¹ Panuma ya nshiku shitatu, kwali ubwinga ku Kana wamu Galileya, elo na Maria nyina wakwa Yesu eko ali. ² Yesu elo nabasambi bakwe balibakutileko ku bwinga. ³ Uluntu umwangashi wapwile, nyina wakwa Yesu alandile kuli ye ati, ''Tabakwete umwangashi.'' ⁴ Yesu aebele nyina ati, ''Mayo, nga nindo ico mwaishila kuli nebo? Inshita yandi tailati ukufika.'' ⁵ Nyina aebele ababomfi ati, ''Ifili fyonse ifyo akomyeba, mucite.'' ⁶ Nomba palipo ne imitondo yebumba mutanda iya menshi ayakusamba pakukonka ulutambi lwaba Yuda pakuisangulula, Cila mutondo kuti mwaingila amatepe ya menshi yabili nangu yatatu. ⁷ Yesu alandile kuli bo ati, '' Aleni iusheni iyi imitondo na menshi.'' Eico baiwishe imitondo yonse ukushinta fye na pa milomo. ⁸ Eluntu aebele ababomfi ati, ''Tapulenimo nomba elo mutwalile umukulu wa mutebeto.'' Eico balicitile ico. ⁹ Umukulu wa mutebeto elo asondele amenshi ayo aya alukile umwangashi, lelo taishibile uko wafumine (lelo ababomfi abatapile amenshi bo ninshi balishibile). Eluntu akutile shibwinga ¹⁰ elo no kulanda kuli ye ati, ''Umuntu onse abalilapo umwangashi uwabune elo alekeleshako uutawamishe uluntu abantu bakolwa. Lelo webo ulisungile umwangashi uwabune ukushinta na ino nshita.'' ¹¹ Ici cicilangililo ecakutampilapo ico Yesu acitile ku Kana wamu Galileya, elo no asokolwele no bucindami bwakwe, elo na basambi bakwe balisumine muli ye. ¹² Panuma ya ifi Yesu, na nyina, naba wabo elo na basambi bakwe batentemukile ku Kapenamu elo balikele kulya pa nshiku ishinono. ¹³ Nomba Ipasaka lya ba Yuda lyali palalamine, elo Yesu aile ku Yelusalemu. ¹⁴ Yesu asangene abalikushitisha ing'ombe elo ne mpaanga elo ne nkunda mwitempele, elo nabalikukabushanya indalama balikele mulya. ¹⁵ Eico epakubula imyando apanga ubwembya elo nokutamfisha bonse panse ye tempele, ukubikako fye impaanga elo ne ng'ombe. Apasanganganya imiwaya yaku baka kabusha wa ndalama elo nokupilibaula amatebulo yabo. ¹⁶ Abalikushitisha inkunda bena abebele ati, ''Fumyeni ifi fintu muno. Lekeni ukulekucita ing'anda yakwa Tata ukuba ati cisankano.'' ¹⁷ Abasambi bakwe baibukisha ifyalembwa ati, ''Nebo nalitemwisha ing'anda yobe, we Lesa, icakuti nkafwilapo.'' ¹⁸ Eluntu intungulushi sha ba Yuda shalyasukile no kwipwisha Yesu ati, ''Bushe cilangililo ndo ico winga tucitilako, apo ukocita ifi fintu?" ¹⁹ Yesu abasukile ati, ''Bongololeni ili itempele, nandibo nkalikula mu nshiku shitatu.'' ²⁰ Eluntu aba Yuda bamwasukile ati, ''Ili itempele lyapitile imyaka amakumi mutanda pakulikula, elo webo niwe wingalikula mu nshiku shitatu?'' ²¹ Lelo, alikulanda pe tempele lya mubili wakwe. ²² Panuma yaku mwalamusha ukufuma kuba kufwa, abasambi bakwe balibukishe ukuti alilandile ifi, elo balisumine na mufyalembwa elo baibukishe nefyo abashimikile pali uyu mulandu. ²³ Nomba uluntu ali mu Yelusalemu pa nshiku nkulu iye Pasaka, abantu abengi balimusumine uluntu babwene ifipapusho ifyo acitile. ²⁴ Lelo Yesu umwine tabacetekele pantu alibeshibile bonse, ²⁵ pamulandu wakuti talikukabila nokuti kube abakumweba ifyo bantu baba, pantu alishibile ifyo batontonkanya.