¹ Paulo, umuwomvi wakwe Lezaq nakupya umupositoli wakwe Yesu Kilisitu mwisuwilo ilyayanthu ayasolwe yakwe Leza nu wumanyi wa wumolimo wuno wukalemelelana nu wukapepa, ² ni tayilo ilyawumi wamuyaya lino Leza, wino asiyipa, walayile pamanso ya nkhulo zyansita zyonsi. ³ Munsita yakwe wawumbwile izwi lyakwe ukupitila muwukosolowuno ninjililamo ukuyana ni sunde lyakwe Leza umupususi witu. ⁴ Kuli Tito, umwanane umwenecho mwisuwilo litu ilimanyikwe. Uwila nu mutende ukufuma kuli Tata na Kilisitu Yesu Katula witu viye nawe. ⁵ Pakuti chino nakusile wewe ku Kileti, ichakuti uyanye ivinthu vyonsi viye mumalo yakwe vyonsi vino vyalondekwanga ukuti viyanyike nu kuti usole ayakalamba ya chalichi mumisumba yonsi ukuyana na muno na kulanjilile. ⁶ Umukalamba wa chalichi, alingine ukuya umunthu wawula imisango injipe, umonsi wa mwanachi wenga, uwayana ayasuwilwe ayawula imbili iyiyipe pamwi ukuvwila. ⁷ Ichikankhala ku munthu wakulola imilimo ya pa chalichi, ukuya uwawula imisango, amuno ali wa kukolelela aya mung'anda yakwe Leza. Ataya uwakuyikuzya, ataya uwakusoka zuwa, ataya a chakolwa, ataya uwa lombwa, nu kuti ataya uwa mbunu. ⁸ Kwene, aye uwakupochelela ayenyi uwakukunda ivizima. Uwakwelenganya ningo, umulungamane, umutele, nu wa kuyilema. ⁹ Alingine ukulemasya amazwi ya wumolimo ukuyana na muno yakasambilizizya, umwakuti ukuya uwa kufikapo pa kupanzya ayawuze ni sambilizyo ilizima nu kuwachimvya yano yakumususya. ¹⁰ Pakuti kwaya ayanthu ayavule aya vikanza, aya kuvwanga ivyasilesile na ya wufi, nkhaninkhani kuli yano yalembululwa. ¹¹ Icha kulondwa ukuwalesya. Yakuvulunganya iwuvi lyonsi pa kusambilizya ivya kusonzya insonyi vino yatalingine ukusambilizya. ¹² Wumwi muli ya kasesema yawo watili, ''Aya Kelete ayawufi insita zyonsi, ivinyamana iviyipe, ayalili yakasu.'' ¹³ Ilyasi lii ilya molimo. Achino uwasunde sana, umwakuti yaye mwi suwilo, ¹⁴ mutati mwayichila amano ku vyili ivya wa Yuda pamwi ku malamulo aya yanthu yano yafuma ku wumolimo. ¹⁵ Kuli yano ayatele, ivinthu vyonsi ivitele. Kwene kuli yano ayayipe na yawula isuwilo, pasi ichizima, kwene wonsi amelenganyo yawo ni vyakulonda vyawo iviyipe. ¹⁶ Yakasimichizya ukuti yamumanya Leza, kwene yakamukana mumilimo yawo. Ayayipe, ayawula ukuvwila, nu kuti yatanga yakwanisye ukuwomba ichizima chili chonsi.