¹ Ndi wumwi wakwe mwemwe ali na kafichi nu muze, wuzye afwile aye ku yanthu aya masunde yano nsayalungamane, ukuchila ku yanthu ayatele yakwe Leza? ² Wuzye mutamanya ukuti ayanthu ayatele yakwe Leza yalipingula insi? Nomba ndi mulipingula insi, wuzye mutalingine ukuteka imilimo ya tumilandu tunono-tunono utwakulondwa? ³ Mutamanya ukuti tulipingula ayangelo? Akanga, nomba, kano tungapingila imilimo ya wumi wuu? ⁴ Nomba ndi mukupingila ivinthu ivyakuyana nu wumi uwa manda wonsi, ichani chino mukuleta imilandu ndi yii kuli yano yataya nanthi pamwi muchalichi? ⁵ Nkhuvwanga vii ukuti imbasonzye insonyi. Wuzye pasi nanthi wumwi pali mwemwe uwamano wino angamazya ivyongo pakasi pa yinamunthu? ⁶ Kwene munyina wumwi akumupela umunyina umulandu, napya vii vikuchitika kuli yano yatasuwila! ⁷ Pamulandu wakuti mwayichilana imilandu kuno ukupotwa kwinu mphiti. Ichani fwandi chino mutanga muzumilizye ukuchula? Ichani chino mutanga muzumilizye ukusombwa? ⁸ Kwene mwemwe mweyenecho mukawomba uwuyi nupya mukasomba, nu kuti mukawomba vii kuwawuzo! ⁹ Wuzye mutamanya ukuti wino nsumulungamane atalipyana uwumwene wakwe Leza? Mutati mwasombwa. Ayachende, ya kapepa ya vikozyo, uwulalelale, ya malaya awonsi, yano yakachendeka awonsi yatupu pamwi ayanachi yatupu, ¹⁰ ayapupu, ayambunu, ya chakolwa, ayawufi, na yakwakwa-nawumwi pali yaa wino alipyana uwumwene wakwe Leza. ¹¹ Vivyo avino yamwi muli mwemwe yalinji. Kwene nomba mwafulwa, mwemuya mweyatele, mwemuzumiliziwa na Leza mwizina lyakwe mwene Yesu Kilisitu na mumupasi wakwe Leza witu ¹² ''Chonsi ichizumilizike kuli nene,'' kwene asa chonsi chino ichizima. Chonsi ichizumilizike kuli nene,'' kwene inthanga indamulwe kuli chimwi pali vii. ¹³ ''Ichakulya icha ndilwa, nga ni ndilwa iya chakulya,'' kwene Leza alimalana navyo vyoyili vyonsi. Umwili wutaya uwa wuchende. Kwene, umwili uwakwe Mwene, nu kuti Mwene ali wulela umwili. ¹⁴ Leza wazyusizye u Mwene nupya ali tuzyusya na sweswe kwene ku maka yakwe. ¹⁵ Wuzye musikumanya kuno imyili yinu iviwumbwa vyakwe Kilisitu? Wuzye lyene ningafumya iviwumbwa vyakwe Kilisitu nu kuvisanzya kuli malaya? chitanga chiye! ¹⁶ Wuzye mutakumanya kuno wino wayisanzya kuli malaya akaya umwili wonga na weliwe? Ukuyana na muno amawaliko yakutachila, ''Woyili yaliya umwili wonga.'' ¹⁷ Kwene wino wayisanzya kuli Mwene akaya umwili wonga na weliwe. ¹⁸ Wutukiniko ku luyembu lwa wuchende! Uluyembu luze lonsi luno umunthu akachita lwaya kunzi kwa mwili, kwene umunthu wa luyembu lwa wuchende akayembuchila umwili wakwe kwene. ¹⁹ Wuzye mutakumanya kuno umwili winu ing'anda ya mupasi uwutiswe, wuno wukayikala muli mwemwe, wuno muli nawo ukufuma kuli Leza? Wuzye mutakumanya kuno musi pali mwenga? ²⁰ Pakuti mwakazilwe pa mutengo. Achino mumuchindamike Leza ni myili yinu na mumupasi winu, wuno wali uwakwe Leza.