¹ لە یۆخەنای پیرەوە، بۆ ئەو خاتوونەی کە خودا هەڵیبژاردووە، و منداڵەکانی کە بەڕاستی هەموویانم خۆشدەوێت، نە تەنیا تاکە کەس نیم کە خۆشم دەوێن، بەڵکو هەمووئەوانەش کە ڕاستی دەناسن. ² بە پێی ئەو ڕاستییەی لە دڵماندا نیشتەجێیە، وهەتاهەتایە لەگەڵمان دەبێت، ³ با بەخشش و میهرەبانی و ئاشتیمان، لە خودای باوک و پەروەردگار یەشوای مەسیحی کوڕی باوکەوە، بە ڕاستی و خۆشەویستییەوە لەگەڵت بێت. ⁴ زۆر دڵخۆش بووم کاتێک هەندێک لە منداڵەکانتم بینی کە بەپێی ڕاستی دەڕۆن، بەپێی ئەوەی باوک رایسپاردووین. ⁵ ئێستا، ئەی خاتوون، داوات لێ دەکەم، و بە ڕاسپاردەیەکی نوێی مەزانە. بەڵام ئەمە ئەو ڕاسپاردەیە کە لە سەرەتاوە هەمانبووە: یەکترمان خۆش بوێت. ⁶ ئا ئەمەیە خۆشەویستییەکە: بەپێی ڕاسپاردەکانی ئەو بڕۆن. ڕاسپاردەکە ئەمەیە، هەروەک لە سەرەتاوە بیستووتانە: کە بە خۆشەویستی هەڵسوکەوت بکەن! ⁷ جیهان پڕ بووە لە چەواشەکار کە نازانن یەشوای مەسیح بە جەستەیەکی مرۆڤانەوە هاتۆتە سەر زەوی. ئەمانە گیانی چەواشەکار و دژە مەسیحن! ⁸ بۆیە گرنگی بە خۆتان بدەن، بۆ ئەوەی ئەو هەوڵەی ئێمە لە رێگای ئێوە داومانە بەفیڕۆ نەچێت، بەڵکو پاداشتی تەواو وەربگرن. ⁹ چونکە هەرکەسێک لە فێرکاری مەسیح بەردەوام نەبێت و سەرپێچی بکات، بەشی لە خودادا نییە. بەڵام هەرکەسێک لەم فێرکردنە بەردەوام بێت، هەم باوک و هەم کوڕی هەیە. ¹⁰ ئەگەر کەسێک بەبێ ئەم فێرکاریە هاتە لاتان، لە ماڵەکەتان وەریمەگرن و سڵاوی لێ مەکەن، ¹¹ چونکە هەرکەسێک سڵاوی لێ بکات، هاوبەشە لە کارە خراپەکانیدا. ​ ¹² زۆر شتم هەبوو بۆتان بنووسم بەڵام نامەوێت لێرە بە مرەکەب و کاغەز بینووسم. هیوادارم بۆخۆم سەردانتان بکەم و بتوانین ڕووبەڕوو قسە بکەین. تاکو تەواو دڵخۆش بین. ¹³ منداڵەکانی خوشکت کە خودا هەڵیبژاردوون سڵاوت لێدەکەن.