezeroni, nu Hezeroni utata wa Ramu ⁴ Ramu amali utata wa Aminadabu, Aminadabu utata wa Nashoni, nu Nashoni utata wa Salimoni. ⁵ Salimoni amali utata wa Boazi kwa Rahabu, Boazi utata wa Obedi kwa Ruthi, Obedi utata wa Yese, ⁶ Yese amali utata wa mwene Daudi. Daudi amali utata wa Solomoni ku mushi wa Uria. ⁷ Usolomoni amli utata Rehoboamu, Rehoboamu utata wa Abiya, Abiya utata wa Asa. ⁸ Asa amali utata wa Yehoshafati, Yehoshafati utata wa Yoramu, na Yoramu utata wa Uzia ⁹ Uzia amali utata wa Yothamu, Yothamu utata wa Ahazi, Ahazi utata wa Hezekia. ¹⁰ Hezekia amali utata wa Manase, Manase utata wa Amoni nu Amon utata wa Yosia. ¹¹ Yosia amali utata wa Yekonia na bha mukulu bhakwe ahabhalilo ha ahabhanyetulaga kubhala Babeli. ¹² Lwebhashili ukunyatulwa ukubhala ku Babeli, Yekonia amali utata wa Shatieli, Shatieli amali usekulu wakwe wa Zerubabeli. ¹³ Zerubabeli amali utata wa Abiudi, Abiudi utata wa Eliakimu, na Eliakimu utata wa Azori. ¹⁴ Azori amali utata wa Zadoki , Zadoki utata wa Akimu, nu Akimu utata wa Eliudi. ¹⁵ Eliudi amali utata wa Elieza, Elieza utata wa Matani nu utata wa Yakobo. ¹⁶ Yakobo amali utata waYusufu umulume wa Maria, we unyina wa Yesu apapilwe, bhahamwita Kristu. ¹⁷ Impapilwa zyonti kufuma kwa Abrahamu mpaka kwa Daudi vyali vipapilwa kumi na ine, kufuma kwa Daudi kunyatulwa kubhala Babeli impapo kumi na ine, nukufuma kunyatulwa kubhala Babeli mpaka Kristu impapo kumi naine. ¹⁸ Kupapwa kwa Yesu Kristu kwali muhabheli ihaa. Umama wakwe, Mariamu, ahazinjillilwa nu Yusufu, iwe bhashili kuhomana, ahaloleha alinulwanda kumaha ga Mupepo Umufinjile. ¹⁹ Umulume wakwe Yusufu, amali muntu wa bhwanalyoli atanza kumupezyezya insoni. Ahanzaga kumuleha umuzinjilwe ku njele. ²⁰ Lwe akujendelela ukusibhilila amazwi ago, Uhabhizya wa Mwene ahamwinzila mu vilota, akuti,"Yusufu we mwana wa Daudi, utahanyile ukumwenya Maria ngati mushi waho, shifukwa ulwanda lwa alinalwo aposhele kumaha ga Mupepo Umfinjile. ²¹ Alipata umwana umwanavuli na izina lyakwe aliyima ghu Yesu, pe alibhapoha abhantu kumbibhi zyabho. ²² Gonti gahafumila kukwalilisya nukushila she shihayangwa nu Mwene kwidala lya Mkubhwi, ahayanga. ²³ "Yenya, nulindu kuti anyatule ulwanda kupapa umwana umwanavuli, pe bhalimwita izina lyakwe, Imnueli"_ kumanisya ukuti, "Mulungu alipoka niswe." ²⁴ Yusufu ahadumula kufumila mutulo nukubhomba inzavwe uhabhizya wa Tata anulajizizye nu ahamwega kubha mushi wakwe. ²⁵ Pelelo, atahakata nawope mpaka pa hinza apapa umwana umwanavuli na aha mwita izina lyakwe Yesu.