¹ A lia na momo tenilia ina vanua o Sisaria,e yaca o Koniliasi ,ei turaganivalu ina mataivalu ni Itali. ² A momo du ina viqwaravi,qa dau qwravia vina sara na Kalou qaru lea vuniwere, a dau vaganira nai lavo vuara re vinatia,qa tam dau cegu na masutia na Kalou. ³ A lia na siga nai ka ciwa ni auwa, a dania vina sara tu ga ina lea tola a lia na agilosi ni Kalou ni yato vadodonu yati vua.A kwaya na agilosi vua," Koniliasi!" ⁴ A ga sara nia na agilosi o Koniasi ina mataku qa kwaya,"Na yava riki sokwe, Momo?" A vece vua na agilosi, "Na lem masu qa lem loloma vuara na dravudravua sa laka cake mai me wetai ei lia nai soro ina dau lei numi tu ga ie mata na Kalou. ⁵ Boto kwe mo vatalaru i sewa na tagawane ina koro levu i Jopa me ru mea mai i lia na tagwane e yaca o Saimoni i dau lei co i Vita. ⁶ E i nodoki no qa lia na dau cula taba ni manumanu e yaca o Saimoni,vakolo na lea were i bati ni matacawa. ⁷ Na gauna sa deidei lesu ka na agilosi a mai tata vua sa qei coviru na tamata dauviqaravi mai lea were o Koliniasi ,qa lia na sotia dau viqwaravi yalo du mai vuara na dau qwaravi koya. ⁸ Sa qei vecera o Koliniasi na kwa coko a yaco qa vatala tiru i Jopa. ⁹ Na siga taravia rautia no nai ka ono ni auwa, na ledra i yatoyato, ni ra sa vakolotia yati na koro levu ,a qei laka i dela ni were o Vita me lai masu. ¹⁰ A qei vuraki koya na matakani qa vinatia me kania i lia na kwa ,ia a ru si vatoko no a sewa na magiti a ru sewa na tamata ,a qei lai vagani alia na tola. ¹¹ A qei dania sa tadola na maliwa lala qa lia na mataqali rubo tenilia sa lutu civo mai ,a wetai na tiki ni sulu levu ome lutu civo mai vuravura ,ru teiteimata tu mai e tutu vava. ¹² I buto a vagani tu mai kwa na vimataqali manumanu va medra la ,na coko i kasi i dela ni vuravura ,qa ni ra na manumanu cavu i maliwa lala. ¹³ A qei tata mai a lia na domo i vua :"Dure i yata, Vita vamatera qo kani." ¹⁴ A qei kwaya o Vita ,"I lala riki, Momo Levu ;me wetai qu si tam` kania i lia na kwa i tam` savasava qa duka. ¹⁵ A qei tata lesu leqwa mai vua na domo sokwe i na karua ni gauna : "Na ka i sa vasavasavataki nia na Kalou,kua ni kwaya ni tam savasava ." ¹⁶ A yaco vakatolu coko na kwa kwe ;sa qai laka lewqa vasauri i yata na rubo magiti so kwe. ¹⁷ A si loma tarotaro ga no o Vita na i balebale ni tola a dania, gauna vata sokwe, o koru na tagwane a vatalara yati o Koliniasi aru sa dure tu i matamata, ni oti na ledru cacania na ledru calevu i were. ¹⁸ A ru sa qei coco meru cacani Saimoni, ko e yaca muni o Vita ei nodoki muni sokeni se i lala. ¹⁹ Ina gauna si vakasamataka nia no o Vita na tola sokwe, sa tata mai vua na Yalo Tabu qa kwaya, "ko kwe e i tolu na tamata iri vakadaniko no. ²⁰ Dure i yata, mo laka civo qaru kwe. Kua ni lomaloma rua na laka qa ru, o yau ga qu vatalaru ya". ²¹ A qei laka civo vuaru o Vita qa veceru, " O yau boto kwe ko ba vadania mai. Na yava oba lakataki mai?" ²² A ru qei kwaya," A lia na turaganivalu e yaca o Koliniasi, ei tamata yalo vina qa dau qwaravia na Kalou, qa re kwaya coko na Jiu ni tia tamata vina, a vece a lia na agilosi savasava ni Kalou me ba laka mai va iko mo laka yati i lea were, me lei rogo i lia na i tukutuku mai va iko". ²³ A suretiru o Vita me ru laka yati me ru lai no qai koya. Ina qwataqwata ni siga taravia a mata qa laka qaru, qa sewa muni nai tokani mai Jopa ²⁴ I na siga taravia aru sa yaco ya i Sisaria. A waciru no mai ka o Koniliasi; a vasoqoni ti koru no lea vuniwere qa ru na lea i lala vakolo sara ²⁵ I na gauna sara ga a rusu yati ka o Vita, a sotavi koya saraga ga o Koniliasi, a ruva civo i ra i e qeteqete ni lame vakarokoroko vua. ²⁶ A vukei koya i yata o Vita me dure, qa kwaya "Tu i yata! O yau qi tamata boto muni." ²⁷ Na gauna ru si vitatani no ka o Vita, a laka yati qa dania na bi ni tamata a re no tu muni. ²⁸ A qei kwaya vuara, "O ba kilatia vina du o vatikem ni tam donu vua i lia na Jiu me no visola se me no vimaliwai qa i lia ei teni matanitu. Ia na Kalou a sa vatakea rewa iva yau mequ kua ni telia teni ei lia na tamata me tam savasava qa duka. ²⁹ Ko i levu na leqi yau laka mai, qu tam lomalomarua ka ina lequ lei vakatala. Qi na cacani no yati na yava oba vinati yau no ka?" ³⁰ A qei kwaya o Koniliasi, "a va na siga sa yalobo i na auwa vata saraga kwe, qu masu no ina ika ciwa ni auwa mai lequ were, qu qei ligo, sa dure tu qu mata a lia na tamata qa serau vina tu lea i sulu". ³¹ A kwaya mai "Koniliasi, na lem masu sa rogo na Kalou, qa na lem loloma o dau vagani kora na dravudravua ei vivakananumi leqwa vua na Kalou baletiko. ³² Mo vatala ei lia i Jopa, qo lai dania ei lia na tamata e yaca o Saimoni ei dau lei co muni i Vita. E i nodoki ina lea were na dau cula taba ni manumanu e yaca o Saimoni ina bati ni ruwai. ³³ Koya sokwe qu vivakatala yati ka mo laka mai. O sa yalo vina du mo laka mai. Ko kwe, te sa no coko ie mata na Kalou, me te rogo muni na kwa coko a lai vece mai vua na Momo Levu mo mai kwaya". ³⁴ Sa qai dolavia o Vita e gusu qa kwaya, "E du sara, qi kilatia na Kalou e i tam dau vatatiki lea lewa ina lia boto na vanua. ³⁵ So kwe, ina vimatanitu coko o koya ga i qwaravi koya qa tara na kwa i dodonu ei na ciqomia o koya ³⁶ O ba kilatia vina nai tukutuku a vagani kora na Isireli, na kea tukuni na Kosiveli ni loloma baleti Jisu, o koya na leda Momo Levu coko. ³⁷ O vatikem o ba kilatia nai tuvatuva a yaco, ko a tara mai Jutia coko, taula mai Kaleli, ni oti na vavitaiso a kwaya o Joni; ³⁸ Nai tuvatuva baleti Jisu na koi Nasareci, na lea lumitia na Kalou na Yalo Tabu vata qa na kaikai. A laka vali me tara na kwa vina qa vacola ni kora coko na lei vakabobulataki tu vua na nitu, na Kalou a no vali qai koya. ³⁹ O keta te i vakadudu ni kwa coko a tara o Jisu, ina ledra vanua na Jiu qa mai Jerusalemi. A re vakamate ina lea i lili ina vunikai. ⁴⁰ Na Kalou ga e vakadure ni koya cake ina i katolu ni siga, qa vavunia na lea lei tolavi. ⁴¹ Tam ni kora coko na tamata, vuara ga na vadudu are sa sa lei digitaki rewa mai vua na Kalou va keta te kani qa te som qai koya ni oti na lea dure mai na mate. ⁴² A varoti keta me te kwaya yati vuara na tamata nio koya kwe a digi koya na Kalou me lewai kora na cola qa nira na mate. ⁴³ O koya ga a vavunia mera vadinadina na varovita, ni o kora ere vabautia ina sereki na ledra i valavala ca ina vukuni e yaca ⁴⁴ Ni si kwaya no o Vita na vi kwa kwe, a qei lutu civo mai na Yalo Tabu i vuara coko na varogo tu i lea i tukutuku. ⁴⁵ O kora coko na tamata koi teni ina vabautia-qao kora na laka mai qa Vita - are sa lei vakayadrati , baletia nai solisoli ni Yalo Tabu sa lei vagani muni vuara na matanitu teni. ⁴⁶ A re sa rogo i kora na matanitu teni kwe, ni ra tatataki tu a tenilia na tata qa re vakacaucau takinia na Kalou . A qei kwaya o Vita, ⁴⁷ "E i na lia ei na maqitaki na wai vuara kwe me re kua ka ni vavitaiso, o kora na tamata kwe are sa sovia na Yalo Tabu me wetai muni o keta?" ⁴⁸ Sa qei vakaroti ko ra me re vavitaiso ie yaca o Jisu Karisito. Are sa qei kerevi koya me no qara me vica leqwa na siga.