¹ Nao from samting ia, i gat fulap man we oli stap raon long yumi, we oli belif long God mo oli stap witnis blong hem.Yumi lego evri samting we oli stap holem taet yumi, mo ol samting we i stap mekem yumi fasfas long sin .Be i gud yumi stap obei long God, mo yumi ron long resis ya we i stap long fored blong yumi. ² Yumi mas lukluk Jisas oltaem,we hemi stamba blong bilif blong yumi mo hem nomo i stap mekem belif blong yumi i stret .Hemi luk save finis, we bambae hemi harem gud, bifo hemi go long kros,we bambae i mekem bigfala sem long hem, be hemi mekem nomo. Be naia hemi sidaon long raet han saed blong bigfala jea blong God finis. ³ So hemi gud blong yufala i stap tingbaot hem, long ol hadtaem ya we ol sina man oli stap mekem i nogud tumas long hem mo oli akensem hem. Nao bambae yufala i no save wari mo tingting blong yufala ino save foldaon. ⁴ I no gat wan long yufala yet we, long laef blong hem, hemi stap faet blong blokem sin we blad blong hem i ron from fait ia. ⁵ Mo ating yufala i foketem ol toktok finis blong leftemap tingting blong yufala, we God i tok long yufala olsem ol pikinini blong hem.Tok ya i talem se.''Pikinini blong mi, yu no mas ting nating long ol toktok blong mi we mi mekem blong stretem yu.Mo bambae yu no mas harem nogud taem we mi tok blong stretem yu. ⁶ From God istap tok blong stretem olgeta man we hemi lavem olgeta, mo hemi stap panisim olgeta tu we oli pikinini blong hem. ⁷ Ol samting we yumi stap kasem we oli stap mekem yumi harem nogud from, hemi ol samting blong stretem yumi. God istap mekem long yumi, olsem we hemi stap stretem ol pikinini blong hem. I nogat wan man samtaem we i no save stretem pikinini blong hem? ⁸ Be spos yufala ino wantem God blong i stretem yufala. Olsem ol narafala man we hemi stap stretem, hemia i min se yufala i no ol pikinini blong hem ,mo yufala i olsem man we i bon long papa mo mama blong hem be tufala i no mared. ⁹ Mo bakeken, yumi gat ol papa blong yumi long wol ya we oli wantem tijim yumi long stret fasin nomo blong mekem se bae yumi rispektem olgeta. Be olsem wanem, bae yumi no save obei long God papa we hemi stap long heven ,blong yumi save gat laef istap oltaem. ¹⁰ Ol papa blong yumi oli stap stretem yumi blong sot taem nomo taem oli ting se hemi stret blong oli mekem. Be God hemi stap mekem i gud long yumi taem we hemi stretem yumi, blong save kam Holi olsem God we hemi Holi. ¹¹ I nogat wan fasin blong stretem man we hemi no blong harem gud, be hemi blong mekem man i harem nogud. Be bihaen bambae fasin ya i mekem olgeta man oli save kasem gudfala fasin blong harem gud long laef blong olgeta. ¹² From samting ia yufala i mas leftemap han blong yufala we i hang i go antap ,mo yufala i mas mekem leg blong yufala we i slak i strong bakeken. ¹³ Yufala i mekem rod i stret blong yufala i wokbaot long hem.Nao leg blong yufala we i nogud bambae i save kam gud bakeken. ¹⁴ Oltaem yufala i mas gat pis long laef blong yufala wetem ol narafala man, mo yufala i mas wok had blong kam ol Holi man,from ol man nomo we oli Holi bae oli save luk God. ¹⁵ Yufala i lukaot gud blong wan long yufala i no lego glad had blong God we yufala istap trastem fastaem finis. Mo bambae yufala i no mas kam olsem wan rus we i gru mo i stap mekem trabol long ol man, we oli stap harem nogud from. ¹⁶ Blong bambae wan long yufala i no kam olsem man we i no save obei long God, mo i stap mekem fasin we i no stret, olsem Esau we hemi salem ol samting we hemi gat raet long hem from kakai blong wan dei nomo. ¹⁷ Mo yu save se bihaen, taem we hemi wantem blong karem ol blessing ia, be hemi no save kasem, from we hemi no bin gat janis blong tanem tingting blong hem from ol sin blong hem, even hemi stap krae bigwan. ¹⁸ Be yufala i no kam, olsem ol man Israel we oli kam, long bigfala hil we man isave tajem. Long bigfala hil ia i gat faea we i stap laet, mo i gat ples we i tudak we i kam kavremap ples, mo i gat wan bigfala win i stap blu. ¹⁹ Yufala i no kam long ples we i gat bigfala noes blong trambet long hem, long ples we God i stap toktok mo ol man we oli harem tok ia, oli stap talem strong se oli no moe wantem harem tok ia bakeken. ²⁰ From ol man Israel oli fraet tumas long wanem we God i talem, sapos wan animol we i kasem bigfala hil ia, yufala i mas stonem hem i ded. ²¹ Moses hemi fraet tumas taem hemi luk ol samting ia mo hemi talem se, ''mi mi fraet tumas, mo mi stap seksek''. ²² Be i gud, yufala i kam long hil ia Zion mo long taem we God ia we i laef i stap long hem. Jerusalem ia hemi stap long heven,hemia ples we fulap enjel oli stap wanples long hem, oli stap glad oltaem nomo. ²³ Yufala i kam wan ples wetem ol narafala man blong God, we nem blong olgeta i rejista finis long heven .Yufala ikam long God, we bambae i jajem olgeta man, mo yufala i kam join long spirit blong ol stret man we God i mekem oli kam stret man finis. ²⁴ Mo yufala i kam long Jisas, we hemi stanemap niufala promes blong God ia we i mekem wetem yumi, mo long blad ia blong kraes we i klin mo i stap tekemaot ol samting we blad blong Ebel istap tekemaot. ²⁵ Yufala i mas lukluk gud blong bambae yufala i no go agens long God we i stap toktok. Olgeta man we oli no harem tok blong God we ol man i stap talem blong wonem ia, oli no save ron we long God. Mo hao nao bae yumi save ron we long God we i stap long heven istap toktok long yumi. ²⁶ Tok blong hem i muvum wol ia, wan taem finis .Be naia hemi promes mo talem se , ''bae wan mo taem bakeken, bae hemi movum wol ya nomo, be bae hemi muvum heven tu.'' ²⁷ Tok ia we i talem se , ''wan mo taem,'' i minim se God bambae i karemaot olgeta samting we oli save muvmuv. Hemia ol samting we hemi createm, nao ol samting we oli no save muvmuv bae oli stap. ²⁸ Nao from samting ya, God i stap mekem yumi kam man blong hem, i gud yumi talem tankyu mo yumi wosipim hem mo rispectem hem. ²⁹ From we God blong yumi hemi olsem faea we i stap laet.