1

¹ Dis bout da good news uh Jesus Christ, da Son uh God. ² Isaiah, da prophet, talk bout dis good news when he say, "Listen ta me! I senin' someone who ga go ahead uh you. He ga make da people ready ta welcome you. ³ He ga be tellin' people in da wilderness, "Get ready ta welcome da Lord." ⁴ John was in da wilderness baptizin' people an' tellin' dem ta be sorry fa dey sin so God cud fagive dem.

⁵ A whole buncha people from Judea an' Jerusalem gone out ta hear John talk. A lot uh dem tell John dey sins, an' he baptize dem in da Jordan River. ⁶ John was wearin' a camel hair coat an' a ledda belt roun' he wais'. He eat locust an' wild honey. ⁷ He was preachin' an' say, "Someone ga come who greata dan me. I een good enough to ben' down an' loosen he sandals. ⁸ I baptize yall wit wata, but he ga baptize yall wit da Holy Spirit."

⁹ In dem days, Jesus come from Nazareth in Galilee an' gone ta John. John baptize Jesus in da River Jordan. ¹⁰ Soon afta Jesus come up from da water, he see heaven open up an' da Spirit come on him like it was a dove. ¹¹ God say from heaven, "You is my Son an' I really love you. I proud uh you."

¹² Den da Spirit make Jesus go in da wilderness. ¹³ He was dere for forty days, an' Satan was tempin' him. Dere was wild animals dere an' angels was takin' care uh Jesus.

¹⁴ Afta John get put in jail, Jesus gone ta Galilee preachin' da gospel. ¹⁵ He was sayin', "Da time finally come. God ga show people dat He in charge. Repent an' believe da gospel."

¹⁶ When Jesus was walkin' by da Sea uh Galilee, he see Simon an' he brudda, Andrew, trowin' dey net in da sea ta catch fish ta sell. ¹⁷ Jesus tell dem, "Just like how you catchin' fish, I ga teach ya ta catch people". ¹⁸ Right away, dey leave da nets an' follow Jesus. ¹⁹ Jesus soon meet up wid two udda brothers, James an' John, Zebedee sons; dey was fixin' dey net in a boat. ²⁰ When Jesus see dem, He tell dem ta come wit Him. Dey leave dey fadda, Zebedee, wit da workas in da boat an' gone wit Jesus.

²¹ Den dey come ta Capernaum an' Jesus gone in da synagogue ta teach on da Sabbath. ²² Da people was really shock at how he was teachin' cause He was teachin' like someone who have da right ta teach an' not like how da scribes teach.

²³ Right den, a man in dey synagogue who had demons ²⁴ shout, "Wat you wan wit us, Jesus uh Nazareth? You come to destroy us, aye? I know you. You is da Holy One from God". ²⁵ Jesus rebuke da demon an' say, "Shut up an' get out from him!" ²⁶ Den da demon trow da man down an' was shoutin' an' comin' out da man at da same time.

²⁷ All uh da people was in shock. Dey start aksin' each udda, "Well, what is dis? He gee a new teachin' an' he speakin' wit autority. Even da demons do what he say." ²⁸ Da news 'bout Jesus spread errywhere in Galilee.

²⁹ Afta Jesus come from da synagogue, dey gone in Simon an' Andrew house wit James an' John. ³⁰ Simon mudda-in-law was layin' down sick wit a fever, an' dey tell Jesus 'bout her. ³¹ Jesus gone ta her, take her han' an' help her ta get up. Right away da fever break an' she start ta serve dem.

³² Afta da sun gone down dat night, people bring a lot uh sick people an' people wit demons ta Jesus. ³³ It look like errybody in town was dere outside Simon house. ³⁴ Jesus heal a lot uh dem an' make da demons come outta people. Jesus een let da demon dem talk 'cause dey did know Jesus.

³⁵ Jesus get up early da next day when it was still dark. He lef' da house an' gone ta a place where nobody was so he cud pray. ³⁶ Simon dem gone lookin' fa Jesus. ³⁷ When dey fin' him, dey say, "Erryone lookin' fa you". ³⁸ Jesus say to dem, "Less go ta anudder place in da area ta preach. Das what I come fa."

³⁹ Jesus gone all ova Galilee an' was preachin' in da synagogue an' sendin' da demons outta people. ⁴⁰ A man wit leprosy come ta Jesus, kneel down in front uh Jesus an' say, "If you wan' to, you cud heal me". ⁴¹ Jesus did really feel fa da man an' say ta him, "Since I wan heal you, den you heal". ⁴² Right den, da man was heal from leprosy, an' he was clean.

⁴³ Jesus gee da man a hard warnin', ⁴⁴ "Don' tell no one what jus' happen ta you. But go ta da pries', an' do what Moses did say ta do as a testimony." ⁴⁵ But, da man gone tell errybody bout how Jesus heal him an' so Jesus wasn' free ta go in da town. He had to stay outside da town where nobody was livin'. But people still keep comin' ta him from all ova da area.