¹ Kakame Yesu owok kede piny ki uni moru ekodet me jo atot di ko lube. ² Menugo di ngat kame tie kede tuo me dobo oko bino di ko wore di ko walo it be Rwot kame imito ikaruno mina adoko cil.

³ Di Yesu oko keto cinge ikome eko waco be ango amito bed cil. Di cucuto nono di ngat kame dobo mako di ko doko cil. ⁴ Yesu di ko waco ne be in nen be kiki malo ne ngatamoro do ot iyangayo ni di ko ngutere keni but esaserodot di iko mino giamia kame Musa riki ociko pi bedo ijura but gin.

⁵ Kakame Yesu odonyo kede kapere naum di ngadulong oko bino bute di kwat. ⁶ Di eulalo ne be, Rwot ngatie na tie buto ipalo etuo, tuo onyonyongo kome kede aramo kalit.

⁷ Yesu di ko walo ne be ayaro bino di ako cange.

⁸ Ngadulong oko ducoko di waco ne be ango likame amito be in pore donyo ioda do in yam kop alel kenekenedi ngatie na ko cango. ⁹ Pien ango atie dano kame kobo di bobo ango da atie kede isirikalen kame aloo kame awalo ne ngatamoro be oti eoto kame awaco ne dano ale be bia eda ebino. Kame awaco ne ngatie natimo gimoro etimo.

¹⁰ Kakame Yesu owinyo kede kop ni en eko uro di eko waco ne jo kame lube be ateteni ango liame audo yei adwong arom aman akadi isirael. ¹¹ Ango awaco neu be jo atot oyaro yai kitu wok ceng kede kitua donyo ceng di kiko bedo piny kede Aburaam kede isaka kede Yakobo iajakanut me malo. ¹² Do idue me ajakanut ko bino uco oko kakacol en kakame kibino koko kede mulo do lak kiye. ¹³ Di Yesu oko waco ne ngadulong nono be ot ot ni, bala kame in iyei kede wek etimere kamanono, di do ngatie mere oko cango iesawa nono.

¹⁴ Kakame Yesu oko donyo kede lot kapetero eko neno toto me dako kapetero di etie buto pien musaja oudo omake. ¹⁵ Di en eko mako cinge di musaja oko weke di en eko yai eko geno ne gi.

¹⁶ Kakame otieno otuno kede jo bin di ko kelo ne jo kame julogi omako di en eko riamo cung kareco nogo kede kop mege di eko cango jo dedede kame bin tuo. ¹⁷ Wek kop kame bin enabi Isaya owaco cobere di ewaco be en kikome ekuianyo horowa di eko yeno tuo wa.

¹⁸ Kakame Yesu oneno kede ekodet adwong oluke en eko ciko gi pi ot loka letuca. ¹⁹ Ngapwony moro me ijucil oko bino but Yesu di ko waco ne be nyapwony ango ayaro lubi ka dedede kame in iyaro ot iye.

²⁰ Di Yesu oko waco ne be ikween tie kede bure ame kidonyo iye, winy kame por iwi yamo da tie kede ude gi do wot ka dano likede kame epielo iye ulie.

²¹ Di ngat acel kikom joor mege oko waco ne be Rwot me agege yei neango ber aot aik papama.

²² Do Yesu oko waco ne be luba wek jo oto ikere kengi.

²³ Kakame en edonyo kede iemeri joor mege oko lube. ²⁴ Di do tiuon yamo adwong oko poto inam di ebuka mere oko um emeri do yesu oudo omino. ²⁵ Di joor mege oko bino bute ceene di kiwaco ne be Rwot lakwa ka igal otieko too.

²⁶ Di en eko waco negi be pinyo komio itienu kede liuoro okwe un jo kame yeiu nonok? Di en eko yai eko gengo yamo kede nam di yamo oko napakin.

²⁷ Do jo oko bedo kede ur di ki waco be dano me epone mene me ame ikon yamo kede nam da winye.

²⁸ Kakame en etuno kede loka tetuca ilobo me Geresene en bin eko riamo kede jo are kame jwogi omako di kiwok iatesin oudo gin kiger ame dano moro liatwero beo iyangayo nono. ²⁹ BIn gin kiko donyo koko itek di kiwaco be nyo kame wan otimonin Yesu in wot ka Rubanga? In bino me mino wa alola di pulodi kare li otuno? ³⁰ Oudo bin tie ekodet me ipegei kame tie cam kakabonor.

³¹ Di jwogi oko kwane di waco ne be iriamo wa yei ne wa ot ikom ekodet me ipegei.

³² Di en eko waco ne gi be otunu kakame gin kiyai kede kiko ot ikom ekodet me ipegei neni di do ekodet me ipegei oko ringo pipiny mam di kiger kiko to ipi. ³³ Di jokame bin daro gi oko ringo buli dano omako yangayo me ot ibomba di kiko tatamo gi dedede kotimere ikom jokame bin tie kede jwongi. ³⁴ Neni do jo dedede me bomba oko bino pi riamakin kede Yesu kakame gin kiko nene gin kiko kwame be eyai tenge kilobo gi.