¹ So'k Paulus, hamba BaiPunopo'k ngan rasul Kristus Yesus, di'k ningutus demi iman nyo-nyo pumiliah BaiPunopo'k ngan kutau'k akan kuodu'k di'k memimpin kanu kusalehan ² gatn datn dopit pengharapan midiap kekal, di'k ninyanyikan seguatn pumulaan zaman oleh BaiPunopo'k di'k kai suah budusta. ³ Pada waktu-Ngi, Diapm jeh nyono'k firman-Ngi melalui pemberitaan di'k jeh nipucayakkan kanuku'k susuai ngan pumitok BaiPunopo'k, Juru Selamat yah. ⁴ Kanu Titus, nak di'k sah wah iman yah busama. ⁵ Nih alasan tia lah ku'k togatn mu'k no'k Kreta, yaitu gatn mu'k tau'k dopit kosik oniah di'k gik porlu ningatur ngan ngokat penatua no'k setiap kota, mah di'k ku'k posatn kanu mu'k. ⁶ Diapm haruslah nyo di'k kai bucela, bonih so'k nyik sau, pu'k nak-nak di'k pucayak, ngan kai ninuduh karena midiap di'k kai bumoral atau memberontak. ⁷ Sobab, seorang penilik jemaat haruslah seorang di'k kai bucela subagai punatalayanan BaiPunopo'k, kai somokng, kai copat nohuh, kai puobuak, kai anal budohuh, ngan kai serakah wah mogau ku'utokng. ⁸ Subalikngi, anal monyu'k tumpangan, mencintai oniah di'k baik, bijaksana, adel, saleh, ngan dopit menguasai diri. ⁹ Diapm bupigitn teguh kanu perkataan di'k dopit nipucayak, susuai ngan di'k jeh ningajarkan, sehingga diapm dopit minyu'k pungajar menurut pungajaran di'k baik ngan ngan hahuan nyo di'k ngelawatn. ¹⁰ Sobab, biatn obeh nyo di'k ngelawatn, anal ngomong pumulak, ngan nipu, khususngi datn di'k buasal so'k kelompok nyo busunat. ¹¹ Datn pantas ninitiap tukuakngi karena datn menyusahkan suluruh kuluarga ngan ngajar hal-hal di'k seharusngi kai datn ajarkan, di'k justru ponik hal di'k kongin. ¹² Salah satu so'k datn, yaitu nabi datn maih, nyono'k, ''Dasar nyo-nyo Kreta pulakar, mah binatakng buas di'k jahat, ngan pulahap di'k malas.'' ¹³ Kesaksian tia odu'k. Karena han, tegurlah datn ngan hiya gatn datn jodi sehat wah iman. ¹⁴ Yo'k ngolo dongeng-dongeng nyo Yahudi dan pihitah nyo-nyo di'k nulak kuodu'k. ¹⁵ Bagi di'k murni, sumua adalah murni. Namun, bagi datn di'k najis ngan kai pucayak, kadiah nyik pun di'k murni karena baik piker maupun oti nurani datn adalah najis. ¹⁶ Datn ngaku'k nginal BaiPunopo'k, tapi ngan pungodi datn nyangkal BaiPunopo'k. Datn han menjijikkan, kai taat, ngan kaliah kodi oniah pun di'k baik.