¹ Mo bakeken, yumi lego stat blong toktok blong kraes mo yumi muv i go long bigfala tingting. Letem yumi no mas go bak bakegen long ol stampa tingting be blong tanem tingting long ol wok we i no stret mo long feit wetem God. ² I nogat stampa tingting long tijing from baptaes, fasin blong putum han long hed blong man, mo long fasin blong kraes we hemi laef bakeken long ded, mo long fasin we bae God hemi jajem olgeta. ³ Bambae yumi mas mekem olsem sipos God hemi helpem yumi long hem. ⁴ Be hemi had blong olgeta man we oli harem save mesej blong kraes finis, mo oli luk save paoa blong God we I stap sevem ol man, mo we oli kasem Holy spirit finis, ⁵ Mo oli lanem gudfala toktok blong God finis mo paoa blong God we bae hemi wok long taem we i stap kam, ⁶ be afta oli lego belif blong olgeta, oli gobak bakeken. Hemia i had tumas blong mekem oli tanem bak tingting blong olgeta from ol sin blong olgeta. Hemia hemi olsem we oli stap nilim pikinini blong God long kros, mo oli mekem hemi sem long fes blong plante man. ⁷ From graon we i stap kasem gud wota long ren oltaem, bambae olgeta samting oli save gru gud long ples ia, mo bambae olgeta we oli wok long ples ia bambae oli harem gud. Hemia graon we god i stap blesem. ⁸ Be sipos graon ia i gat rop nil mo ol rabis wael rop i gru long hem, bambae i nogat wan gudfala yus blong graon ia. Mo long en blong hem, bambae oli bonem. ⁹ Be mifala i save gud we tingting blong mifala i no foldaon, se yufala i stap kasem ol samting we i gud more. Olgeta frens! Nating we mifala i stap toktok long yufala olsem, be God i stap sevem yufala. ¹⁰ From we God hemi stap mekem i stret nomo. Bambae hemi no save fogetem ol wok we yufala i mekem, mo we yufala i stap lavem hem mo yufala i stap mekem i gud long ol Holi man blong hem. ¹¹ Mifala i wantem tumas se wan wan long yufala i mas soem ol gufala fasin ia oltaem, nao bambae yufala i save kasem ol samting we yufala i wantem. ¹² Nao bambae yufala i no save kam slak, be bambae yufala i kam ol eksampol long olgeta we oli belif mo oli stap wet blong kasem ol promes blong God. ¹³ From taem we God i mekem promes blong hem long Abraham, Hemi yusum ol promes toktok long nem blong hem nomo, from i nogat wan narafala nem bakeken we i hae more long hem. ¹⁴ Hemi talem se, ''Bambae mi blesem yu mo bambae mi givim plante pikinini we bae oli kamaot bihaen long laen blong yu'' ¹⁵ Nao long fasin ia, Abraham hemi kasem promes ia we hemi bin stap weit from. ¹⁶ Sam man oli stap mekem toktok blong olgeta i strong long nem blong ol narafala we oli hae moa long olgeta. Nao long en blong raorao blong olgeta, bambae i no moa toktok bihaen. ¹⁷ Taem we God i mekem promes blong hem long ol man we bae oli kasem ol samting we hemi promesem, hemi wantem tingting blong olgeta i stap strong long hem. Nao hemi mekem promes ya i strong long nem blong hem nomo, from tok ia bae i no save jens. ¹⁸ Hemi mekem olsem from God i no save kiaman mo hemi no save jensim promes blong hem. From we yumi aot long fasin nogud, mo blong yumi gat wan strong tingting long ol promes we hemi mekem wetem yumi. ¹⁹ Yumi mekem olsem blong tingting blong yumi i save strong olsem wan anga we i fas gud, blong yumi kasem ol samting ia. ²⁰ Jisas i go finis long ples ia, we bambae yumi go long hem. Hemi kam hae pris blong yumi afta hae pris ia Melkisedek.