¹ Paulo, muzya wa Kirisitu Yesu kulugano lwa Mulungu, nu Timotheo umujenzi witu, ku tempeni lya Mulungu lyeliliko Kukorintho, na kubhafinjile bhonti bhebhali munkaya yonti iya Akaya. ² Ubhwila na bhubhe nimwe na umutende kufuma kwa Mulungu Utata witu na Umwene Uyesu Kirisitu. ³ Na tumutime Umulungu nu Tata wa Mwene Yesu Kirisitu. Uwene Utata wa bhwila nu Mulungu wa bhusubhalizyo bhonti. ⁴ Umulungu akutusubhalizya itwe pakasi pamayimba gitu gonti, inga kuti tubhombe kubhasubhizya bhala bhebha pakasi pamayimba. Tukubhasubhalizya bhamo kwa kubhasubhalizya kwekula kwe Umulungu abhombela kutusubhalizya itwe. ⁵ Pakuti ngati vye amayimba ga Kirisitu gakonjela panongwa yitu, bhebhulo kusubhalizya kwitu kukonjelaha kufumila Ukirisitu. ⁶ Loli ngati bhakutuyivwa, panongwa ya kusubhalizya bhwinyu nu bhulokole bhwinyu. Pope inga bhakutusubhalizya, kwekujendela kusubhalizya kwinyu. Kusubhalizya kwinyu kukubhomba imbombo hinza penukwinjila mumayimba kwa kujimba ngati twetwe vyetukuyimba. ⁷ Na amaha gitu pamwanya yinyu Tumanyile kuti inga vye mukuhomana mumayimba, bhwebhulo mukwinjila mubhusubhalizyo. ⁸ Pakuti tutakwanza imwe mubhe mwebhayubhwi, bhajenzi, kutwamwo yetwamile nayo uko Kuasiya. Tuhabhonelwa nkani kushila vyetungabhomba na kupimba, pakuti nulwitiho ulwa kutendama habhili. ⁹ Nalyoli, twali ninongwa ya kufwa papitu itwe, loli iyo yali ya kutubhomba itwe tulitutahabhishe kusubhalila pamwanya papitu twetwe, pelelo yakuti tubhishe ulusubhilo kwa Mulungu wakuzusya abhafwe. ¹⁰ Ahatupoha itwe kufuma mubhufwe ubhwa kufwa, nalitupoha habhili tubhisile amaha gitu kwa wuyo iyakuti alitupoha habhili. ¹¹ Alibhomba bhwebhulo ngati bhwebhulo imwe habhili vye mukutwavya kumputo zyinyu. Pe abhinji bhalifumwa isha kusalifwa na kutufumizya itwe pakutupendelela kubhwila bhwatupiye itwe kujendelela nkumpulo zya bhinji. ¹² Tukuyila kwili: inenelezyo izya mukasi mumwitu. Kwekuti kwidala ilyinza nubhuzelu bhwa Mulungu pakuti tuhajendaga tweka pakasi pansi. Tubhomvile bhwebhulo ishimwene natekwekuti kwekumushinzi wa pansi, loli yakuti kwekubhwila bhwa Mulungu. ¹³ Tutakubhasimbila shoshonti she mutangabhwezya kushibhelenga lumo kumanya. Ndili na maha ¹⁴ pakuti hansi mwanda kutumanya. Na ndili na maha kuti isiku lya bhutatu Uyesu tulibha lidala kukwinyu kwibado lyinyu, ngati vye mulivyimwa kukwitu. ¹⁵ Panongwa namile na maha kuyanga ili, nkazyaga kwinza kukwinyu suti, ingakuti muposheleye ishakulonka kwakubhajendela lubhili. ¹⁶ Namile ne muntu wa kukulajizwa kubhajendela lwe nkabhalaga Kumakedoniya. Habhili nkozyaga kubhajendela habhili lwe nkugaluha Kumakedoniya, nahabhili imwe kunsontelezya ine lwe nkubhala Kubhuyahudi. ¹⁷ Penali kusibha vinkozye ili, pe, namile kusibhasibha? Pe nkasibhaga imbombo kuholana na vyali umuntu, inga kuti injaje "Nalyoli, na lyoli" na "Hagha, hagha" kuhabhalilo hoka? ¹⁸ Loli inzavyu Mulungu wanalyoli, tutakuyanga vyonti "Nalyoli" na "Hagha." ¹⁹ Pakuti umwana wa Mulungu, Uyesu Kirisitu, we Usilivano, Timotheo nine tuhamuyanga poka nimwe, tekuti "Nalyoli" na "Hagha." Pakuti indajizyo zyonti zya Mulungu kwekuti "Nalyoli" ²⁰ Ku uwene. Pelelo kujenda wuyo tukuyanga "Amina" kumushinzi bhwa Mulungu. ²¹ Isalizi wu Mulungu weakutulanga itwe poka nimwe pakasi pa Kirisitu, nehabhili ahatusontelezya itwe. ²² Ahabhiha ishilemezanwo pamwanya papitu na ahatupa Umupepo mumwoyo gitu ngati shilemeshezyo shashila she nkahatupa kwilongolela ²³ Pelelo iyakuti, nkumulabha Umulungu kunsimishizya ine kuti ishintu sheshihabhomba kuti ntahinze Kukorintho kwekuti intahabhape imbombo imwe. ²⁴ Ino te kwekuti tukulinjizya kudindila vye ulwitiho lwitu vwelukwanzibhwa kubha. Peleloyakwe, tukubhomba nimwe kujendelela mumutende winyu, ngati vye mukwamilila mukasi ku lwitiho lwinyu.