¹ Hwekenu Jezǔ jɛ te sɔ́n osó lɔ́ jíi, ahwan susu xo do e. ² Gudunɔ dokpó sɛ́kpɔ Jezǔ bo jɛ klo le nukɔn n'ǐ bo ɖɔ̀ :"Aklúnɔ, ná é jló we, a hɛn, a nǎ gbɔ̀ azɔn nǎ un." ³ Jezǔ ka dlɛ̌n alɔ bo ɖó é wu, bo ɖɔ:"un jló. Azɔn towe ní gbɔ̀". Tlótló, azɔn étɔ́n gbɔ̀. ⁴ Éxɔ́n gódó, Jezǔ ka ɖɔ̀ n'ǐ ɖɔ̀:"Ɖo tó un ganjǐ; nɔkpɔ́n ɖɔ́ na mɛti gɛ́; amɔ̌ zě lěke a le sɔ́ yí xlɛ̌ avɔsánnámǎwǔtɔ́ lɛ́ɛ, lobo nǎ awǔsislǎgban ke xó Moyízi ɖɔ̀ lɔ̌, ná mɛ lɛ́ɛ kpó ná dó nywɛ̌ ɖɔ̀ azɔn towe gbɔ̀ xójɔxó." ⁵ Ke Jezǔ byɔ́ kafaanawúmu, sɔja kanwekohwangǎn Hlɔ̌ma tɔn ɖokpó sɛ́kpɔ́ ɛ, bo jɛ kɛnklɛ̌n dó n'ǐ jí ; ⁶ bo ɖɔ̀ : "Akúnɔ, mɛsɛntɔ́ cé ɖokpó kplíbɔ́ bo ci zan jǐ le xwé gbe, bo lě se awǔvɛ́ tawun. ⁷ "́Ke é ɖɔ̀ lěe, Jezǔ ɖɔ̀ n'ǐ ɖɔ̀ :"Nǎ yí gbɔ̀ azɔn n'ǐ." ⁸ sɔja kanwekohwangǎn lɔ̀ ká yí xó bo ɖɔ̀ : Aklúnɔ, un ma nyi mɛ ke a ná xódo wá xwégbe gɛ̌. Amɔ̌, vɛ̌ ɖégbe kpowun, éxɔn, azɔn nǎ gbɔ̀ ná mɛsɛntɔ́ ce. ⁹ Ɖó nyɛ lɔsǔ, omɛgɔ̀ wɛ un le, bo ka kpa cɛ nǎ Sɔ́ja lɛ́ɛ. Ná un ɖɔ̀ ná mɛɖě ɖɔ̀ :"yi" é nɔ́ yi; bɔ̀ un ka lɛ̌ ɖɔ́ ná me děvo ɖɔ̀ : wǎ, é nɔ́ wá; un ka ɖɔ̀ ná mɛsɛntɔ́ cé ɖɔ̀ : "blǒ lě, é nɔ́ bló. ¹⁰ Ke Jezǔ se oxó éxɔ́n lɛ́ɛ, é kpácá ɛ, bɔ é ɖɔ́ ná omɛ ke xodó e lɛ́ɛ ɖɔ̀ :"Ma ɖɔ xojɔxó ná; un ma mɔ mɛɖě ɖó nuɖíɖi ɖó lěxá le Izlayɛ́li vi lɛ́ɛ mɛ́ gɛ́. ¹¹ Amɔ̌, un lě ɖɔ́ ná mi ɖɔ̀ omɛ susu nǎ sɔ́n ohwezɛtɛtɛn, bo nǎ lɛ́ sɔ̀n ohweyixɔ, bo nǎ wá wá flǎn anyǐ̌, bo ɖu nǔ xá Ablaxámu kpó Izáki kpó, kpó Jakɔ́bu kpó, le Axɔlúdútó sɛxwé tɔ́n mɛ. ¹² Amɔ̌, Axɔlúdútó sɛxwé tɔ́n wé ví lɛ́ɛ, enǎ bɛ́ yě kɔ́n nyi zǐnvlu mɛ le agǎ jí. Flɛ̌ wɛ yě ná ví aví, bo nǎ ɖu aɖǔkúnkún le." ¹³ Jezǔ ka wǎ ɖɔ́ ná sɔja kanwekohwangǎn lɔ́ ɖɔ̀:"Yi xwé, onǔ ke a ɖi lɔ̌ ní nyí ɖó lěxá ná we." Ke Jezǔ ɖɔ̀ lěxá n'ǐ tlóló o, azɔ gbɔ̀ nǎ mɛsɛntɔ lɔ́. ¹⁴ Éxɔ́n gódo, Jezǔ wá yi mɛsɛntɔ́ étɔn Piyɛ́ɛ wé xwégbe. Flɛ̌n wɛ é mɔ Piyɛ́ɛ wé asinɔ le, bɔ̀ é le anyǐmímlɔ́, bɔ̀ vivɔ le é ji. ¹⁵ Jezǔ ɖó alɔ alɔ étɔn wú bɔ̀ vivɔ lɔ̌ hɔ́n le é ji, bɔ é cite, bo jɛ jǒnɔ étɔn yí jí. ¹⁶ É wá jɛ hwedǒ o yě kplǎn omɛ ke jí oyɛ nyinylǎ lé lɛ́ɛ susu wă n'ǐ. É ɖégbe ɖǒ oyɛ nyinylǎ éxɔ́n lɛ́ɛ, bɔ̀ yě lɛ́ sɔ́n mɛ ke jí yě lé lɛ́ɛ ji, bɔ̀ é lɛ́ gbɔ̀ azɔn nǎ azɔntɔ́ lɛ́ɛ kpókpó. ¹⁷ Ná oxó ékɔ́ ke xóyíɖɔ́tɔ́ Mǎwǔ tɔn Ezayíi ɖɔ́ lɔ̌ ná dó cɛ; é wɛ́ nyí ɖɔ̀ :" é yí sɛ́kúkúzɔn ke le mǐ wú lɛ́ɛ, bo bɛ́ azɔngban mǐtɔn lɛ́ɛ hɛn." ¹⁸ Ke jezǔ mɔ ɖɔ̀ ahwan ke lɛ̌dó émye bó susu, é ɖɔ́ ná,ahwanvǐ étɔn lɛ́ɛ ɖɔ̀:"Mi wǎ ná mǐ ná ɖ'ásá otɔ̀ lɔ̌, bo nǎ yi akpa ɖyɛ̌ xwé." ¹⁹ ohwe éxɔn nu, sɛ́nkplɔ́nmɛtɔ́ dokpó sɛ́kpɔ́ ɛ, bo ɖɔ n'ǐ ɖɔ̀ :"Mɛ̌si,nǎ xódo we yifíke a nǎ yi lɛ́ɛ kpókpó." ²⁰ Jezǔ ka yigbe n'ǐ bo ɖɔ̀ :"ohla lɛ́ɛ ɖɔ́ nɔ tɛn yětɔn, bɔ̀ oxɛ ke nɔ zlɔ̌n gbɔn jɛhɔn mɛ lɛ́ɛ ɖó nɔ tɛn yětɔn, bɔ̀ oxɛ ke nɔ zlɔ̌n gbɔn jɛhɔn mɛ lɛ́ɛ ɖó adɔ̌ yětɔn. Amɔ̌, nyɛ ovǐgbɛtɔ́ tɔ́ tɔn, un ma ɖó fi ke mǎ mlɔ́ bo nǎ gbɔjɛ̌ gɛ́" ²¹ Ahwanvǐ étɔn ɖěvo ɖɔ n'ǐ ɖɔ̀ :"Aklunɔ, nɔte má yí ɖɩ̀ tá ce hwɛ̌kpó." ²² Jezǔ ka yígbe ɖɔ̀:"xodó un, bo jó omɛkúkú lɛ́ɛ dó ná yě ní ɖí omɛkúkú yětɔ́n lɛ́ɛ." ²³ Jezǔ byɛ̌ tɔjihún mɛ, bɔ̀ ahwanvǐ étɔn lɛ́ɛ xodó e. ²⁴ Enǎ mɔ nǔɖé kpoun, jɛhɔn ɖaxó ɖé jɛ́n jɛ nyinyi jí le otɔ lɔ́ jí, bɔ̀ otɔ lɔ́ fɔ́n adǎn, bo nɔ hɛn osin wǎ cyɔ́n tɔjihún lɔ́. Ohwe éhɔn nu, Jezǔ ka lě d'amlɔ̀. ²⁵ Ahwanvǐ étɔn lɛ́ɛ sɛkpɔ́ ɛ, bo fɔ́n ɛ, bo ɖɔ̀ nǐ ɖɔ̀ :"Aklunɔ, hwlɛ̌n mǐ gán; mǐ jɛ otɔ kú gbé." ²⁶ Jezǔ ka ɖɔ ná yě ɖɔ̀:"Étɛ́ wé obǔ wɛ mi lě ɖi? Mi mɛ nǔɖíɖihwedǒnátɔ́ lɛ́ɛ !" Éxɔn gódo, é cite, boɖe gbe dǒ jɛhɔn lɔ̌ kpó oxu lɔ̌ kpó ji, bɔ fí lɛ́ɛ kpó cí tóó. ²⁷ Nǔ éxɔn kpácá ahwanvi étɔn lɛ́ɛ káká; bɔ́ yě nɔ ɖɔ́:"Gbɛtɔ́ alɔkpa tɛ́ wɛ ka nyí omɛ éxɔ, bɔ́ jɛhɔnkpó oxu lɔsú kpó nɔ́ se gbe n'ǐ?" ²⁸ Ke yě jɛ otɔ lɔ́ gódo dɔ̌n, le Gadaláanu lɛ́ɛ wé anyǐzan jíi, oyɛnyinlǎnɔ awe ɖě lɛ́ɛ tɔ́n sɔ́n ossó xomɛ, fí ke e nɔ ɖi omɛkúkú lɛ́ɛ ɖó, bo wǎ kpé Jezu.Yěnɔ́ le jlɛ́ onǔ baɖabaɖa lɛ́ɛ káká bɔ̀ mɛtí mɔ́ nɔ́ sɔ́ syɛ́n ta bo nɔ gbɔn flɛ̌n gɛ́. ²⁹ Oyɛnyinylǎnɔ awe lɛ́ɛ jɛ axwá dó jí, bo dò: Ovǐ Mǎwǔ tɔn ! Étɛ́ wɛ́ le myé kpó yɔ kpó cɛ́ncɛn ? A wǎ fí,bona ɖ'aya nǎ mǐ hwě cóbɔ hwenu ke mǐ ná ji oya lɔ̌̌ ná wá wɛ ? ³⁰ Hanvǐ susu géɖé géɖé ká le nukɔn kpɛdě ná yě,bo lě ɖu nǔ. ³¹ Oyɛ nyanylǎ lɛ́ɛ jɛ kɛnklɛ̌n dó ná Jezǔ jǐ boɖɔ̀: "Na ényí a jló ná nya mǐ, hǔn bo nyi mǐ ɖo xlán hanvǐ éxɔn lɛ́ɛ mɛ." ³² Jezǔ ka ɖɔ ná yě ɖɔ:"Mi bo yi;" tlóló o, yě tɔ́n sɔ́n omɛ awe lɛ́ɛ mɛ,bo byɛ́́ hanvǐ lɛ́ɛ mɛ. Zɔn ɖokpó o,hanvǐ lɛ́ɛ nyi zǎn sɔn osó lɔ́ jí káká wá jɛ oxu mɛ,bo kútɔ̀. ³³ Ke hanvǐnyítɔ lɛ́ɛ mɔ lěe, yě bɛ́ wezun,bo yi toxo lɔ́ me,bo yi ɖɔ̀ nǔ ké jɛ lɛ́ɛ kpókpo na mɛ lɛ́ɛ.Yě lɛ́ ɖɔ̀ lě ke oyɛninylǎnɔ awe lɛ́e wé oxo nyí ɖó lɔ́ ná yě, ³⁴ bɔ togun lɔ̌ kpókpó bɛ́ yěɖé bo wá kpé Jezǔ. ke yě mɔ́ ɛ, yě jɛ kɛnklɛ̌n dó n'ǐ jí,bo ɖɔ̀ ní bó tɔ́n sɔ́n anyizan emyé tɔn ji.