¹ Naha bheka papera uhakaho hwoha, kukuruha unaike, hwiho, na kashita. ² Ngati bhana bhing'enya, tamanene mabhele gha maha gha moyho, ili mholore kukura nkate yha wokobho. ³ Ngati mbhiikuonya Bhambo hwa maha. ⁴ Hikani kwabhe yhabhii lighanga hayi lilitenda kuishi litekukanwa ni bhando, lakini lyene litendakuhaghulighwa na Chapanga na libhii lya thamane kwabhe. ⁵ Na mwenga mbhii ngati maghanga ghaghabhii hayi ghatendakuchengwa panane kubha kayha yha moyho, ili kubha ukuhane hwa maha hwene uhenga chabiho yha moyho chitendakukubaliwa kwa Chapanga kupitila Yesu Klisto. ⁶ Liyhandiko lilonga naha , "malolekeha, mbhikite lighanga mu Sayune lighanga la papera, kulu lilitendakuhaghuliwa na lya thamane. Yeyoha yhatendakuhamini mu yhwene abhonayhe haibo." ⁷ Naha heshima yhibhii yhino kwino mangota mtenda kuhamini. Lakini, "Lighanga lilitendakukanwa na bhabichengalene lakibha lighanga likulu la papera," ⁸ na, "lighanga la la kukondobhoka na lindalawe lya kukondobhecha." Mabhene bhakondobhoka, bhebhakana lilobhe kwa lila bhatendakuhaghuliwa kwalyene. ⁹ Lakini mangota mbhii ukoo bhuhaghuliwe, ukuhane hwa kialme, taia la maha, bhando bha miliki yha Chapanga, ili mhotore kutangacha mahengo gha hajabo gha yhula yhabhakemite kuhuma mu kiro kuhika mu mwanga hwake hwa hajabo. ¹⁰ Mangota pa kutumbura makibhayhe bhando, lakini ngoheno mbhii bhando bha Chapanga. Mangota muyhupayhe rehema, lakini ngoheno mtendakuyhupa rehema. ¹¹ Bhapalwa, ninkemite ngati bhaghene na bhakutyangatyanga kujiyima kuhuma mu tamaha mbayha yha zambe, yhene itenda kuburana ngondo na mioyho yhino. ¹² Mpalwa kubha ni tabia yha maha nkate yha mataia, ili ngati bhatenda kulonga ngati mhenga mambu ghamaha na kunsiu Chapanga mu chiku lya kuhika kwake. ¹³ Yhitikira kila mamlaka gha mwanadamo kwa ajili yha Bhambo, ikibha malme ngati mkulu. ¹⁴ Yhakibha bhatawala bhabhatumwa kubhaazibo bhahenga mabayha na kubhasiu bhala bhahenga mambo gha maha. ¹⁵ Nhwalo hwakibha upalo hwa Chapanga, kuhenga mambu gha maha ntendenda kubhika nnu malongoche gha kipuuzi gha bhando bhabhoho. ¹⁶ Ngati bhado hulu, nkotokuhenga uhulu hwino ngati kipuniko kwa mabhoho, nambo mtame ngati bhatenga bha Chapanga. ¹⁷ Mubhaheshimu bhando bhoha. Mubhapalahe akalongo. Mubhayhoghope Chapanga. Hechimo malme. ¹⁸ Bhatumwa, bhayhikitii Bhambo hwino kwa hechima yhoha, siyho tu bhambo bhamaha na bhapole, nambo bhabhabhii bhabhoho. ¹⁹ Nhwalo yhibhii sia ngati yhoyhola atendakuamiliha pabhalagha pabhiiyhe haki nhwalo hwa Chapanga. ²⁰ Yhibhii faida ghane yhakibha ngati mtama mukuhenga zambe nu kuyhendelela kuhadabiwa? Nambo ngati muhenga ghamaha nu kulagha kwa kuhadabiwa, yhinji sia yha maha kwa Chapanga. ²¹ Mu lindi mtenda kukemwa, nhalo Klisto atenda kulagha kwaajili yhino, onekihi mano kwaajili yhino kunkingama mnyayo yhake. ²² Yhwene ahengayhe zambe wala ubhonekana yhe uhwange hwowoha kwabhe. ²³ Wakati yhwene pabhatenda kunnigha akiribhuha yhe maligho, patenda kulagha, ayhoghoya yhe atendakujhibhuna mabhene kwa yhwene ahadabuaye kwa haki. ²⁴ Yhwene mabhene agheghite zambe yhito mu mbhili hwake mu mkongo, ili kwamba tutame yhe kabhele mu zambe, na tutame kwaajili ya haki, kwa kubulwa kwake mwenga mtenda kurama. ²⁵ Bhoha mmakibha mhangayhika ngati mberere yhatenda kuhobha, nambo ngohe mtendakukiribhuka kwa kilongoche hwino na mlinze hwa mioyho yhino.