¹ Howo kelim le homon , " Al hak anan kelim le intum, fi baad min nas min intum ma bi jeribu mutu gubal ma homon ma ainu malakut ta Allah bi ja ma guwa." ² Baad seta ayam, Yesuah shilu Pitar wa Yuhana fok fi jebel, wa homon baru. Yala shekil Tuo geiru fi gedam tomon. ³ Gumas Tuo tala abeyad, gi lama shedid ze telij, ma fi haja tani abeyad fi Doniya ze de.. ⁴ Biga Elijah wa Moses zahar le homon wa homon kan gi wonusu ma Yesuah, ⁵ Pitar juwabu wa kelim le yesuah, " Rabbi", howo kwes le nina ashan bi kun hini, wa hasa keli nina amulu talata Rakubat, wahid le Inta, wahid le Moses, wa wahid le Elija." ⁶ ( Howo ma arufu howo bi kelim shunu, homon kan mustagarabiin wa gi kafu.) ⁷ Sehab ja wa kati homon. yala homon asuma sut min juwa sehab , " De yahu jena tai al ana bi hibu. asuma takum le Howo." ⁸ Be sura keda, Zaman homon ainu min hawli homon, homon ma ainu ayi zol ma homon Lakin Yesuah bes. ⁹ Ze ma homon gi nezil tehet min ras jebel, Howo kelim le homon ashan keli homon ma wori haja al homon ainu de le ayi zol, lahadi jena ta Ibin insan kan ja gum min mutu. ¹⁰ Biga homon askut ma kalam de fi nefsa tomon, lakin homon kan nakishu fi bein tomon inu " Gum min mutu de " mana tuo shunu. ¹¹ Homon asalu Howo, " Leh Kataba kelimu gal Elijah yahu bi ja al awiel?" ¹² Howo kelim le homon, " Elijah ja awiel ashan bi reja hajat kulu. teib leh katibu inu Ibin al insan lazim bi ligo taab ketir wa bi alisu? ¹³ Lakin ana kelim le intum inu Elijah ja wa homon amulu le howo kulu hajat al homon deiru, ze ma moktub." ¹⁴ Zaman homon ja le talamiz, homon ainu nas kutar hawli homon, wa nas kataba kan gi nakishu ma homon. ¹⁵ Wa ze ma homon ainu Yesuah, nas kulu kan mustagarabiin wa ze ma homon jere le Howo ashan bi selimu Howo. ¹⁶ Howo asalu talamiz Tuo, " Intum gi nakishu ma homon an "?shunu ¹⁷ Wahid zol min nas de juwabu Howo, " Mu-alim, ana jebu jena tai le inta. howo indu roho wa roho de abusu howo ma bi agdeir wonusu. ¹⁸ Gi rubuto howo wa gi jada howo fi wata, wa buzak gi tala min kasuma tuo, howo gi adi sunun wa biga tala jamid. ana asalu talamiz taki ashan bi turuju shetan de bara, lakin homon ma agdeir." ¹⁹ Howo juwabu homon, " Intum jeel al ma indu imaan, ana bi geni ma intum lahadi meetian? Lahadi meetian ana bi ithamal intum? Jebu howo le ana." ²⁰ Homon jebu weled de le Howo. zaman roho de ainu Yesuah, be sura keda roho de jada howo fi wata wa buzak al abeyad fi kasma tuo. ²¹ Yesua asalu Abu tuo, " Roho de amulu jena de hasa le muda kam zaman?" Abu ta jena de juwabu," Min zaman howo sukir. ²² Roho de gi jada howo fi nar aw fi juwa moyo wa hawil ashan bi demiru howo. Iza kan inta bi agdeir amulu ayi haja, amulu rahma le nina wa saidu nina." ²³ Yesua kelim le howo, " Iza kan inta bi agdeir'? Ayi haja mumkin le zol al amin." ²⁴ Wa bi sura keda Abu ta jena de kore bi sut shedid wa kelim, " Ana amin! Saidu adam imaan tai de!" ²⁵ Zaman Yesuah ainu nas ketir gi jeri le homon Howo intehir al roho al sherir de a kelim, " Inta ya roho ta ateresh ana gi amiru inta, tala min howo, wa mata dakalu le howo tani mara." ²⁶ Roho al sherir de kore shedid wa shakil ma weled de shedid yala biga roho de tala bara. Weled de tala ze zol al kan mutu, biga nas kutar kelim, "Inu howo mutu." ²⁷ Lakin Yesuah amusuku howo fi iden wa arfa howo fok, wa Weled de wogif fok. ²⁸ Zaman Yesuah ja fi bet, talamiz Tuo asalu Howo," Leh nina ma agdeir ashan bi turuju roho al sherir de?" ²⁹ Howo kelim le homon, " shekil roho de ma bi agdeir turuju ila bi suum wa sala." ³⁰ Homon ruwa min hinak wa ruwa min Galille. Howo ma deir keli ayi zol arufu mahal tomon, ³¹ Ashan Howo kan gi alimu talamiz Tuo. Howo kelim le homon," Ibini Insan bi selimu fi iden ta nas, wa homon bi katulu Howo zaman kan homon katulu Howo, Howo bi gum fi yom al talit." ³² Lakin homon ma agdeir fahimu kalam de, wa homon gi kafu ashan asalu Howo. ³³ Biga homon ja fi kaphernaum, baad howo dakalu fi bet Howo asalu homon , " Intum nakishu shunu zaman intum fi sika?" ³⁴ Lakin homon askut. Homon kan gi nakishu ma baad tomon inu munu yahu al azam. ³⁵ Homon geni tehet fi wata, Howo nadi al itnashar talamiz ma baad wa kelim le homon, " Iza kan ayi zol deiru tala al aweil, lazim howo bi kun akeir ta nas wa kadam ta kulu." ³⁶ Howo shelu jena sukeir wa kutu howo fi wasat tomon. Howo arufa jena de fi iden Tuo wa kelim le homon, ³⁷ " Ayi zol al gabilu jena al sukeir ze de ma isem tai howo gabilu ana; Ayi zol gabilu ana howo ma gabilu ana lakin howo gabilu zol al rasulu ana." ³⁸ Yuhana kelim le Howo, " Ya Mu-alim, nina ligo zol tani gi turuju shayatiin bi isem taki wa nina wogifu howo, leanu howo ma gi duwru ma nina," ³⁹ Lakin Yesuah kelim, Ma takum wogifu howo, Mafi ayi zol tani al bi amulu shukul kebir bi isem tai wa kamanbi kelimu kalam batal an ana. ⁴⁰ Ayi zol al ma did nina. ⁴¹ Ayi zol al wodi le intum kubaya ta moyo ashan intum bi asurubu fi isem tai ashan intum tabe le al Mesi, hagiga ana gi kelim le intum, howo ma bi fagidu ujura tuo. ^{42 43 44} Ayi zol al gi amulu hajat al batal wa gi gufulu sika ta iyal sukar al aminu fi ana, bi kun kwes iza kan rubutu hajer ta murkaka fi ragabtu tuo wa jaddau howo fi bahar. 43Iza kan iden taki gi sibu inta gi amulu hajat batal, gata howo bara. bi kun kwes iza kan inta dakalu fi haya al bedaya biwahid iden min bi ruwa fi nar bi itniin iden ^{45 46} Iza kan kura taki gi shilu inta ashan amulu hajat al batal, gata howo bara. bi kun kwes le inta iza kan inta ruwa fi nar bi itniin kuraiin. ⁴⁷ Iza kan ena taki gi sibu inta ashan bi amulu hajat al batal,gata howo bara, bi kun kwes iza kan inta dakalu fi mulukut ta Allah bi wahid ena, min inta bi kun indu itniin eyon wa bi jadau inta fi nar. ⁴⁸ Al dudu tuo ma gi mutu, wa nar tuo ma gi batilu. ⁴⁹ Ashan kulu zol bi kutu bi mele ta nar. ⁵⁰ Mele kwes, lakin iza kan mele fagidu mele tuo, inta bi reja mele tuo de kef? Keli ".intum kun mele le nefsa takum, wa keli intumindu salam ma baad takum