¹ Ali muno umunthu alingine ukutusendela, ngati swe yawomvi yakwe Kilisitu na yawomvi ya wufisame wa wumolimo wake Leza. ² Chino chikalondwa ku yawomvi ichakuti yazanwa ukuti aya kusuwilwa. ³ Kwene kuli nene ichinthu ichinono sana ukuti nkhupingulwa na mwemwe pamwi ni ng'anda ya milandu yiliyonsi. Amuno nanthi anene kwene insiyipingula nenga. ⁴ Insikumanya ukuti no nonyile chimwi, kwene chisikusula ukuti ne mutele. Wino a kamphingula nene Umwene. ⁵ Achino mutaputula umulandu pano insita yichili, pano Mwene atani ayize. Wene alaleta ivifisame ivya kumfinzi apatiswe nupya alawumbula ni vya mumwenzo. Lyene alino umunthu wensi alapochela ukutumvya kwakwe ukufuma kuli Leza. ⁶ Nomba, yakundwe, nene na Apolo twawombanga vii pa mulandu na mwemwe, ukuti pamwi mungasambilila ukufuma kuli sweswe vino izwi lii likusula likuti, ''Mutawonjelezya pali vino vya walikwa.'' Chili vikwene ukuti pataya wumwi muli mwemwe uwa kuyikwezya ukulusya umuze. ⁷ Wuzye aweni wino akalola ukupusana pali wewe na yawuzo? Pali chani chino ulinacho chino utapochela? Ndi wachipochelela, nga ichani chino ukuyikwezya ngati utachipochelela? ⁸ Muli navyo mphiti vino mungalonda! Mwe muwina mphiti! Mwatalika nu ku lamulila-nupya muli ukutali na sweswe! Umolimo, ningakunda ndi mungalamulila, umwakuti tungiza tulamulile swensi. ⁹ Nkhwelenganya ukuti Leza atuyisile swe ya positoli pa lwenze nupya ku wumalilo wa muzele, tuli ngati ayanthu yano ya wapingwila imfwa pakasi pi wumba. Twetuya swe lukozyo lwansi-ku yangelo, na ku yanthu wonsi. ¹⁰ Tukuloleka ngati swe yapuwa pa mulandu na Kilisitu, kwene mwemo mwiluka muli Kilisitu. Swemo swe yafoke, kwene mwemo mweyamaka. Ya kuwachindika, kwene swemo ya kutusewanya. ¹¹ Mphaka nu kufika pa nsita yii swe ya nzala nupya swe ya lusala, tukuzwala ivinyankha, tukumwa mwalwe, nupya tusi nu muzi. ¹² Tukawombesya, ukuwomba na makasa yitu. Ndi pano ya kututuka, swemo tu kuwapolelela. Ndi pano ya kutuzinga, tu kajimba. ¹³ Ndi pano ya kutukalipila, swemo tu kavwanga mu muchinzi. Twetuya ngati, ivikona vya nsi nupya vino vya yipisisya pa vinthu vyonsi. ¹⁴ Insi kuwalika ivinthu vii ukuti imbasewanye, kwene nkhuwalika ukuti imbasoke ngati mwe yanane ayakundwe. ¹⁵ Pakuti napano ndi ungaya na ya kukuchinjilila (10,000) muli Kilisitu, utanga uye na yaso ayavule. Amuno nemo nati inja ne tata winu muli Kilisitu Yesu ukupitila mwi landwe. ¹⁶ Achino inkhuwalenga ukuti musendele vino indi. ¹⁷ Ali chino namutumile Timoti kuli mwemwe, umukundwe wunji nupya umwana umusuwilwe muli Mwene. Aliwiwusya ivya nzila zyane muli Mwene, ukuyana na muno inkhawasambilizizya kulikonsi na mu ng'anda zya mapepo. ¹⁸ Nomba yamwi muli mwemwe yeyatalika ukuyikwezya, chikuya ngati ukuti insiyiza kuli mwemwe. ¹⁹ Kwene nimayiza kuli mwemwe likwene, ndi Mwene wa zumilizya. Apano inthalimanya sile amazwi ya yanthu yaa yano ya kuyikwezya, kwe indalola amaka yawo. ²⁰ Amuno uwu Mwene wakwe Leza wutaya mu mazwi kwene mu maka. ²¹ Mukulonda chani? Wuzye nize nize nu mukota pamwi nu lukundo na mu mupasi wa wumyalale?