¹ Paulo mfungwa wa Kwistu Yesu, nna ndugu Timoseo kwa Fiimoni, mkundwa mbuya yetu na mgosoa ndima hamwe naswi. ² Na kwa Afia wao yetu, na ka Allipasi asikai mwezwetu, na kwa kanisa dia dikintanado kaya hako. ³ Neema iwe kwenu amani iawayo kwa Muungu Tatietu na kwa Zumbe Yesu Kwistu. ⁴ Mda wose namtogoa Muungu natagusa mwe maombi yangu. ⁵ Nkitegeeza ukundiso na imani wenayo mwe Zumbe Yesu na kwa ajii ya waumini wose. ⁶ Naombeza kwa ushaika wa imani yenu iwe na ugosozi mwe ujuzi wa kia mbui ntana yeumo umo mweetu na Kwistu. ⁷ Kwa via nkiwa na nyemi na falaja kwaajii ya ukundiso wako kwa via mioyo ya waumini ne ikahozwa ni wewe , ndugu. ⁸ Savyo ingalawa una ujasii wose mwe Kwistu kukuamlisha wewe kugosoa yada adahayo kugosoa. ⁹ Iya kwaajii ya ukundiso badii yakwe nakuagiia - mimi, Paulo mntu mgima na isasa ni mfungwa kwaajii ya Kwistu Yesu. ¹⁰ Nakuagiia kuhusu mwanangu Onesmo nekumvyaae mwe vifuungo vyangu. ¹¹ Kwa kua auo bosi nkekuwa yedi iya ivi sasa ni yedi kwako wewe na mimi. ¹² Nkimtuma yeye ambae ni ya moyo wangu hasa kuuya kwako. ¹³ Ne nkafaigwa tisigae hamwe nami, ili amtumikie badii yako nendaho niwe kifungoni kwa mbui ya injili. ¹⁴ Iya nchekukunda kugosoa mbui yoyose isa pasi kuwa na uhosa yako. Nkigosoa ivi ili kua mbui yoyose ntana yesekugosoka kwa nkikukungumiza iya kwaajii ya kukunda mwenye kudigosoa. ¹⁵ Majia nemana nkako hamwe nawe kwa mda ne iwa ivyo ili muwe hamwe kae. ¹⁶ Ili lwa asekua mtumwa bali iya ebae zaidi ya mtumwa, enga ndugu mkundwa, hasa kwangu na zaidi sana kwako mwe mwii na mwe Zumbe. ¹⁷ Na ivyo ati wanidweea mimi mshiika mhokee enga ukukundavyo kunihokea mimi. ¹⁸ Iya ati kubananga mbui yoyose au wamtigia kintu chochose, ntigia mimi. ¹⁹ Mimi Paulo naandika kwa mkono wangu mwenye; mi nndanikoihe gombeka kwako ati nakotigia maisha yako hesa. ²⁰ Naamu ndugu, eka nipate nyemi ya Zumbe kuawiia kwako: nitamiwe mwe moyo wangu mwe Kwistu. ²¹ Nee nawa na imani kuhusu uttii wako, nakwandikia niamanya kua wenda ugosoe zaidi via nikuombezavyo. ²² ukati uo uo gosoa chumba cha wageni kwaajii yangu, natumaini kwembokea maombi yako nndanikwembokee ivi hehi. ²³ Epafla, mfungwa mwenzangu mwe Kwistu Yesu nakuugusa. ²⁴ Na via agosoavyo mako, Alistaiko, dema, Luka, Wagosozi wa ndima hamwe na mimi. ²⁵ Neema ya Zumbe Yesu Kwistu yekae hamwe na Loho yako. Amina.