¹ لە پۆڵسەوە، کە لە پێناو یەشوای مەسیحدا بەندکراوە، وە لە تیمۆساوسی برامانەوە، بۆ فلیمۆنی خۆشەویست و هاوبەشمان لە کارکردن، ² بۆ خوشکە ئەپفییە، و ئەرخیپۆس کە هاوڕێمانە لە سەربازیدا، بۆ ئەو کڵێسایەی کە لە ماڵەکەتدایە. ³ با ئاشتی و بەخشش لە خودای باوکمان و پەروەردگارمان یەشوای مەسیح بۆئێوە بێت! ⁴ هەمیشە سوپاسی خودای خۆم دەکەم، کە بەردەوام لە نزاکانمدا یادت دەکەمەوە، ⁵ چونکە خۆشەویستی و دڵسۆزی تۆم بیستووە بۆ یەشوای پەروەردگار، و هەروەها بۆ هەموو پیرۆزکراوان، ⁶ داواکارین کە بەشداریکردنتان لە باوەڕدا لەگەڵ ئێمە کاریگەر بێت، بۆ ئەوەی بە تەواوی درک بە هەموو چاکەکارییەکانی ناو ئێمە بکەن لە پێناو مەسیحدا. ⁷ ئەی برا، بۆمن شادیەکی زۆربوو وە هاندرام، و بەهۆی باشی تۆوە سۆزی پیرۆزکراوان ژیایەوە! ⁸ بۆیە، هەرچەندە من مافی تەواوم هەیە لە مەسیحدا فەرمانت پێبدەم ئەوەی پێویستە بیکەیت، ⁹ بەڵام، لەبەر ڕێزی خۆشەویستی، هەڵمبژارد داواکارییەک پێشکەشی تۆ بکەم، منی پۆڵسی پیر و ئێستا بەندکراو لە پێناو یەشوای مەسیح. ¹⁰ منی کۆت و بەندکراو لێت دەپاڕێمەوە لەپێناو منداڵەکەم ئۆنسیمۆسی کوڕم، کاتێ کە لە زیندان بووم لە دایک بووە، ¹¹ ئەوەی پێشتر بۆ تۆ بێ کەڵک بوو، بەڵام ئێستا کەڵکی بۆ من و بۆ تۆش هەیە. ¹² ئەو بۆلات دەنێرمەوە، وەک ئەوەی پارچەیەک لە جگەرم بێت! ¹³ پێمخۆش بوو لەلای خۆم بیهێڵمەوە، تاکو لە جیاتی تۆ خزمەتم بکات، لە کۆت وبەندی مزگێنیەکەدا. ¹⁴ بەڵام نەمویست بێ ڕەزامەندی، تۆهیچ کارێک بکەم، تاکو ئەو چاکەیەت بەڕەزامەندی بێت نەک بە ناچاری. ¹⁵ لەوانەیە لەبەر ئەمە بووبێت بۆ ماوەیەکی کورت لێت دوورکەوتەوە: تاکو بۆ هەتاهەتایە ببێتەوە هی خۆت، ¹⁶ ئیتر کۆیلە نییە، بەڵکو چاکترە لە کۆیلە، برایەکی خۆشەویستە، بە تایبەتی بۆ من، ئاخۆ چەندە زیاتر دەبێت بۆ تۆ، چ لەجەستە و چ لە پەروەردگاردا؟ ¹⁷ ئەگەر من بە هاوبەشی خۆت دەزانی، وەک ئەوەی من بم وەریبگرە. ¹⁸ ئەگەر بە هەر شێوەیەک ستەمی لێکردوویت، یان بە شتێک قەرزداری تۆیە، کەواتە ئەوە بە قەرزێک بزانە لە سەر من. ¹⁹ ئەوەتا من پۆڵس بە دەست نووسی خۆم ئەمەم نووسیوە: من ئەتدەمەوە. نامەوێ بیرت بهێنمەوە کە تۆ خۆت قەرزداری منی. ²⁰ بەڵێ، ئەی برا، داوات لێدەکەم بەم بەخششە لە پەروەردگاردا، سوودمەندم بکەیت: سۆزەکانم لە مەسیحدا بژیێنەوە ²¹ بەو پێیەی متمانەم بە گوێڕایەڵی تۆ هەبوو، بۆیە ئەم نامەیەم بۆت نووسی، دەمزانی تۆش لەمە زیاتر دەکەیت کە من داوای دەکەم. ²² جگە لەمەش شوێنێکم بۆ ئامادە بکە تا لەگەڵتان بمێنمەوە، چونکە هیوادارم بە ئێوە شاد ببمەوە وەک وەڵامێک بۆ نزاکانتان. ²³ ئیپافراس، هاوزیندانم لە یەشوای مەسیحدا، سڵاوت لێدەکات. ²⁴ هەروەها مارکۆس، و ئەریستارخۆس، و دیماس، و لۆکاس، کە هاوڕێمن لەکارکردن. ²⁵ با بەخششی یەشوای مەسیحی پەروەردگار لەگەڵ گیانتان بێت!