¹ Lino ulwidiko lu wayilweli uwalinawo umunu vu ikilolela ikinu kumaka vuyilweli vwa kinu kikyosakivunike. ² Pu avakuku viito vamanyikiki pa lwidiko lwavo. ³ Ku lwidiko tulumanyile ukuta ikilunga kyavumbiwe kululagilo lwa Nguluve neke kila kikyokivoneka sakyatenddiwe ukuhumana ni fiinu fifyo fya wonekaga. ⁴ Ulwa kuva yale ya lwidiko ukuta u Habili alinkung'umihija u Nguluvi inekelo inonu ukulutilila nduvu alinkuvomba uKaini. Ku njila iyi alinkwiginiwa ukuta vi ng'olofu. UNguluvi alinkun'ginia ulwa kuva alinkugega inyokelo. Pu kunjila iyo u Habili akale ipijova ndangave afwile. ⁵ Yale kulwidiko ukuta u Enoko ataliwe kukyanya saavuvone uvufwe. "Saavoneke ulwa kuva uNguluve antolile" ulwa kuva yajoviwe ukuta ang'ovwisye uNguluve vu akale satoliwe kukyanya. ⁶ Ukusita ulwidiko sawigela ukung'ovu sya Nguluve ulwa kuva uyuikwija kwa Nguluve yulonda idike ukuta uNguluve mwumi kange ikuvapa inyokelo vavo inku ndonda. ⁷ Yele kulwidiko ukuta uNuhu, vu avungiwe nu Nguluve ukukongana ni mbombo jijo sajivonike, kuwogofi wa ki Nguluve pu apumjile ingalava iya kukipoka ikipapo kya mwene. Vu avombile ewo, akakihiga ikilunga pu akava ing'aale in'golofu uvuvukwija nu lwidiko. ⁸ Yale kulwidiko u Ibrahimu, vu ilangiwe akidihana nu kuluta aponu apa alondiwaga ukupokela ndu vuhale. Ahegile kisita kulumanya ndaku ukuiluta. ⁹ Yale ukuva lwale lwidiko alamile mkilunga ikya ndagano ndu n'genji. Atamile mumahema paninie nu Isaka nu Yakobo avahaale vanine va ndagano yilayila. ¹⁰ Yaale ulwa kuva asagile ukukava uvujenge vuvwa unyakusaga nu nya kujenga aleiva vi Nguluve. ¹¹ Yale kulwidiko u Ibrahimu, nu Sara yuywa vapokile amaka ga kupela imbeyu ya lwanda ndavule vale vagogolo kyongo, ulwakuva vambwene u Nguluve ukuta in'golofu, uyu vaidilune umwana un'dimi. ¹² Pu ukuhuma ku munu uyu yumo uyuale pipi ukufwa pu vakaholiwa avana vavosavi valika. Vale vingi ndi nondwe ija kukyanya kange vingi ndi mbeyu ija nsanga gwa munyanja. ¹³ Ava vooni vafwile palwidiko kisita kupokela indagano. Vavile vajiwene nu kujihegeleja vu valipatali, pu vakiidihana ukuta vale vagenji kange vagenda njila pakilunga. ¹⁴ Ku vala avaijuva imbombo iji vivika pavuvalafu ukuta vikukilonda ikilunga kyavo veene. ¹⁵ Lweli vale vakisagage ikilunga kikyovahumile vale viva na poonu apaku vuyila. ¹⁶ Pu nduvu yiliwo vinogwa ikilunga ikinonu kikyo kya kikukyanya. Pu uNguluve sivona soni ukwilangiwa Nguluve vavo ulwa kuva atesanije uvujenge u wawo. ¹⁷ Yale kulwidiko u Ibrahimu munu ageliwe ang'umije uIsaka. Lweli umwene ahovwike ukupokela indagano, ang'umije unswambe uyu alimwene, ¹⁸ uyu kumwene yajoviwe, "Ukuhuma kwa Isaka ulwokolo lwako lukwilangiwa." ¹⁹ U Ibrahimu alumanyile ukuta uNguluve ale namaka aga nkujusya uIsaka ukuhuma kuwufwe nu kujova kunjovele iya ifinuakampokela. ²⁰ Yale kulwidiko uIsaka ansayile u Yakobo nu Esau ku mbombo iji kwija. ²¹ Yale kulwidiko uYakobo vualipakufwa akansaya umwana nu mwana uva Yusufu. U Yakobo akasaana akiyeganija pa lubiki lwa mwene. ²² Yale kulwidiko ukuta u Yusufu unsiki gwa mwene vugufikile kukusila ajovile ukuta ava Israeli vihega Misiri vu vihega vatolage na majege ga mwene. ²³ Yale kulwidiko ukuta uMose, vuaholiwe afihiwe imieji gidatu na vahoji va mwene ulwa kuva vambwene ukuva mwana n'debe uyuale nnonu, kange savadwajiwe ni lulagilo lwa ntwa. ²⁴ Yale kulwidiko ukuta u Mose avile munu mbaha abelile ukwilangiwa mwana va Farao. ²⁵ Pu ahalile ukuva paninie ukukuvilwa na vaanu va Nguluve pu akabela ukuhovoka ni nonu ja mbivi ija nsiki. ²⁶ Asagile isoni ija kunkonga uKliste ukuva vu vukavi uvuvaha ukulutilila ifya ku limba ifya mu Misiri ulwa kuva alolile amiho ga mwene ku lwokelo ulwa nsiki gwa mwene ugugwi kwija. ²⁷ Yale ku lwidiko ukuta uMose ahegile mMisri. Sakadwada iliyo lya Ntwa ulwa kuva asipile ukulota ku yuywa sivoneka. ²⁸ Yale kulwidiko ukhuta ayi bite ipasaka nu kududilila unkisa neke yive unangi va ng'olwa va kwanda asite ukuvapa lamasya avaholiwa avakwanda ava diimi ava vaIsiraeli. ²⁹ Yale kulwidiko ukuta vangendile mu nyanja iya shamu nduvu vigenda nkilunga ikisita magosi unsiki ugu avamisri upu vagelile ukugenda pu ulugasi lukavabuda. ³⁰ Yale kulwidiko ukuta ulumato ulwa Yeriko lwagwile pasi vu lujungutiliwe ku majuva lekela kumo. ³¹ Yale kulwidiko ukuta u Rahabu ula undigu saafwe na vala vavo savale vidisi ulwa kuva avavapokile wapelelezi avatadiji nu kuvalolela vunonu. ³² Pu nijove kiki? Manya unsiki sagukwila ukupanga ija Gideoni, uBaraka, uSamsoni, uYeftha, uDaudi, uSamwel ni ja vanyamalago, ³³ vavo ukugendela ulwidiko vavutolile uvutwa vavombile uvugolofu kange vakapokela indagano vasiigiile imilomo gya ngalamu, ³⁴ vajimije amaka ga mwoto, vapagile uvwugi wa mundu, vaponile ukuhuma mumbutamu, vale na maka mundigoha vakavakimbija amapuga ga vatavangwa avagenji. ³⁵ Avadala valikupokela vavovafwile kunjila iya kujuuka. Avange valikukuvilwa, kisita ukwidika ukulekiwa neke vagele ukujovela uvujukwa uvunonu. ³⁶ Avange valinku kuvilwa nu kubediwa nu kutoviwa, pu nakukungiwa ukwingijiwa mu nyololo. ³⁷ Valikutikiwa na mawe valinkugidiwa fimendo fimendo ni misumeno, valinkubudiwa ni mundu valinkuluta kii ngwenbe ja ng'osi ni ngwembe ja mene valinkokoja ikisa vakava vakuvilwa nu kuvumbeliwa imbivi. ³⁸ (yiyo ikilunga sakyalondiwaga ukuva navwo), valikuwama mundu kuvi, mufyamba, mungumbwe na mumaguli. ³⁹ Ndayingave avanu vooni ava vaidikiwe nu Nguluve ulwa kuva kulwidiko lwavo savapokele ikialagije. ⁴⁰ UNguluve atalile ukutupa ikinu ikinonu ne kusita ufwe fwe savale vigela ukuva va kwilanile.