¹ Mufwate ine, ngati nene nkufwata Ukirisitu. ² Isalizi kubhinula panongwa ya vila vyemukukumbuha pambombo zyonti. Nkubhinula panongwa mugalemile genkuyanga ngati vye nkagaleta kukwinyu. ³ Pelelo kwanza mumanye kuti Ukirisitu litwe lya kila mwanavuli, wope umwanavuli litwe lya mwantannda,na ya kuti Umulungu litwe lya Kirisitu. ⁴ Bhonti abhanavuli bhalabhe lumo bhafumwe ubhukubhwi inga aligubishiye itwe akulisamula itwe lyakwe. ⁵ Loli kila mwantanda wakulabha lumo akufumwa ubhukubhwi inga itwe lyakwe liliubhwa ziakuli samula itwe lyakwe. Pakuti yikulingana nakuti ayefizye. ⁶ Shenga umwantanda atagwishiye itwe lyakwe, pe ayefwe insinsi zyakwe zibhe fupi. Pakuti sikubha nsoni umwantanda kwefwa insinsi zyakwe lumo kwefwa. Pelelo ingali ninsoni umwantanda kwefwa insisi zyakwe lumo kumwefwa, pe agwinkane itwe lyakwe. ⁷ Pelelo yitakwanzibhwa umwanavuli kugubishila itwe lyakwe, panongwa uwene shifwani nu mushinzi wa Mulungu. Loli umwantanda mushinzi wa mwanavuli. ⁸ Pakuti umwanavuli atahafumila nu mwantanda. Loli umwantanda ahafumila nu mwamnavuli. ⁹ Pelelo umwanavuli atahapelwa panongwa ya mwantanda. Loli umwantanda ahapelwa panongwa mwanavuli. ¹⁰ Mwemumwo panongwa umwantanda akwanzibhwa kubha nindolesezyo izya kwamulisya pamwanya ya itwe lyakwe, panongwa iya bhahabhizya. ¹¹ Izyene, izya kwa Tata, umwantanda atali weka pepatali umwanavuli, lumo umwanavuli atangabha bila mwantanda. ¹² Habhaili inza shu umwantanda ahafuma kwa mwanavuli, bhwebhulo umwanavuli ahafuma kwa mwantanda, nivintu vyonti vikufumwa kwa Mulungu. ¹³ Mulonganaje mweka: Pe! hinza umwantanda aputaje Umulungu lwe itwe lyakwe liliapazi? ¹⁴ Imwe mupizilwe mwemwe mweka yitakubhamanyizya kuti umwanavuli ingali ni nsisi intali shansoni kukwakwe? ¹⁵ Pe ishihaya hatahasambilizya iya kuti umwantanda ingali ni nsisi intali mushinzi kukwakwe? Pakuti apewilye zila insisi zila intali ngati shizwalo shakwe. ¹⁶ Loli inga umuntu wowonti akwanza kudalinkana kwili, itwe tutalinidala ilinji, pope ivibhanza vya Mulungu. ¹⁷ izyene indajilo zye zikwinza, ine ntakubhazuvwa. Pakuti pemukubhungana, tekwekushinza loli kwekushibhibhi. ¹⁸ Pelelo isha bhwandilo, kwivwa kuti pemukubhungana mushibhanza, kulikugabhinkana pakasi papinyu, na hansi kwitiha. ¹⁹ Pakuti shihondeye ishakupotana npakasi papinyu, inga kuti bhala bhebha manyisile bhamanyishe kukwinyu. ²⁰ Pakuti inga mukuhomana, shemukulya te shkulyan sha Mwene. ²¹ Pe mulikulya, kila woka wula shakulya shakwe wuyo sheabhanji bhashili kulya. nuno ali ninzala, nuno amweleye. ²² Pe mutali ni munkaya zya kulila na kumwela? Pe mukulisufwa itepeli lya Mulungu na kubhahatafwa bhabahatali na shimo shimo? Injanje ishoni kukwinyu? Imbinule? Ntakubhinula kwili! ²³ Shezyemuposheleye kufuma kwa Tata shila she nabhapa imwe iya kuti Umwene Uyesu, ubhusiku bhula bhebhahamuhana, ahanyantula ubhugali. ²⁴ Lwa halema kusalifwa, ahabhumenyanwa na ahati, "Uno we mubhili wane, wewulipo kukwinyu. Bhombaji bhwebhulo pakunkumbuha ine." ²⁵ Ne habhili ahanyatula ifinga ashili kulya, bhahati, "Ifinga ino ndajizyo ipwa kwi bhanda lyane. Bhombaji bhwebhulo ilwinji pe pemukumwela pankumbuha ine." ²⁶ Pa habhalio hemukulwa ubhugali ubhu nu kumwela ifinga, mwenezya ifwa ya Mwene paka pakwinza. ²⁷ Pelelo, kila muntu wa kulya ubhugali na kumwela ifinga iyo iya Tata yeyitakwanzibhwa, lwayilondola inongwa iya mubhili na ibhanda iya Mwene. ²⁸ Umuntu ayisibhilile wuyo shuti, pelelo inga wealya ubhugali, na kumwela ifinga. ²⁹ Pakuti wa kulya na kumwela loli kusibhilila umubhili, akulya na kumwela nakulongwa wuyo. ³⁰ Ishi sheshinisho abhantu abhinji pakasi papinyu bhabhinu na bhayeyebhazu, na bhamo bhafuye. ³¹ Loli tuyenyelezye tweka tetuhalongwe. ³² Loli inga tukulongwa nu Mwene, tukugalushila, loli tutahinze tulongwe twenti ninsi. ³³ Pelelo, mukulu nu muyemba bhane, pemukubhungana mulyanje, mundindililaje. ³⁴ Umuntu ingali ninzala, na alyanje nkunkaya yakwe inga kut mukubhungana poka yitahabhe yitahabhe kulongana. Na kuyanga aganji gemuhasimba, lwa ndibha linganwa inganinza.