¹ Awe kwaliko umuntu mu musumba wali kwitwai Caesarea, Korneli eshina lyakwe, ali umukalamba wampuka yabashilika iitwa ishina Italiani. ² Ali umuntu umusuma, uwalikutina Lesa nabanganda yakwe pamo, alikupela nefya nkumbu ku bantu, noku kupepa umukonsha kuli Lesa. ³ Elo akasuba kasansukako, amwen icimonwa camungele wakwa Lesa aleisa kuli ena. Umungele asosele kuli ena ai, ''Kornali!'' ⁴ Korneli alimuloleshe kabili alyumfwile umwenso atina nokusosai, ''Amapepo yobe namabupe nayanina nge cibukisho camalambo kuli Lesa. ⁵ Kanshi tuma bamo abaume ku ncende yaku Yoppa ukuya leta umuntu weshina lyakwa Simoni uwali kwitwai Petelo. ⁶ Alikwikala na Simoni uwali kwitwa ai kanuka, uwali kwikala kumbabi yamumana.'' ⁷ Ulo umungele uwalikulanda nankwe amushile, Korneli aitile babili paba bomfi bakwe, namushika umo uwali kupepa pabashilika bakwe. ⁸ Kaili alondolwele fyonse ifyacitile no kubatuma ku Yoppa. ⁹ Mubushiku bwakonkelepo pa nshita yalenga mutanda, bali bacili bakoya bapaleme nakuli ilya ncende, Petelo aninine pamutenge wanganda ku kupepa. ¹⁰ Alyumfwile insala kaili aliku fwaya ukulya, ulo bamo bacili bakoipika ifyakulya, aluyumfwile utulo kaili alilele, ¹¹ Amwene umulu waisuka nokumona icidishi, capalile mukumoneka kwai cisalu icikulu cikoisa pa calo, icakwete ne fintu fine. ¹² Umu emwali inama shamolu yane ishatumbinkana nefisenya nefyoni fyamulwelele. ¹³ Neshina lyaishile kuli ena ai: ''Ima, Petelo, ipaya nokulya ulye.'' ¹⁴ Petelo ayasukile ai, ''Tekuti cibefyo, Shikulu; Pantu ntatala ndyapo icinangwa nangu icakowela.'' ¹⁵ Nakaili ishiwi lyabwelele kuli ena umuku wabubili ai, ''Ico Lesa asangulula, tekuti ucite icinangwa.'' ¹⁶ Ifi fyacitike pamiku itatu; kaili icidishi casendelwe mumulu. ¹⁷ Elo Petelo acili napeshiwa amano pacimonwa cakwe nobupilibulo bwaciko, moneni, abaume abo Korneli atumine nabemenena pa mpongolo, elo baipwishe pa kwisa panganda. ¹⁸ Baipwishe pali Simoni, uwalikwitwa Petelo, nga cakwebai epo ali. ¹⁹ Ulo Petelo acili akotontonkanya pa cimonwa cakwe, Umupashi wasosele kuli ena ai, ''Mona, abaume batatu bakokufwaya. ²⁰ Ima kabuye tentemuka nokubamona. Wikana ukuya nabo, pantu ninebo mbatumine.'' ²¹ Petelo aile kuli bena nokubeba ai, ''Ninebo uo mukoipusha. Findo mwendele?'' ²² Basosele ukweba ai, ''Korneli umushilika, umuntu uwalungama kaili utina Lesa, kaili uwaishibikwa bwino kuba Yuda, ewebelwe kumungeli ukusenda iwe ukuya kunganda yakwe, pakuti omfwe icebo kuli webo.'' ²³ Petelo abebele ukwingila no kwikala nankwe. Mulucelo ulwakonkelepo balibukile nokwambako eukuya, nabambipo ukufuma mu Yoppa balikonkele. ²⁴ Ubwakonkapo bafikile mu Kaisale. Korneli alikubalolelafe; aitile na bonse abantu bakwe nefibusa fyakwe fine. ²⁵ Ulo Petelo aingile, Korneli alimukumenye no kuwila pa makasa yakwe no kumupepa. ²⁶ Elo Petelo amwikete nokumwimya, amwebele ai, ''Ima buka, nandi wine ndi muntu. ²⁷ Ulo Petelo alikulanda nankwe, alingile nokusanga abantu abengi balilongene. ²⁸ Asosele kuli bena ai, ''Ukwishiba mwalishiba mwebene ukwebai tacasuminishiwa kumu Yuda ukusangwa nangu ukwikala na bena fyalo. Lelo Lesa anangile ukwebai takwaba umuntu icinangwa nangu uwakowela. ²⁹ Eco ngishile kuno ukwabula ukutwishika, ulo natuminwe kuli mwebo. Kanshi ngebe ico mwalemfwaila.'' ³⁰ Korneli ayaswike ai, ''Papitafye inshiku shinenge nshita imo ine, nalepepa panshita yalenga pabula munganda yandi; namwene umuntu naimanina pantanshi yandi nafwala ifyabengeshima. ³¹ Asosele kuli nebo ai, ''Korneli, amapepo yobe nayomfwika kuli Lesa, nefyabupe nafifika ku ntanshi yakwa Lesa. ³² Kanshi tuma bamo ku Yoppa, nokuya ita umuntu witwa ai Simoni Petelo. Asangwa pa nganda yakwa kanyuka uweshina lyakwa Simoni, kumbali ya mumana, ³³ Kanshi efyo natumine mwebo ukwisa. Ukwisa kwenu kunkankala kuli fwebo. Kanshi eico, fwebo natukolongana ukumfwa fyonsefe ifyo Lesa amisuminishe ukulanda kuli baifwe. ³⁴ Elo Petelo aiswile akanwa kakwe nokutendeka ukusosa ai ,''Icine nasumina ukweba ai Lesa takwata kapatulula. ³⁵ Kanshi fe, nga cakwebai mu mutundufe onse umuntu nga akotina Lesa nokucita ifisuma alomfwika kuli ena. ³⁶ Eico mwalishiba amashiwi yonse ayapelwe kubena Israeli, ulo balelanda imbila nsuma pamutende waba muli Yesu Klistu, uwaba e Shikulu wa bonse- ³⁷ Mwebo bonse mwalyumfwile fyonse ifyalikucitika, ukukumana Yudeya yonse, ukwambila mu Galileya, panuma yakubilisha ulubatishi lwakwa Yoani; ³⁸ Ifintu ifyali kucitika pali Yesu waku Nasaleti, ifyo Lesa amushishishe ku Mupashi wa Mushilo namaka. Lyonse alekucita imilimo isuma nokuposha bonse abali kwikatwa kufibanda, pantu Lesa alikuba nankwe. ³⁹ Fwebo tuli bakambonebafyo Yesu alikucita, mu Yudeya namu Yerusalemu. Bamwipeye no kumupopela pa cimuti. ⁴⁰ Lelo Lesa walimubushishe kubafwa panuma yanshiku shitatu nokumulangisha kuli fwebo. ⁴¹ Lelo tekuli bonse, kamo kuli bakambone abasalilwe libela kuli Lesa- fwebo fwebali kulya nokunwa mpaka nelo abukile kubafwa. ⁴² Atukonkomeshe ukubila ku bantu nokuba bakambone bwakwebai uyu eo Lesa asala ukuba kapingula wabomi nabafwa. ⁴³ Noyu eo bakasesema banse basesemepo, pakwebai onsefe uwamusumina elelwe imembu ukupitila mwishina lyakwe.'' ⁴⁴ Ulo Petelo acili akososa ifi fintu, Mupashi wa Mushilo waponene pali bonse abali munganda abali kumfwa ku mashiwi alikusosa. ⁴⁵ Abantu abasumina abasembululwa- bonse abaishile na Petelo- Balisungukile, pakwebai icabupe iica Mupashi wa Mushilo capelwe nakubena fyalo. ⁴⁶ Baumfwile ukuntu abena fyalo bali kusosela mufitundu no kulakulumba nga Lesa. Kaili Petelo alyasukile ai, ⁴⁷ ''Twingalesha amenshi pakwebai aba bantu ba batishiwe, aba abapokelela Umupashi wa Mushilo kwai nifwebo?'' ⁴⁸ Awe alibabatishe mwishina lyakwa, Yesu Klistu. Kaili balimwipwishe ai bekale nankwe panshinku shimo.