¹ Paulo, umupositoli wakwe Kilisitu Yesu ukuyana ni sunde lyakwe Leza katula witu na Kilisitu Yesu itayilo litu, ² kuli Timoti, umwana umwenecho mwisuwilo: Uwila, uluse, nu mutende ukufuma kuli Leza Tata na kuli Kilisitu Yesu Mwene witu. ³ Ngati muno nakulenjile ivyakuchita pano nayanga ku Makedoniya, usyale mu Efeso ukuti uwasunda ayanthu yamwi ukuti yatasambilizya ivisambilizyo vyuze. ⁴ Pamwi yatayika amano kumalyasi ni myiko iyawula ukusila. Vii vikaleta ukulwana ukulusya ukwavwa vino Leza akalonda, vino ivya mwisuwilo. ⁵ Nomba ichakulonda chi sunde ulukundo ulwakufuma mu mwenzo uwuswepe, ukufuma mumelenganyo ayazima, nu kufuma mwi suwilo ilyenecho. ⁶ Ayanthu yamwi yavisile ivinthu vii kunsizi nukupawuchila kuvyakuvwanga vyawelewele. ⁷ Yakulonda ukuya ayasambilizi yi sunde, kwene yatakuvwichisya vino yakuvwanga pamwi ukuvisimichizya vino yalemasizye. ⁸ Kwene twamanya ukuti isunde ilizima ndi wumwi akuliwomvya ningo. ⁹ Twachimanya chii, ukuti isunde litapanjilwe umunthu umulungamane, kwene uwawula isunde na yanthu ayawula ukuvwila, na kuyanthu ayawula Leza na yayembu, nayano yasipepa na yanthusi. Lyapanjilwa kuli yano yakakoma ya yisi na yanyina, kuli ya chikoma, ¹⁰ ku yanthu ayachende, kuli yano yakachendeka umonsi nu monsi, umwanachi nu mwanachi, kuli yano yakayiya ayanthu nu kuwatwala kuwuzya, ku yawufi, kuli yakamboni yawufi, na kuli vyonsi vino vikasusyana ni chisambilizyo ichenecho. ¹¹ Ichimanyisyo chii ichakuyana nu wuchindame wilandwe lisuma lyakwe Leza umuchindame lino alino napelwa. ¹² Nkhusalifya Kilisitu Yesu Mwene witu. Wamphela amaka, pakuti wanjelenganyizya ukuti ne musuwilwe, nukuti wanjika mumulimo. ¹³ Nali ne wamusamu, uwakuyuvwa, nu mononyi. Kwene napochelile uluse pamulandu nawombanga mukunthamanya na mukunthasuwila. ¹⁴ Nu wila wakwe Mwene witu lwazuzile ni suwilo nu lukundo luno luli Kilisitu Yesu. ¹⁵ Amazwi yaa ayasuwilwa nukuti yalingana kuli wonsi yano yakuwapochelela, ukuti Kilisitu Yesu wizile munsi pakupususya aya yembu. Newakuchilapo pali vii. ¹⁶ Kwene pamulandu na chii napochelile uluse, umwakuti muli nene, newakutalika, Kilisitu Yesu alanjizye ukutekana konsi. Wawomvile chii ngati ichakulolelako kuli yano yangasuwila muli weliwe pa wumi wamuyaya. ¹⁷ Nomba ku mfumu ya nkhulo, iyawula kuwola, iyawula kuloleka, Leza wenga, achindikwe nu wuchindame pe na pe. Ameni. ¹⁸ Nkhuyika isunde lii pamanso yako, Timoti, mwanane, ukuyana nuwusesemo uwukali wuno wavwanzile vyakwe wewe, ukuti ufwile ulwe ukulwa kuzima, ¹⁹ ukulemasya isuwilo na melenganyo yazima. Pakukana chii, yamwi yonona isuwilo lyawo. ²⁰ Yamwi muli woliwo a Himeneyasi na Alekizanda, yano namusila chiwa ukuti yasundwe yatasamula.