¹ Mira we teta vetongana na viteto vya kweri. ² Vandu vazima vakete kiringanyo, shima, busara, vena kiugho, veelile na lukundo na he kugurumija. ³ Huvo huvo vache vazimaa veendwa genda kuvonyesha vovenye savala vekuheshimu, na vasioke vakutetana. kangi vasioke vatumwa va mawa. ⁴ Veenda kuvafundisha ala eedi hesa kuvaandaa vabora kwa busara hesa kuvakunda vome vavo na vana vavo. ⁵ Kivenda mvafundishe vakete busara, vaele vatunze nenzo nyumba javo, navasikije vome vavo venye. Kivaenda kuhira vyose ivo hesa kiteto cha Mrungu kisirarwe. ⁶ Hena vundu huvo huvo, Muvagere ngoro va mbwange va kiume vakete busara. ⁷ Hena nzia jose kuvikeni venye ufanyanyo hendima yedi; na mwekifundisha, vonyesheni okeni nendo na shima. ⁸ Gayeni vindu vyena nguju na vesina dothari, iti wowose esikunda agerwe soni ambu esina vuvivi vywa kuteta wanga yetu. ⁹ Varetumwa na vava sikije vafumw vavo hena kila kindu. Veendwa kuvaizihija na isi kukanana navo. ¹⁰ Vesiendwa kuiva. Badala yakwe, veendwa kuvonyesha kiugho chose chedi iti hena nzia jose vapambe mafundisho etu emrota Mrungu mkija wetu. ¹¹ Heicho mbonea ya Mrungu ya voneka hevandu vose. Itufundisha kusua vindu esivya kimrungu na mighesho ya isanga. ¹² Itufundisha kuika kwa busara, na kwaidi, na hena nzia ya kimrungu he kigheri iki. ¹³ Twekienda ikuji iwena lute lwedi na kuvonekana kuzera kwa Mrungu weu mbaha na kukija kwetu. ¹⁴ Yesu ekungolie mwenye he mburi yetu iti tukombwelwe kufuma hekukondika na kuosha vedi, kwa mburi yakwe, vandu vetengiwe vena gwina ya kuronga ndima yedi. ¹⁵ Atete na kusisitiza vindu hivo. boha kwa mamlaka. Usikunde mndu yayose akubere.