¹ Na wakiidia katika mizi ya Amfipoli na Apolonia, wachee mpaka muzi gwa Thesalonike amboko kwarikogo na isinagogi ja wayahudi. ² Kama andu iko kawaida ya Paulo, wagendie mizawe, na kwa muda wa matuku adadu ga sabato wajadiliane nawo igu ya maandiko. ³ Werikogo akiwarugulia maandiko na kuwaeleza kuwa, yampasie Kristo ateseke na kisha kufufuka sena kufuma kwa wafu. ⁴ Baadhi ya Wayahudi washawishikie na kuungana na Paulo na Sila, andu kumweri na wagiriki wacha Mlungu, waka wengi waongofu na ikundi ibaha ja wandu. ⁵ Ela baadhi ya wayahudi wasioamini, wachuriwa ni wivu, wagendie chetenyi na kuwawusa baadhi ya wandu wawiwi wakakusanya umati wa wandu andu kumweri, na kusababisha gasia mjini, kisha wakaivamia nyumba ya Josoni, wakikunda kuwa wada Paulo na sila ili kuwareda imbiri ra wandu. ⁶ Ela kuwasowa, wakamwada Yason na baadhi wambari wamwi na kuwagenja imbiri ya maofisa wa muzi, wakikaba jogo. "Awa womi wagumbindue urumwengu wafika mpaka uku pia, ⁷ Womi awa wakaribishwa ni Yasoni wadaihalifu sheria ya kaisari, wadedaa kuko Mzuri umwi awangwaga Jesu" ⁸ Umati na maofisa wa muzi, kusikira malago ago wangiriwe ni wasi wasi. ⁹ Baada ya kuwa wameria kuwusa magome ga thamani ya walindiri kufuma kwa Yasoni na wamwi, wawasigie wagende. ¹⁰ Kio chija wambari wamdumie Paulo na Sila Beroya. Na kufika kuja wagendie katika isinagogi ja wayahudi. ¹¹ Wandu waja warikogo wakana kukala kubaha kuliko waja wandu wa Thesalonike, kwa sababu warikogo na utajiri wa kujiwokera idedo kwa akili rawo, na kuchunguza maandiko kila ituku ili kuwona kama madedo gadedwa niko geko. ¹² Kwa huwoo wengi wao waaminie, wakika waka wekona ushawishi mbaha gwa kigiriki na womi wengi. ¹³ Ela wayahudi wa Thesalonike kugundua kwamba Paulo adatangaza ja Mlungu uko Beroya, wagendie uko na kuchochea na kisha kuanzisha gasia kwa wandu. ¹⁴ Kwa shwa shwa, wambari wakamgenja Paulo kwa chia ya iriwenyi, ela sila na Timotheo wakabaki aja. ¹⁵ Waja wambari wamgenjie Paulo wagendie nae hadi Athene, wakamsiga Paulo uko wawokerie malagizo kufuma kwake kuwa, sila na Timotheo wache kwake kwa shwa shwa kadri idimikanaga. ¹⁶ Na wakati akiwa wesera uko Athene, ngolo yake yakasirishiwe ndenyi yake kwa jinsi awonie muzi kandu gwachua sanamu nyingi. ¹⁷ Huwo akajadiliana katikaisinagogi na wayahudi waja wamchaga Mlungu na kwa waja wose wakwana nawo kila ituku chetenyi. ¹⁸ Ela baadhi ya wanafalsafa wa waepikureo na wastoiko wakamkabili. Na wamwi wakadeda, "Ni ndoi achidedaga uyu mdedaji mkoho? wamwi wakadeda, "yawonekana adahubiri bvahari ra Mlungu mgeni," kwa sababu adahubiri habari ra Jesu na ufufuo. ¹⁹ Wakamwusa Paulo na kumreda Areopago, wakideda, "Dadima kumanya aga mafundisho mapya ugadedaga? ²⁰ Kwa sababu udareda malago mapya katika madu gedu. Kwa huwo dakundi kumanya aga malago gakana maana ki?" ²¹ (Na wandu wose wa Athene andukumweri na wagenji weko mizawe, watumiriaga muda wawo aidha katika kudeda na kusikiria igu ya ilago ipya.) ²² Kwa huo Paulo akasimama gadi gadi ya wandu wa Areopago na kudeda, "Inyo wandu wa Athene, nawona kuwa inyo ni wandu wa dini kwa kila namna, ²³ Kwani katika kuida kwapwa na kuguwa vilambo vyenyu va kuabudu, nawona madedo gaandikwa mojawapo ya madhabahu genyu, ikideda "KWA MLUNGU ASAMANYIKANE". Huwo basi, uyo mumwabudu pasipo kummanya, ni ye niwajulisha inyo. ²⁴ Mlungu waumbie dunia na kila kilambo chikondenyi, kwa kugora ni Mzuri wa mbingu na isanga, ndadimaga kukaia katika mahekalu gabonyigwa ni mikonu. ²⁵ Na pia ndatumikiwaga ni mikonu ya wanadamu kana kwamba wakundi kilambo kwawo, kwani ye mweni wawanekaga wandu binana na pumzi na vilambo vimwi vose. ²⁶ Kuidia mundu umweri, wabonyie masanga gose ga wandu waishio igu ya wushu gwa dunia, na akawawikia nyakati na miano katika maeneo waishi. ²⁷ Kwa huwo, wakundigwi kumlola Mlungu, na yamkini mwafikie na kumpata, na kwa uhakiki ndeko kula na kila umweri wedu. ²⁸ Kwake daishi, nasela na kuwa na binana yedu, kama uja mtunzi wenyu umweri wa ishairi akideda 'da wavalwa wake.' ²⁹ Kwa huwo, ikiwa wose da wavalwa wa Mlungu ndadipaswaga kufikiri kuwa uumlungu ni kama zahabu, au shaba, au magwe, sanamu yachongwa kwa ustadi na mawazo ga wandu. ³⁰ Kwa huwo, Mlungu wanyamakirie nyakati rija ra ujinga, ela idana adaamuru wandu wose kila andu wapate kutubu. ³¹ Ihi ni kwa sababu wawika ituku ajikundi kuhukumu dunia kwa haki kwa mundu ambae wamsague. Mlungu wafunyie uhakika gwa mundu uyu kwa kila mundu aja akimfufua kufuma kwa wafu. ³² Na wandu wa Athene kusikira habari ra kufufuliwa kwa wafu, baadhi yawe wakamdhihaki Paulo, ila wamwi wakadeda "Dikusikiria sena kwa habari ra ilago iji" ³³ Baada ya aho, Paulo akawasiga. ³⁴ Ela baadhi ya wandu waungane nae wakaamini, akiwemo Dionisio mwareopago, na muka awangwaga Damari na wamwi andu kumweri nawo.