¹ Pakubala kwali cebo,elo kabili cebo ali pamo na Lesa,na cebo wine alini Lesa. ² Uyu wine ali na Lesa pakubala ntanshi. ³ Ifintu fyonse fyapangilwe ukupitilamuli ena, kabili ukwabula ena tapali nangu cimo ica pangilwe. ⁴ Muli ena mwali umwe, kabili nomweo wali lubuto lwa bantu. ⁵ Ulubuto lusanika mu mfifi, nemfifi yalifililwe ukulu cimfya. ⁶ Kwali umuntu umo uatuminwe ukuma kuli Lesa, uwe shina lya Yoani. ⁷ Ena ayishilene mboni ukupela bumboni pa lubuto, pakutila bonse beenga cetekela ukupila muli ena. ⁸ Yoani tali ulubuto, lelo ayishile pakweba ai apele bumboni pa lubuto. ⁹ Kwali ulubuto lwa cine cine, ulusanikila pa bantu bonse, lwalaisa pano isonde. ¹⁰ Ali pano isonde, ne sonde lya pangilwe ukupitila muli ena, ne sonde talyamwishibe. ¹¹ Ayishole kwabo, naba kwabo taba mupokelele. ^{12 13} Lelo kuli abo bene aba mupokelele, aba cetekele mwishina lyakwe, abapele insambu shakuba abana bakwa Lesa. Abafyelwe teku mulopa, nangu ukufwaya kwa mubili, nangu kubufwayo bwa mwaume, lelo kufwaya kwakwa Lesa , nokwisa. ¹⁴ Kabili cebo aishilebo muntu, nokwikala muli baifwe, kabili twaloleshe ubukata bwakwe, ubukata ngobwafyalwa eka kuli wishi uwaisulamo ukusenamimwa ne cine. ¹⁵ Yoani apele bumboni pali ena nokubilisha ai, uyo eo na sosele ai, uyo uko isa panuma yandi, mukulu palinebo, fintu ena eko ali elyo nebo ntalabako." ¹⁶ Kabili mu mwisulo wakw twapokelela ukusenamina no kusenamina. ¹⁷ Pantu amalango yabelwe na mose. Ukusenamina necine nimuli Yesu kristu. ¹⁸ Takwaba umuntu nangu umo uwamona Lesa; Kanofe Lesa, uwaba kuli wishi, ena ewa musokololwe. ¹⁹ Kabili ubo ebu kambone bwakwa Yoani, elyo aba Yuda aba mu Yerusalemu balumineko bashimapepo na bene Lebi kuku mwipusha ai, niwebo nani? ²⁰ Alisunmina, takene, elo aeba ai ntali nebo Yesu. ²¹ Elo ba mwipusha ai, "webo nani? Niwebo Eliya," elo akana ati ntali nebo."Elo ba eba ai." Bushe niwebo kasesema.? ayasuka ai awe. ²² Elo bamweba ai, niwebo nani, pakuti tuye kweba aba tutumine? Ukusosapo shani webo wemwine? ²³ Elo aeba ninebo lishiwi ili kobilikisha mumatololo ai lungamikeni nshila yakwa shikulu ifyofine Eliya kasesema asosele. ²⁴ Elo abatumine baliba mu ba Farise; ²⁵ Elo ba mwipusha, basosa ai nindo ukobatishisha nga tauli Yesu, nangu Eliya nangu kasesema? ²⁶ Yoani alibaswikile ai, namibatisha mumenshi. Lelo pali baimwe pali umo uyo tamwishibile. ²⁷ Euko isa panuma yandi uo nebo nshilingile nokukakula intambo ya ndyatoyakwe. ²⁸ Ifi fintu fyonse fyacitikile mu Betani kwishila lya Yordani uko Yoani ali ku batishisha. ²⁹ Ubushiku bwa konkelepo Yoani amwene Yesu aleisa kuli ena. Elo aeba ai moneni, umwana wampanga wakwa Lesa, ukofuma ulubembu lwaba pano isonde. ³⁰ Eoyu na ebele ai, uyo ukoisa panuma yandi mukulu ukuncila, pantu ena aliko elyo nebo ntalabako. ³¹ Nebo ntamwishibile, eco cabelele ifi fine ukweba ai nebo, naishile ukweba ai ndekubatisha na menshi, pakweba ai asokololwe kubena Israeli. ³² Yoani apela bumboni aeba ai namwene umupashi ngekunda koika kufuma mumulu, nokwikala pali ena. ³³ Nebo ntamwishibile, lelo uyo uwa ntumine kukubatisha namenshi ewangebele ai uo ukomona abo mupashi akoisa kwikala ninshi euyo wine ukoisa mukubalisha no mupashi wa mushilo. ³⁴ Nalimona, nokupela bumboni ai uyu mwana wakwa Lesa. ³⁵ Nakabili pabushiku bwkonkapo, ilyo Yoani aimine naba sambi bakwe babili. ³⁶ Elo bamwene Yesu alepita mupepi nabo, elo asosele ai, Moneni umwana wampanga wakwa Lesa! ³⁷ Nabasambi bakwe balyumfwile alesosa aya mashiwi apopene bakonkona Yesu. ³⁸ Elo Yesu apilibukile nokubepusha ai nindo mukofwaya? Elo bayasuka ai Rabi(icapilibula ai kasambilisha), "nikwisa mwikala"? ³⁹ Abeba ai"iseni mumone". Elo balemona uko ai kwikala elo baikele nankwe bulya bashiku, pantu ninshita yalenga shine mucungulo. ⁴⁰ Pali balya babili umo uwaumfwile Yoani akososa no kukonka Yesuali ni Andrea wabo wakwa simoni Petero. ⁴¹ Icakubalilapofe ulucelo asangile wabo simone nokumweba ai,tuulisangile mesiya (Icapilibula ai Kristu ) ⁴² Elo amutwele kuli Yesu,Yesu pakumulolesha elo asosele ai ,"Niwe simone mwana yoane.Bakulakukuta ai kefasi"(Icipilibulwa ai "Petelo") ⁴³ Ubushiku bwakonkelepo,Yesu alekufwaisha ukufumako kulya nokuya ku Galile,asangile filipi elo nokusosa kuli ena ai,"Nkonka." ⁴⁴ Nomba Filipi afumine ku betsaida,umusumba wakwa Petelo na Andeleya. ⁴⁵ Filipi asangile natanaele nokumweba ai,"Uyo uo mose alembeleepo muma funde ,naba kasesema ,natumusanga:Yesu mwana Yusufu,uwaku nasaleti." ⁴⁶ Na natanaele amwebele ai ,"Bushe mu nasareti kuti mwafuma icintu icabune?"Filipi asosele ai ,"isa soimwene." ⁴⁷ Yesu amwene natanaele akoisa kuli ena elo kaili nokulanda pali ena,"Mona,umwina israeli wacine,muli ena bufi!" ⁴⁸ Natanaele asosele kuli ena,"Wandishiba shani ?"Yesu ayaswike nokusosa kuli ena," Panuma filipi talakwita,ulo wali mwisamba lya mukunyu,nalikumwene ." ⁴⁹ Natanaele alyaswike ai,"Kafundisha ,uli mwana wakwa Lesa! Uli mfumu yabena israeli!" ⁵⁰ Yesu alyaswike nokumweba ai,"Pantu nasosa kuli webo,"Nalkumwene munshi yacimuti ca mukunyu ,'ukotetekela?ukamona ifintu ifingi ukucila napali ifi." ⁵¹ Elo asosele,"Mucine cine,mucine nasosa ai ukamona imyulu naisulwa,naba malaika bakwa Lesa bakoika nokunina pa mwana wa muntu."