¹ Paulo, umbomba va Nguluve nu msuhwa va Yesu Kristo, kulwidiko lwa vahalwa wa Nguluve nu luhala lwa lweli ulu lwitwala uvutaua. ² Pwuvale pamahuvya lwa wumu wa majuva goni uvu Unguluve uyu sagelele ukudesa uku ajovile ukuhuma katata. ³ Ku nsiku unonu, akagubatula ilimenyu lwa mwenee kunongwa iji vatupile une ukuva nndumbilili, puyanogilwe ukuvomba vule kwa amuli ya Nguluve umpoki vitu. ⁴ Kwa Tito, umwanango wo lweli mu lwidike lwito, uvupe, ikisa nu lwidiko nu vulele ukuhuma kwa Nguluve Utayi nu Yesu Kristo umpoki vitu. ⁵ Kunongwa iyi nikakuleka Kreta, ukuta ugavomba amambo goni aga ga sigalite sagasile nu kuvika avasehe va tembile kila ponu ndavule na kulagija. ⁶ Unsehe va kanisa ave munuuvyila nongwa, ungosi unya ndala yumo, uyu ali na vana ava mitu avasavijoviwa kunongwa ja vugalagala awo savalina lisima. ⁷ Pu yinogile kundoleleji, kama mwininji va nyumba ya Nguluve, aleke ukulaumiwa aleke ukuvu mumu va nunywego au uyu sikwisiga. Yiloindiwa aleke ugugala, aleke ukutalya imbaja, aleke ukuva ni kyoyo. ⁸ Badala yake: ave munu valuhekelo, uyu inogwa uvunano. Lasima ave munu unyaluhala ulunonu, unyavulweli uyu ikudwada Unguluve uyu ikwidwaja yuywa. ⁹ Uyu iweswa ukwimiilila vunonu amamanyisyo ga lweli aga vamanyisye, neke awesye ukuvakasya kumamanyisyo amanonu pu awesye ukuvasahisya voni avavavikumbeje. ¹⁰ Ulwakuva kuliva vagalaga vingi, hasa vala ava vatahiviwe. Amamenyu gavo ga vupelwa. Vasyovi na vikuvalongoja vanu kukuvumba imbivi. ¹¹ Pu lazima uvasigile avanu avalindavo. Vikuvamanyisya gala agasaginogelwa kwi faida ya soni nu vu nangi wingi wa vana voni. ¹² Umo vavo, umunu unyaluhala, ajovile, "Avakrete kali nu vudesi uvu savisila, vavivi na fikanu fya kudwaja, volo na valafi." ¹³ Aga maelezo ga lweli, pu lino wasige ku maka neke ukula wavoesye ukujova lweli mulwidiko. ¹⁴ Uve uleke ukuka nano kufijogo fyavo ivijila vulweli ifya Kiyahudi ewo indangilo ja vanu, ava vivuja kusana uwayilweli. ¹⁵ Ku vunu avagolofu, ifinu fyoni fyope vinonu. Lino kuvoni avavivi na ava savikwidika, kisipali ikinu ikinonu. Ulwa amasage gavo nuvunogwa wavo vulamile. ¹⁶ Vikwidika ukummanya Unguluve, lino kumbombo javo vikumbela, vavo valanile na savikwiyisya. Vanyakukalaja vayagi hata kumbombo yoyoni savifaa.