¹ Jadi en teakan heiy nikouw nu tou-tou kaya, mame’ mouw wo ma’aripouw witu em peme’itan laa tumoro nikouw! ² Eng kakaya’annu em bu’ulouw, wo e labungmu eng kinaanouw ne mo’omot! ³ E mas wo em perakmu en time’i mouw, wo en te’ina e laa mamuali kasairian witu nikoo wo e laa kumaan e le’onamu tanu e napi. Nikoo koo minerurola eng harta witu e nendo-nendo kasuatan mesampetouw. ⁴ Eng kaulitna e lininga mola e rekeiyan wangko’, karengan en tetoro tinaang miouw wia se memema’ayang minupu’ mola e wua’na em pengumannu, wo e mina’ayo mola witu en talinga ni Tuhan e minapekasa alam e nga’angal nea se simampur e niupu’mu. ⁵ Witu eng kamewa’an kouw timou mouw wo memoya-moya wia em bumi, nikouw kouw minapateu-teu mola e natemu masuat tanu witu e nendo pareretan. ⁶ Nikouw kouw minukumola, awes tare minunu’la sitou ulit wo nisia si reiy’ mete’u sumu’usuk nikouw. ⁷ Kaa ni’itu, patuari waya, sumabaarouw i ka’ayo witu eng ke’e eiy ni Tuhan! Eng kaulitna si metani’ si mengena-ngena’la e wua’na wawean arga witu en tana’na wo nisia si sabaar i ka’ayo tu tumumpa mouw e naro noras mera’aragh wo e naro noras masuru. ⁸ Nikouw kangkasi kouw lewo’ sa reiy’ sumabaar wo lewo’ sa reiy’ tume’etepla e natemu, karengan eng ke’e eiy ni Tuhan en tawi mouw! ⁹ Patuari waya, te’a mouw kouw mengu’ungu-ngu’ungul wo manginseselokala, rio te’a kouw ukumen. Eng kaulitna si Akim si rimedeiy mouw witu en tawi em pepalen. ¹⁰ Patuari waya, ki’itanola em patoka’an witu em peme’itan wo eng kasabaaran ne nabi se simusuiyola demi e ngaran ni Tuhan. ¹¹ Eng kaulitna nikeiy keiy matotor nisea mina’aruiy, nyi’a i ti’i nisea se timentem mola; nikouw kouw liminga mola tanume eng katenteman ni Ayub wo nikouw kouw minete’u mola sapa em bitu eng kesampetanna sinadiala ni Tuhan i wee nisia, karengan si Tuhan si kasa tongkoupusen wo si wuta en tongkoupusen. ¹² Ta’an eng kasa i paketa-ketare, patuari waya, te’a mouw kouw matiwa’ demi en sorga ka’apa tu’u demi em bumi ka’apa demi e nesa wo’o sapa walina. Sa iyon, satorona kouw lumila’la iyon, sa reiy’ satorona kouw lumila’la reiy’, rio kouw reiy’ tena’an e nukuman. ¹³ Sa wawean siesa tou witu e nelet miouw si peme’itan, le’osouw sia sumombayang! Sa wawean siesa tou melaya-laya’ le’osouw sia kumantar! ¹⁴ Sa wawean siesa tou witu e nelet miouw si rara’an, le’osouw sia kumeret se penatua jema’at, rio sea sumombayangla nisia ma’an misu’la nisia ampit e lana witu e ngaran ni Tuhan. ¹⁵ Wo en sesombayangen timoumi witu e iman e laa lumawirla sitou rara’an i ti’i wo si Tuhan si laa mongkela nisia; wo sa sia simiwo mouw en dosa, takar en dosana i ti’i e laa ampungala. ¹⁶ Kaa ni’itu satorona nikouw kouw mememakaredeiyala en dosamu wo mesesombayangala, rio kouw male’os. En sesombayangen ni tou ulit, sa ampit e neman ni’i sombayangla, eng kasa wangko’ eng kuasana. ¹⁷ Elia nyi’a mouw sitou karengan masuat tanu nikita, wo nisia si kasa mouw minakauli-ulit masombayang, rio e naro te’a metetumpa, wo e naro tu’u e reiy’ timumpami wia em bumi keurean en telu nge te’un wo enem nga sumedot. ¹⁸ Laa o sia sumombayang kangkasi wo langit en timumpami e naro wo em bumi tu’u eng kimaluari wu’ana. ¹⁹ Patuariku waya, sa wawean witu e nelet miouw si sime’epang witu eng kaulitan wo wawean siesa tou si simiwo nisia minurikit, ²⁰ kete’uanola, kaa seiy i te si simiwola sitou maka dosa minurikiti waki lalanna seip, nisia si laa lumawirla e imukur ni tou i ti’i witu e maut wo mi’otla e laker dosa.