¹ Nomba nkulonda ukuti manyikwe kuli mwemwe, mwe yanji, amazwi yakwe Leza yano natanzile kli mwemwe yano mwapochelile swinya yano mwikalila. ² Swinya a yano yakuwasunjilila, ndi mungalemelela ku mazwi yano natanzile kuli mwemwe, pamwi ndi mwasuwile uwufi. ^{3 4} Nenji nawapile mwemo chinonapochelile ukuya ichintu chapapela, ukuti Kilisitu wafwile pamulandu wa maluyembu yitu ukuyana na mawaliko, Yamuzisile, swinya wazyulupwike pa manda yatatu ukuyana namawaliko ⁵ Kilisitu wamulolechile Kefasi, apano walolechile kuyalondezi ikumi na yayili(12), ⁶ Ngapano walolechile ayawuze ukuchila imyanda yisano(500) pansita yonga. Ayavule muli wolilwo yachili kuwumi, kweni yamwi yafwa. ⁷ Apano wamulolechile Yakobe, (Jemusi) ngapano alolechela kuyalondezi wonsi. ⁸ Pawumalilo, walolechile kuli nene, pano nali ngati umwana wino wakwasilwe pano imyezi itani yakwane. ⁹ Amuno newakupelelechezya ku yalondezi wonsi. Swinya ntazipile ukwamwa umulondezi pamulandu wakuti nayimvizye Ikleziya lyakwe Leza. ¹⁰ Ukuwa ndi vino Leza wamfwila inkhumbu indi vino indi, swinya pakumufwila inkumbu chitalinji icha sile-sile. Uuwa, nawombesya nkani ukulusya aya londezi wonsi. Chingatenga yatalinji amaka yane, kweni inkumbu zyakwe Leza zino zili na nene. ¹¹ Apano ntanzi ndi a nene pamwi woliwo, tukatanda swinya mwasuwila. ¹² Ale ndi ukusambilizya kwitu ukwakuti Kilisitu wazyusile kuyafwe, nga ichani chino yamwi muli mwemwe yakuvwanga ukuti kusi ukuzyuka kuyafwe? ¹³ Kweni ndi chakuti kusi ukuzyuka ku yafwe, fwandi na Kilisitu kwene atazyusile; ¹⁴ Nupya ndi chakuti Kilisitu atazyusile, lino isuwilo linu ilya sile-sile, nukuti muchili muli muluyembu. ¹⁵ Nupya, tukuzanwa ukuya aswe ya kamboni aya wufi yakwe Lez, pamulandu wakuti twavwanzile ukusimichila ukuti Leza wazyusizye Kilisitu ku yafwe. Kweni atamuzyusizye, ndi ichakuti ichakusimichila ayafwe yasizyuka. ¹⁶ Ndi ichakuti ayafwe yatazyusile, lino na Kilisitu kwene atazyusile. ¹⁷ Ndi Kilisitu atazyusile isuwilo lyinu ilya sile-sile nupya lino muchili muli muluyembu. ¹⁸ Akuli kuti nayano yafwila mwisuwilo lyakwe Kilisitu nawo yaponga. ¹⁹ Ndi muwum kwene wuu ampela amuno twasuwilila Kilisitu, tuyine ukuvwilwa uluse ukuchila ayantu wonsi. ²⁰ Kwene nomba Krisitu, wino ivikomwa vya yalya yano yafwile, nuku nukuzyuka ukufuma uku wufwe. ²¹ Apakuti imfwa yizile nu muntu ,na kumuntu nupya kwizile ukuzyukuka uk yafwe. ²² Ndi vino muli Adamu wonsi yakafwa, avino namuli Kilisitu wonsi yaliya kuwumi. ²³ Ukuwa umuntu wensi munsita yakwe:Kilisitu, wino wantandiko uwavikomwa, ngapano yano ayakwe Kilisitu yalaya nuwumi apakwiza kwakwe. ²⁴ Apao kuliya uwumalilo, pano alitwala uwu mwene kuli Leza tala, apano alimazya uwulamulilo wonsi nu wuteko wonsi na maka. ²⁵ Apano alilamulila mpaka pano wayika aya lwani wonsi apansipa ngazo zyakwe. ²⁶ Umulwani uwakupelelechezya pakonona yilaya imfwa. ²⁷ Amuno''wayika ivintu vyonsi apansi pa ngazo zyakwe.'' Apano ndi chikuvwanga ukuti ''wayika vyonsi'' chikuvwika kuno atalaya ponga na wenga wino akuyika vyonsi mukutontela apansi pa weliwe. ²⁸ Ndi vyonsi viza vyatontela pansi pali weliwe apano umwana wenga sile alatontela apansi pali wino wayika vyonsi umu katontela apansi pali weliwe, ukuti Leya aye uweliwe muli vyonsi na vyonsi. ²⁹ Apano yalya yalawomba chani yano yabatizwa umuwufwe? ndi ayafwe yatazyusile, wuzye ichani chino yakubatizwa kuli woliwo? ³⁰ Nga lelo ichani chino tuli muwulwanyi insita yonsi? ³¹ Nkufa chila wanda! Alichino nkusimichizya nuyikwezya muli mwemwe, chino indi nacho muli Kilisitu Yesu mwene witu. ³² Wuzye nkufungula chani, ndi nkwelenganya uwuntu, ukuti nalwile nivinyama ku Efeso, ndi ayafwe yatalizyuka? ''Izini twalya nukumwa, pamulandu mutondo tulifwa.'' ³³ Mutayipwa: ''Ukuyisanzya mu mawungwe ayayipe ku kawonona imiyele imizima.'' ³⁴ Welelini! mwayikala muwulungamane! mutayembuka. Amuno yamwi muli mwemwe yatamumanya Leza. Achino nkuvwanga kunoichasonyi kuli mwemwe. ³⁵ Kwene wumwi alavwanga ukuti, ''uzye ayafwe yalizyuka wuli wuli, swinya yaliza namwili chii?'' ³⁶ Welisilu wee! pakuti chino ukutanda chitaliza chiye kuumi kweni ndi chafwa tasi. ³⁷ Chino watanda su mwili wuno wuliza kwene luli lulaya ulupumba. Chingaya ingano pamwi chiwuze kwene. ³⁸ Kweni Leza alichipela umwili mukulonda kwakwe, swinya ku mbezu iyili yonsi alayika umwili uwakwe nu wakwe. ³⁹ Inyama yonsi asi yili yimwi m'malo yakwe pali inyama, yonga sile mu miyele ya muntu, ni nyama yiwuze iyavinyama, inyama yiwuze iya vyunyi, niwuze iya nswi ⁴⁰ Swinya kuli imyili iya mwiyulu nimyili iya munsi. Kweni ukuchindama kwa mwili wa kwi yulu wuli nimiyele yonga nukuchindama kwa munsi akuwuze. ⁴¹ Kwaya ukuchindama konga ukwi lanzi nukuchindama kuwuze ukwa mwezi nukuchindama kuwuze ukwa ntanda. Ukuzipa ukulekane-lekane ukwa ntanda. Amuno ulutanda longa luka lukapusana nuluwuze muwuchindame. ⁴² Avino chili nukuzyuka kwa yafwe. Chino chitandwa chikawola, nachino chazyuka chisiwola. ⁴³ Ndi chatandwa chisiya numuchinzi chikazyuka muwuchindame chikatandwa umuwusita maka: chikazyuka na maka. ⁴⁴ Chikatandwa umuwuyele ya mwili: chikazyuka mumwili wa mupasi. Ndi kuli umwili wa wunthu kuli nupya umwili wa mupasi. ⁴⁵ Nupya vino chawalikwa, ''umuntu uwantandiko adamu uwakupelelechezya wizile waya uwakupela uwumi uwa mupasi. ⁴⁶ Kweni umupasi asi awuno wandike kweni uwuntu, apano lyeni umupasi. ⁴⁷ Umuntu wantandiko uwa munsi ya pansi, wino wa wumvilwe ni vuu. Nu muntu wakwe chiyili wafumile ukwi yulu. ⁴⁸ Ndi muno wino wafuma ku lutukumbu yayelile, swinya ndi muno wino wa fuma kwi yulu ayelile, amuno wonsi a yamwi yulu yayelile. ⁴⁹ Vino twakolana nu muntu wino wa wumvilwe ukufuma kulutukumbu, avino tulikolana nu muntu uwa mwiyulu. ⁵⁰ Ukuti umwili nu wazi vitanga vipyane umwene wakwe Leza muno chino chikawola chitanga chipyane chino chisiwola. ⁵¹ Lolini! imbanene ichankama: tutalikasula swensi, kweni tulapilulwa. ⁵² Tulapilulwa pansita yinono ndi vino umukakapizyo ka linso, pano ipaali lilalila akakupelelechezya. Amuno ipaali lilalila ayafwe yalizyuka uku ntawola, apano tulapilulwa. ⁵³ Amuno umwili uwakuwola wuu wufwile wayikwa ukuntawola nawo umwili uno ukufwa uyikwe ukuntafwa. ⁵⁴ Apano ndi umwili wuu wunowukafwa wayikwa ukuntafwa apano kuliza kuye ukuvwanga ndi vino chawalikwa ''imfwa yamilulwa uwu kuyichimya.'' ⁵⁵ ''Wemfwa , we nga ukuchimvwa kwako kuli kwi? Wemfwa , we nga ukuluma kwako kuli kwi?'' ⁵⁶ Ukuluma kwa mfwa uluyembu, nawo amaka ya luyembu insindo. ⁵⁷ Kweni ukutayizya kuye kuli Leza, wino akutupela amaka ayakuchimvizya witu Yesu Kilisitu! ⁵⁸ Achino, yakundwe, simpisyani nantikusyembuka. Insita yonsi mulemasye umulimo wa mfumu, pamulandu wakuti mumanyile kuno ukuwombela umwene Mwene asi kwa sile sile.