¹ Kurginsiku giyo, omuntungi omukuru Augusto, "Yaara girirya ega, abhantu bhya ku bhutungi bhwaye, bhagya okong'orwa. ² Okung'orwa ruyo kwaaringa kwa kwamba, kwaakoreka eribhaga rinu kurenio yaaringa omuntungi wa ekyaro kya Siria. ³ Ego, abhantu bhonsego bhakagya kira omuntu mu mugi gwa oruganda rwabho. ⁴ Yusufu onse akarwa mumugi gwa Nazareti, mukyaro kya Galilaya. Akariina okugya mumugi gwa Bethlehemu, mukyaro kya Yudea. Bethlehemu ngo gwaaringa omugi gwa omukama Daudi, na Yusufu yaaringa wa oruganda rwa Daudi. ⁵ Yusufu akagya okwing'ora hamwi na Mariamu, unu yaaringa orombeeri obhuko. Eribhaga riyo, Mariamu yaaringa na enda. ⁶ Hanu bhaahika eyo, okwibhura kwaye kukahika. ⁷ Akeebhura omwana wa ekisaaja omutangi, munyumba ya egintugo. Akamukundikirya ameenda ga ekyana, akamurarya mwitubha rya okurisya mo egintugo. Yeebhurira muyo, kwa okubha bhanyoora omweya gwa okurara, muyumba gya abhageni. ⁸ Bhaaringa ho abhariisya bharaangari egintugo gyabho kukibhara obhutiku. ⁹ Rumwi ego, bhakarwirwa na malaika umwi, endingasi ya omukuru Waryubha ekabhamirikira mbara gyonsego, bhakabha na enkubhi enene bhukong'u. ¹⁰ Malaika uyo akabhakeerya ega, "mutige okwobhoha, mbareeteeri ering'ana erijomu rinu rirajomera abhantu bhonsego. ¹¹ Reero inu, mumugi gwa Daudi, yeebhwirwe omutuurya weenyu. Omutuurya uyo ng'o omukuru, kweki ng'o Kristu omwene. ¹² Ekimanyiriryo kya okworo kya gayo ni ega, mwakanyoore omwana ekijaare araribhwe muritubha rya okurisiirya egintugo, akundikiribhwe emyenda gya ekyana." ¹³ Rumwi ego, bhakaaja ebhiku na ebhiku bhya bha malaika okurwa murwire, bhakabha bhara mukumya Waryubha ega, ¹⁴ Waryubha wa murwire akumibhwe! Na mukyaro, omurembe gubhe ku abhantu bhanu arajomererwa nabho.'' ¹⁵ Bhama malaika bhayo hanu bhaamara, bhakahinda murwire mbe, abhariisya bhakagamba ega, Tugende mumugi gwa Bethlehemu, turore ganu gatukiri eyo, kya ego omukuru Waryubha atukeererye. ¹⁶ Bhakagya bhwangu. Hanu bhaahika, bhakanyoora Mariamu na Yusufu, na omwana ekijaare areeri mwitubha. ¹⁷ Hanu bhaamara okumurora omwana uyo, bhakaraarika ku abhantu amang'ana gonsego ganu malaika abhakeererye eguru yaaye. ¹⁸ Bhonsego bhanu bhweegwa amang'ana ganu bhakeeribhwa na abhariisya, bhakaruguura bhukong'u. ¹⁹ Mariamu akagabhiikanga gayo gonsego mumutima gwaye, akabha arageetegerera. ²⁰ Abhariisya bhayo bhahahunhuha, enu bharamukumya Waryubha, hu gonsego ganu bheegwa na okugaroka. Kya ego bhurya bhakeeri bhwa na malaika, ni go gonsego gaahoreka. ²¹ Omwana uyo, hanu yaahikya orusiKu rwa munane, bhakamusaara, bhakamutoga Yesu. Riyo ndyo eriina rinu malaika yaaringa amariri okumuhaana, eribhaga ng'ina waabho yaaringa akyari okugega enda. ²² Yusufu na Mariamu bhakamara eginsiku gya ohuraamwa kwabho, kya ego yeenderwanga mumaragiriryo ga Musa. Nho, bhakahira Yesu mumugi gwa Yerusalemu, naho bhamutuure embere ya omukuru Waryubha. ²³ Bhaahora ego, kya ego yaang'orwa mumaragiriryo ga omukuru Waryubha ega, omwana omutangi wa ekisaaja, yaahurwe okubha embere ya omukuru Waryubha. ²⁴ Hamwi na gayo, bheendanga bhamurusirye ekimwenso kya ego yaang'orwa mumaragiriryo ga omukuru Waryubha ega, Yeenderwanga bharusye ebhiguuti bhibhiri kasi amaana gabhiri ga ekiguti.'' ²⁵ Yaaringa ho omuntu umwi Yerusalemu hayo, eriina ryaye Simeoni, yaaringa omuntu wa obhuheene, mwitegereri ku Waryubha. Yaaganyiriranga okurora okutuuribhwa kwa Israeli, kweki omutima omurabhu gwa Waryubha gwaringa hamwi nawe. ²⁶ Omutima omurabhu gwa Waryubha gwaaringa gumukeererye ega, atarikwa akyari okurora Kristu wa omukuru Waryubha. ²⁷ Abheebhuri bha Yesu hanu bhaamuhira murisyengerero erikuru rya Waryubha, bhahore kya ego bhaaragirisibhwa na amaragiri ryo ga Waryubha Simeoni wonse, omutima omuragwa Waryubha guhamworoke ererya ega, asohe muyo. ²⁸ Akamutuurya Mariamu omwana enu aramukumya Waryubha ega. ²⁹ "Omukuru, ndasabha unyi kiririrye nkwe na omurembe, kwa okubha naruuji endago yaaho kya ego waaandaga oni omukori wa emirimu waaho. ³⁰ Kweki, niroreeri obhutuurya bhunu oreteeri, ³¹ bhunu waseemerye naho bhuturuke ku abhantu bhonsego. ³² Obhutuurya bhuyo bhuyo ni endingasi ya okworokya enjira yaaho; ku abhantu bhanu bhataringi Abhayahudi kora abhantu bhaaho bha Israeli bhonsego bharitogonibhwa." ³³ Amang'ana ganu Simeoni yaagamba eguru ya omwana uyo, gakaruguurya abheebhuri bhaaye. ³⁴ Hayo, Simeoni akabhanonka, akamukeerya Mariamu, ng'ina waabho omwana uyo ega, omwana unu, asorerwe na Waryubha okusikya Abhaisraeli abhaaru na okutuurya abhandi Abhaaru. Aribha ekimanyiriryo kya Waryubha, kinu kiryangwa na abhantu. ³⁵ Abhantu bhayo, amang'ana ganu geebhisanga munkoro gyabho, garitubhuka kubhurabhu. Uuwe wonse oriigwa obhururu bhokong'u orisha kya unu obhitirwe na omuhyu omoogi. ³⁶ Yaaringaho omurooti umwi omukungu bhukong'u, eriina ryaye yaabhirikirwanga Ana, muhara wa Fanueli, wa oruganda rwa Asheri. Yeekara emyaka muhungati egyene ego na omusaaja waaye, okurwa kya ego yaatetwa, omusaaja waaye ahakwa. ³⁷ Akatigara omusino, akabha arasabha murisyengerero erikuru rya Waryubha, omubhasu na obhutiku. Ku ribhaga rya okusabha yeeyimanga ebhyakurya. Hanu Yesu yaareetwa murisyengerero erikuru rya Waryubha, Ana uyo yaaringa ahikirye emyaka mirongo munane na ena. ³⁸ Eribhaga riyo riyo, Ana akeeyorokya, akaamba okumukumya Waryubha, akaraarika amang'ana ga omwana uyo, ku abhantu bhonsego bhanu bhaaganyiriranga Waryubha atuurye omugi gwa Yerusalemu. ³⁹ Yusufu na Mariamu, hanu bhaamara okukora gonse ego ganu amaragiriryo ga omukuru Waryubha geendanga, bhakahunjuka owabho mumugi gwa Nazareti, mukyaro kya Galilaya. ⁴⁰ Omwana akakiina, akabha na eginguru ekeejuribhwa egintungwa na yaaringa aranonkwa na Waryubha. ⁴¹ Abheebhuri bhaaye, bhaariinanga okugya mumugi gwa Yerusalemu kira omwaka, munyangi ya epasaka. ⁴² Yesu hanu yaahika emyaka ekumi na ebhiri bhakagya nawe munyangi, kuring'ana na ekimiira kyabho. ⁴³ Eginsiku gya enyangi hanu gyaabhwa, abheebhuri bhaaye bhakahunjuku iika. Nawa, weeki akatigara Yerusalemu. Abheebhuri bhaaye bhataamanya ego. ⁴⁴ Kwa okubha bhaamanyanga ega, aringi hamwi na abharihyabho bhanu bhaahindanga iiha hamwi. Hanu orusiku rumwi rwaahwa bira okumurora, abheebhuri bhaaye bhakaamba okumutuna ku abhahiiri bhaabho na abhasaani bhaabho. ⁴⁵ Hanu yaabhabhura bhakahunjuka Yerusalemu, naho bhamutuna eyo. ⁴⁶ Orusiku rwa kasatu, bhakamunyoora murisyengerero erikuru rya Waryubha, yeekeri gati ya abheehigirya. Arabheetegerera na arabhabhuurya amang'ana. ⁴⁷ Abhantu bhosego bhanu bheegwa kya ego yaaringa aragamba, bhakaruguura bhuhong'u eguru ya obhumanyi bhwaye, na kya ego yaa kyukyanga. ⁴⁸ Abheebhuri bhaaye, hanu bhamurora, bhakaruguura bhukong'u haa! Ng'ina waabho ahamubhuurya ega, Uuuwe omwana waani, kwaki otukoreeri ego? oni na esewenyu twaaringa na obhobha bhukong'u, twaaringa turakutuna. ⁴⁹ Akakyukya ega kwaki mwaaringa murantuna? Mubhuheene mutamanyiri ega ndeenderwa munyumba ya Tata? ⁵⁰ Nawe eri kyukya riyo, abheebhuri bhaaye bhatarimanya. ⁵¹ Amahahiro gayo gaaja kuhwa, bhakahiringita okugya nawe iika waabho mumugi gwa Nazareti, akabha arabheegwa. gayo gonsego gaakoreka ng'ina waabho, akagabhiika munkoro yaaye. ⁵² Yesu akagendererya okukiina, akabha na egintungwa, akabha ang'ariiri Waryubha na abhantu.