¹ Phariseen wa baad min kutaba al kan ja min Jerusalem lemu jambu howo. ² Homon ainu baad min talamiz tuo aklu ish ma iden waskan, inu, ma kasulu iden. ³ ( Al phariseen wa kulu yahudiin homon ma bi akulu ila kan homon kasulu iden tomon, ashan homon gi hafisu tagalid ta sheyuk. ⁴ Kan phariseen ja min suk homon ma bi akulu, ila kan homon beredu, wa fi hajat ketir al homon gi amulu, ze kasulu kababi, aziyar, abarig, suhana ta nihas wa taribiza al homon gi akulu fogo de.) ⁵ phariseen wa kutaba asalu Yesuah, " Malu talamiz taki ma gi amulu hasab tagalid ta sheyuk, homon gi akulu ish bedun kasulu iden?" ⁶ Lakin Howo kelim le homon, " Isaiah naba an kebiriya takum, Ze ma muktub, ' nas del gi ihterimu ana bes bi kalam, lakin gelba tomon beyed min ana. ⁷ Ebada tomon al le ana de, ma indu faida wa homon gi alimu talim al ta nas. ⁸ Intum sebu wosiya ta Allah wa intum gi amulu tagalid ta nas." ⁹ Wa kaman Howo kelim le homon, " Intum aba wosiya ta Allah ashan intum bi hafisu tagalid ta nas! ¹⁰ Musa kelim, ' Ihterim Abu taki wa Uma taki; wa, ' kulu zol al shetimu Abu tuo w Uma tuo bi mutu.' ¹¹ Lakin intumkelim, ' Iza kan zol gi kelim le Abu tuo aw Uma tuo, " Ayi musaada al inta bi ligo min de howo Ghorban"' (Al howo, "hadiya le Allah'), ¹² De bi mana inta ma sebu howow ashan bi amulu ayi haja le Abu tuo aw Uma tuo. ¹³ Intum gi karabu kelima ta Allah bi tagalid takum al wodi le intum. wa fi hajat ze de al intum gi amulu. ¹⁴ Howo nadi nas tani mara wa kelim le homon, " Asuma takum le ana, intum kulu, wa keli intum fahim. ¹⁵ Mafi haja min bara hini al dakalu fi batana ta insan bi nejesu howo. Lakin de haja al gi tala min howo yahu gi nejesu howo. ¹⁶ Iza kan fi zol al indu adan al gi asuma keli asuma." ¹⁷ Biga zaman Yesuah tala min nas al ketir de wa dakalu fi bet, talamiz tuo asalu Howo an mesal de. Yesuah kelim, " ¹⁸ Hal intum kaman lisa ma gi fahimu? Intum ma gi fahimu inu kulu haja al gi dakalu le insan min bara ma bi nejesu howo, ¹⁹ Le anu ma bi agder wosulu fi gelba tuo, lakin gi ruwa fi mieda tuo yala bi tala bara fi bakana?" wa bi kalam de Yesuah kelim inu kulu akel nedef. ²⁰ v 20Howo kelim, " Al gi tala min insan yahu gi nejesu howo. ²¹ Leanu fi dakil insan, gi tala afkar al batal, inheraf fi jens, serga, katulu, ²² Zena, tama, sahara, kadab, shahwa, amulu hajat al batal, karabu sumaa, kebriya, shukul ahmak. ²³ Kulu hajat al batal de gi tala min dakil wa yahu gi nejesu zol." ²⁴ Howo tala min hinak wa ruwa fi iklim ta tyre wa sidon. min hinak Howo ruwa fi bet, wa Howo ma deir ayi zol keli arufu, lakin howo ma bi agdeir dusu nefsa. ²⁵ Hagiga, kan fi mara biniya tuo indu arwah al sherira hiya kan asuma an Yesuah,hiya ja wa dengir gedam kura ta Yesuah. ²⁶ Wa kan mara min Yonan, Fenikiya min Suriya. hiya asalu yesuah ashan bi turuju shetan min biniya ta hiya. ²⁷ Howo kelim le hiya, " keli atfal akulu aweilan. Ashan howo ma kwes ashan bi wodi ish ta atfal wa bi jadaw le kelab." ²⁸ Lakin hiya juwabu wa kelimu le Howo, " Naam, Ya Rab, hata al kelab fi tehet tarbeza bi agder akulu bagi akelat al gi waga waga min iyaal sukar tehet tarabiza de." ²⁹ Howo kelim le hiya, " Ashan kalam al inta kelimu de, ina bi agdeir ruwa kalas . al shetan kalas tala min biniya taki." ³⁰ Hiya ruwa fi bet wa hiya ligo biniya ta hiya gi nim fi serir, wa shetan jeri. ³¹ Biga howo ruwa tani mara min iklim ta Tyre, wa min Sidon le bahar ta Galilee fi iklim ta Decabolis. ³² Homon jebu le Howo zol ataresh wa ma i wonusu kwes, wa homon asalu Howo ashan bi kutu iden fogi zol de. ³³ Biga Howo shilu zol de bara min mahal al nas ketir fogo de, Howo kutu asbaa tuo fi adana ta zol de, wa Howo tufu buzak wa lemesu lesan ta zol de. ³⁴ Big Howo ainu fog fi sama wa kelim le howo " Ephphatha," de bi kelim gali, " afta!" ³⁵ Biga adana tuo kan fata, wa lesan al kan murbut de feku, wa howo bada wonusu kwes. ³⁶ Yesuah kelim le homon ashan keli ma wori le ayi zol.wa kulu ma Yesuah gi kelim le homon ashan keli homon ma wonusu, homon gi wori aktar wa aktar. ³⁷ Homon istagarab, wa gi kelim, Howo amulu kulu hajat .kwes. Hata Howo amulu zol al ma gi suma gi asuma, wa ataresh gi wonusu