¹ Kakame Yesu oneno kede Alule me jo en eko yito malo iwi moru: eko bedo josiao mege oko bino bute: ² Eko yabo doge, en eko pwonyo gi, di ewaco be: -.

¹² Lelunu di ikonu bedo kede yom cuny, Pien giamia wu me pwoc tie dwong imalo. Iye pone nono da en kame bin kotidilo kede inabino kame ogeo ne wun.

¹³ Wun itienu munyo melobo, do kame munyo orwenyo mito mere etwero doko mit benyo? Udo bero mere odokoli kwanyo bwote tenge di jo ko nyonyonoen. ¹⁴ Wun itienu Lero me lobo, Bomba kame ogero iwi emukura likame kanere. ¹⁵ Likame jo cwinyo tala, di oko ume kede ebukit, do kokete iye pir me etala, di eko mino lero but jo dedede kame tie iot. ¹⁶ Pi mano miunu Lero wu rieny ne jo dedede, tetekeny kinen tice wu di kiko pako papa wu kame tie malo.

¹⁷ Kur iparunu be ango abino pi kwanyo iswil arabo inabino. Likame ango abino pi kwanyo, do pi cobo. ¹⁸ Ateteni awaco ne wu be, tek di malo kede Lobo pwodi tie, likame tie enyukuta moro ara wikop acel me gikame kowandiko iye iswil kame kobino kwanyo tenge, pakana gidedede cobere. ¹⁹ Pi mano ngat kame turo acel ikom cik atitino gi, di eko pwonyo jo pi timo kamannon, en ebino bedo dano kalikame pire tek i Ajakanut me malo. Do ngat kame Lubo di eko pwonyo gi, ngat nono kobino lwonge be Ngadwong iye Ajakanut me malo. ²⁰ Pien awaco ne wu be, kalikame poore wu okalamo poore me jopwony me iswil kede Iparisayon likame ibinunu donyo i Ajakanut me malo Atwal.

²¹ Bin iwinyunu di kowaco ne jo kariki sek be, kur ineko do ngat kame neko bino bedo ilieto me ngol. ²² Do awaco ne wu ne ngat kame doko ger ne omimere abongo kop moro bino bedo ilieto me ngol: kede ngat kame yeyeto omimere kobino tere inyim kansulo; do ngat kame waco ne omimere be imiming bino bedo ilieto me mac. ²³ Pi mano kame itie tero giamia i alutari di ikanono iko yutuno be omini tie kede kop kedi; ²⁴ Wek giamia ni kanono i alutari, di iko ot, dwoko nywak ni kede omini, dido iko bino mino giamia ni. ²⁵ Por kop kede ngat kame tie pidi awakawaka di pwodi itienu kede iyongayo tetekeny kur ngapido teru but ngangol kop, di ngangol kop ko mini icing sirikale, di oko bino tweni iotkol. ²⁶ Ateteni awaco ni be, likame ibino wok kikuno tuno kede di iculo sente kame kotangi kede me atiekini.

²⁷ Bin iwinyunu di kowaco ne jo kariki sek be; kur itim adote. ²⁸ Do ango awaco ne wu be ngat kame neno dako di eko paro buto kede otieko timo adote kede icunye. ²⁹ Aso ka wangi tetu cam en kame mi idubo, gole ooko iko uce tenge; ber ne in kei adul moro me komi akaka uco komi dedede imac kalikame to. ³⁰ Doko da ka cingi tetu cam en kame mi idubo, ngole di iko uce tenge. Eber ne in kei adul moro me kom akaka uco komi dedede imac kalikame to.

³¹ Bin kowaco da be, ngat kame riamo dako mere poore emie balwa me gonyo nyom. ³² Do ango awaco ne wu kaman, ngat kame riamo dako mere, kwanyo ka pi kop me adote, emio mano odoko ngadote doko da ngat nono kame nyomo manono kame oriamo udo etimo adote.

³³ Doko itiekunu winyo di kowaco ne jo kariki sek be, kur ilairo pi kop me abe, do poore in itim ne Rwot gikame in itieko cikere iye; ³⁴ Do awaco ne wu be; kur ilairo nu Atwal ara waco nying malo pien ebedo kom ka Rubanga.

³⁵ Arabo di iwaco nying lobo, piento en ebedo abanya kame en eteno iye tiene, amoto di iwaco nying Yerusalem, piento en ebedo Bomba me Abaka adwong.

³⁶ Kur Ilairo kede wii, Pien likame in ikaruno mino yer wii acel doko tar ara col. ³⁷ Wek kop kame in iyamo bed be “Ee” arabo be li; pien kop kame kalamo magi udo owok kibut ngarac ³⁸ Wun iwinyunu be bin kowaco be, wang pi wang kede lak pi lak. ³⁹ Do ango awaco ne wu be, kur inyang raco: do ngatamoro kame bapo lemi tetu cam lok na tetu cel da. ⁴⁰ Doko ka ngatamoro opidi iye iswil, di eko tero ekoti ni, weke eter kiton esati ni da. ⁴¹ Doko ngatamoro kame dii pi ot mairo acel, otunu kede mairo are. ⁴² Mii but ngat kame kwai bobo da kibut ngat kame penyo kony kur ilok ne ngei.

⁴³ Wun iwinyunu be bin kowaco be, mar ngakio ni, di iko dagi ngakwor ni. ⁴⁴ Do ango awaco ne wu be marunu jokwor wu miunu winyo but jo kame lamo wu, timunu bero but jo kame dagi wu, doko da ikounu lego pi jo kame tero wu kirac, di kitidilo wu. ⁴⁵ Tetekeny idokunu idwe ka papa wu kame tie malo, piento en emio ceng mere wok ne jo ka reco kede ne jo kabeco, di eko cwano kot ne jo kopoore kede jo kame likopoore. ⁴⁶ Pien kame imarunu jo kame marou, iudunu giamia me pwoc nyo? Benyo mam jo kame raco esolo da timo kamanono? ⁴⁷ Doko kame imitunu imiegu wu kenekene, udo itimo nyo aber kalamo jo icegun? Benyo mani jo kame raro esolo da timo kamanono? ⁴⁸ Pi mano, bedunu jo kopoore, bala kite kame papa wu imalo opoore kede.