¹ Nee watoza ushuu wose na watuhu wanao zambi weza kwa Zumbe Yesu na kumtegeeza na wagonda, wakang'ung'uzika wakamba, ² 'Mafalisayo 'Muntu uyu akaibisha wenao zambi nahodu ada nao.'' ³ Zumbe Yesu nee atambaisa mfano unu kwao akamba ⁴ ''Nndai mwenu ati ana ngoto mia mwenga na akaguwa ni yumwe nkana awabade wada lisaini na kenda kwe mani enda akamwondeze yuda mwekwaga mpaka amuone? ⁵ Nae akabinda kumpata amgea mwe mawega kwa kinyemi. ⁶ Akabua nyumbai etanga mbuyaze na jilani zakwe awamba tesekee hamwe kwa ajii nkimpata ngoto yangu mwekua agie.' ⁷ Nanyambo ivyo ivyo kanda kuwe na kinyemi mbinguni kwa ajii ya mwenye zambi msosoa, zaidi ya wenao haki tisaini na kenda wesaokukunda kusosoa. ⁸ Hambu kuna mvyee yani mwenye saafu kumi za feza akagiwa ni wenga nkana awashe taa na kuhangia nyumba akahondeza kwa nguvu mpaka ndiho aione? ⁹ Naho akabinda kuipata etanga mbuyaze na jilani zakwe akawamba titamwe hamwe maana nkupata vituhu hea yangu nekwazayo. ¹⁰ Savyo nawamba kuna kinyemi mbele ya malaika ya Muungu kwa ajii ya mwenye zambi yumwe msosoa.'' ¹¹ Naho Zumbe Yesu akamba muntu yumwe nee ana wana waidi, ¹² yuda mdodo akamwamba yayi yakwe. Tate nenka sehemu ya mai yangu initaayo kuipa. Nee azipanga gati gati yao. ¹³ Nkayokwenda ngoka yuda mdodo akadoa hesa yakwe yose akahita si ya hae na ekubuaho uko nee atapanya hea zakwe akagua vintu hata esavyo na mbui navyo na kutapanya hea zakwe kwa ubwanga. ¹⁴ Naye ekubindaho kuvitapanya vyose saa nkuu ikengia mwe si ida nee avoka kuhaha kwa uundacho. ¹⁵ Akaita ekenda kuvoka kuonda ndima kwe yumwe ya mwenyezi ya si ida nae akamwenga tanga kwakwe akaise nguuwe. ¹⁶ Nee atamami egute kwa makoa wadogo nguuwe kwa ajii nkakuna muntu mwekumwenka kintu chochose cha kuda. ¹⁷ Iya yuda mwana mdodo akaafya mwe moyo wakwe nee amba, ''Ni wandima wangahi wa tati wana nkande ya kutosha iya aha nafa saa! ¹⁸ Nnda nihauke nuite kwa tati nikamwambe, ''Tate nkihea mbinguni na he meso yako. ¹⁹ Naho wala nkifaa kwetangwa mwanao vituhu nitenda innga awo wandima wako.'' ²⁰ Nee ekwendaho kuhauka akaita kwa tati yakwe akaawiia kwa hae tati yakwe nee amuona kwa hae nee amfua mbazi akamnguukia akamuumbatia na kumbusu. ²¹ Yuda mwana nee amwamba, ''Tate nkihea mwe mbengu na mbele ya meso yako nkifaa kwetangwa mwanao.' ²² YUda tati ya muntu akamwamba wada wandima wakwe, ''Kanyani kueta vazi tana, mumvike, mhambeni na npete mwe vyaa na viatu mwe miundi. ²³ Mkaheze mweteni ndama yuda mwekunona mkamchinje tide na titamwe. ²⁴ Kwa ajii mwanangu nee kafa ivi aha kauga moyo nee kaoga nae kaoneka nee wavoka kweseteea. ²⁵ Yuda mwanae mkuu nee kaite tanga ekuaho akeza ekwendaho kubua hahi na nyumbai akawa atengeeza sauti za mawia na misizigo. ²⁶ Aketanga mndima yumwe mwe wandima akamuuza mbui izi maana yakwe ni mbwai? ²⁷ Yuda mndima akamtambaisa, ''Mvunao keza na tati yako kamchinjia ndama mwekunona kwa ajii kagotoka npeho.' ²⁸ Mwana mkuu nee akimwa akaemea kwengia nyumbai na tati yakwe akaawa chongoi akamhembeeza. ²⁹ Mia nee amtambaisa tati yakwe amwamba, ''Kana mie nkikugosoea myaka mingi wala nkizati kukukosea mwe andi zako iya nkuzati kunenka mwana mbuzi ili nidahe kutamwa na wambuya wangu. ³⁰ Mia ekwezaho uyu mwanao mwekusizigia mai yako yose hamwe na wakinga kumchinjia ndama mwekunona. ³¹ Tati yakwe akamwamba, ''Mwanangu wee uhamwe na mimi misi yose na vyose nenavyo ni vyako. ³² Iya nee ni vyedi kwetu tikatenda kinyemi na kutamwa hamwe uyu nduguyo nee kafa ivi aha kauya moyo nee kaga ivi aha kavumbuka.''