¹ Bhaara bhoonswe bharenge hanse iya urusiri oronene kya abhaghorwa bhabhaghere abhanene bhabho kya bhano bhasokirwe bhokong'u bharatunwa bhakore igho koore iriinda rya Waryobha na ameghyo ghaaye ghatakatokwa. ² Abhaghorwa bhano hana abhanene bhano bhakwikeerya tebhakabha nyenyeera he ko bhoora bho mbahiri. Bhaisyori bhabhakore bhuuya bhokong'u. Ko-okobha abhanene bhano bhakotooribhwa emeremo ghyaabho mbaikeerya na mbahanshirwe. Eghya na oraghani amang'ana ghano. ³ Nyoore omonto wonde areeghya abhanto ko kobhang'aina na aratigha agheto ghano ghakwikeeribhwa ngo amang'ana agha omonene weito Yeesu Kiristo, hano aranyoore tebhakwikeerya riragheeryo reno rekotangata ku-ubhuuya. ⁴ Omonto uyo arihema na tamanyire kyokyonse. Nkobhare omonto umutindi, ono ana sehaka ko amang'ana. Amang'ana ghayo nkoreeta ghare rihari, riihe, okobhehana, amaiteghero maghogho. ⁵ Na ubhutindi bhwa hake hake ko bhanto atamutamu nkurwa bhaare ko-bhoheene. Nkwiteghera bhare igha obhorabhu yo enshera iya okobha abhame. ⁶ Bhoono obhorabhu no okoterema ne horohoro enene. ⁷ Tu- twaishire na kyokyonse mukyaro. Tetoreghegha kyokyonswe kuurwa mukyaaro. ⁸ Nyakara twiiswe ni ibhyakorya na imyeenda. x ⁹ Bhoono bhayo bhkutuuna bhabhe no uhwaame bharaghwa momateemo. Bharaaghwa moobhokangi bhwaaru na oronamba oroghogho, na ekento kyokyonse keno kekokora abhanto bhasike mo obhosarya. ¹⁰ Ko-bhoora okohansha sehera nko ensemoka iya obhoghogho bhoonswe. Abhanto bhano bhkwighomba ghayo, bhatabhutwa haare na ubhukumya na bhaisamba abheene na okoreera kwaaru. ¹¹ Kose uwe omonto wa Waryobha, ng'osa amang'ana ghayo. Rondeerya obhoheene, obhorabhuu, obhohanshi, obhoremeerya na obhohaabu. ¹² Itana rihe iriya irya ubhukumya ghootera obhooru bhwa amakoora bhono wabherekeerwa. Nko bhoora waruusiri obhoheene ko abhanto abhimereeri bhaaru ko keera kyaarenga ikiya bhokong'u ¹³ Ndakokaanya kobhoroonge bhwa Waryobha ono yakora ebheento bhyoonswe bhebheeho na kobhoroonge bhwa Yeesu Kiristo ono yaghambire obhoheene ko Pontiyo Pilato. ¹⁴ Naghya amakaniyo ko obhooheene, wange kobhoha, kuhika ukwa omonene weito Yeesu Kiristo. ¹⁵ Waryoobha ariiyorokya ubhwesherrwa bhwaye ko enkagha endonge, Waryobha, Omong'oorwa singuru isyene, Omokama ono akotonga, Omonene ono akutangata. ¹⁶ Umwene aaho amakoora ghoonswe na ono akwikara kobhorabhu bhono bhotakohekeerwa. Monto tahohe ono aratore komomaha na monto tahohe ono aratoore kumusyoomeerya. Kowe nu ukwisokya na obhotora bhwa amakoora. Amina. ¹⁷ Abhateebhi abhhme abha mukyaaro keno bhatakaihema, bhatakaghanya ku ubhwaame, bhono bhotana bhoheene. Nyakara bhamwisenghe Waryobha ono akotohana ubhwaame bhoonswe bho obhoheene tushomeerwe nabho. ¹⁸ Obhateebhi bhakoore amaiiya, bhaamehe ko emereemo imiiya bhaabhe ahaani, na bhano bhakuruusya. ¹⁹ Ko- enshera iyo mbaritoore shinguru ko amang'ana ghano ghakusha bhatore koghoota obhoru. ²⁰ Timotheo, naghya keera Waryobha ywe tighana na amang'ana gha kwishunsha agha ekekangi na hekara isya ukwiyanga seeno ko-obhoroonga serabhere keerwa obhong'aini. ²¹ Abhanto bhaande bhararagha nniya amang'ana ghano. Na igho bharabhorwa ubhukumya omorembe ghobhe kuuwe.