¹ Laituan kira nani, kasak lukpara spirit bânira, sakuna amân laki kaiks Dawan wina aula sapa, kan tasba na ailal Pal takan sa prapit kunin kira nani. ² Bahamna nahara tankam brima Dawan wina spirit ka ba, aisisa Jisas Krais ba upla natkara na tasbara, baha ba Dawan wina sa, ³ sakuna ani spirit ka uplika Jisas Krais ba tnayara suisa kaka Dawan wina apia. Baha sika Dawan mapara spiritka (anti krais spiritka), man nani walram aulasa, sakuna pât tasbara sa. ⁴ Man nani lika Dawan dukiasma, luhpi laituankira, pura luramsa bamna, sakuna man wal ba kau tara sa, baha nani tasbara uplika nani ba wal. ⁵ Witin nani ba lukras uplika, baha mihta, witin nani aisisaba tasba dukia ra baman an na tasba uplika ba mihta wan walras sa. ⁶ Yawan lika Dawan dukiasa, ya Dawan kaiki uplika ba wan walisa. Sakuna Dawan wina apia nani ba wan walras. Nahara wan tanka brisa ya spirit pain brisa, an spirit kunin kira wal ba. ⁷ Laituankira nani, kaisa latuan kaikaia pana pana, kan latuan laka ba lika Dawan wina sa, ya latuan laka briba aisubi takan Dawan wina, witin Dawan ba kaka ra sa. ⁸ Ani uplika latuan laka apu ba Dawan kakaira apia sa, kan latuan lakaba Dawan winasa. ⁹ Nahara Dawan latuanka laka va param wan marikan, blikan ai luhpia kumi man kan ba na tasbara, yawan ba raya kabia witib dukiara baman. ¹⁰ Nahara sika yawan tanka brisa, yawan mihta pas Dawan ra latuan kaikan apia, sakuna witin mihta pas, yawan ra blikan ai luhpia kumi man kan ba wan saurka dukiara. ¹¹ Laituankira nani, Dawan ba uba latuan wan kaikan, yawan sin pana pana latuan kaikaya sa. ¹² Upla kum sin kau, Dawan ba ai nakra wal kaikras. Sakuna latuan kaikbia kaka wan walkara, Dawan ba yawan walsa an ai latuanka laka ba aitani kat daukan kabia. ¹³ Nahara nu takisa yawan Dawan asla iwiba Dawan sin yawan asla ba ka yawan ra ai Spiritka Hulikira wan kansa. ¹⁴ Baku sin, yawan kaikan wan nakra ni an yawan witin witniska aisisa aisa ba ailuhpia blikan na tasba ra iwi uplika ba suaki sakaiya. ¹⁵ Bahamna uni uplika aisabia Jisas ba kasak Dawan luhpia sa wibia kaka, Dawan ba witin wal asla sa, witin sin Dawan wal asla. ¹⁶ Bahamna, yawan kasak lukisa Dawan ba latuan laka sa. Ani naha latuanka lakara iwiba kaka, Dawan wal iwisa, Dawan sin asla sa baha wal. ¹⁷ Naha mita, wapni daukansa ai latuanka laka yawan nani wal baku mika wan kupia auya pâh kaya, lâ daukaya yua balbia taim, yawan lika na tasbara na wina witin ba wal asla kabia. ¹⁸ Latuan lakara iwi ba lika sibrin apu sa, latuan laka aihwa ba mihta aut ra sakisa sibrin ba lika sin silakra baku sa, sakuna latuan laka ba mita diara sut wapni daukan sa. ¹⁹ Yawan latuan kaikisa, kan Dawan pas taura latuan wan kaikan. ²⁰ Upla kum wisa: "Dawanra latuan kaiksna", sakuna ai walkara watawi kaikisa kaka, baha lika kuninkira sa. Ani uplika ai muihni kaiki latuan kaikras kaka, Dawan ra latuan kaikbia apia, kan ai nakra kaikras Dawan ra. ²¹ Muihki nani, naha lakana yawan brisa Dawan wina: Yâ, Dawan ra latuan kaiki kaka, ai muihnira sin latuan kaikaya sa.