¹ Asuma kalam ta Yahwa, intum shab ta Israel. Yahwa indu mahkma(sokuwa) did sukan ta ard, leanu mafi hagiga au hagiga ta tifagiya, mafi marafa ta Allah fi ard. ² Fii laana, kidib, kitil(katulu), sherga wa daara(zina) shab de kulu kasuru hudud kulu, wa dofugu dom wara dofugu dom. ³ Biga ardi bi yabis, wa ai zol al bi geni hinak tala deif; wuhus al fi ghaba wa tiyur al fi jou, hata asmak al fii bahr, shalu. ⁴ Lakin mata sibu ai zol jibu sokuwa; mata sibu ai wahid tahamu ai wahid tani. Fa huwo inta, gusus, al ana bi tahamu. ⁵ Intum gusus bi waga fi nahar; anbiya kaman bi waga ma intum fi lele, wa ana bi demiru uma taki. ⁶ Shab tai demiru leanu adam marafa. Leanu intum gusus aba marafa, ana kaman bi aba intum ze gusus le ana. leanu intum nesitu gonun tai, hata lo ana Allah takum, ana kaman bi nesitu iyal takum. ⁷ Hata gusus bi tala ketir, humon bi amulu katiyat ketir did ana. Humon bi badilu ihtiram le fadi(fadiya). ⁸ Humon bi akilu nefusum be katiya ta shab tai; humon tamain be asharar tomon. ⁹ Huwo bikun sawa le shab ze le gusus: Ana bi wodi le humon ikhab ashan mumarasat tomon; Ana bi rija dafau humon ashan amail tomon. ¹⁰ Humon bi akulu lakin ma bi saban; humon bi irtekib zina lakin ma bi zidu, leanu humon ruwa beid min Yahwa. ¹¹ Humon bi hibu maris jins al ma ganuni, kamur, wa kamur jedid, al shilu ilim tomon beid. ¹² Shab tai bi shawir(gabilu) asnam al kasab, wa kasab tomon ta dowria bi wodi le humon nubuwat. fikra(mukh) ta jins al ma ganuni shilu homon beid, wa humon bi amulu ze mara zani bidal yekun umana le Allah tomon. ¹³ Humon bi gedimu zebiha fi ras jubal wa bi haragu bohur fi ras talal, tehet bulut, hur wa batan, leanu dulu kwes. Yala banat takum bi amulu zina(daara), wa nusuwan ta awulad takum bi amulu zina. ¹⁴ Ana ma bi wodi ikhab le banat takum kan humon azilu ashan amulu zina, wele nusuwan ta awulad takum kan humon amulu zina. rijal kaman wodi nefsa tomon le zuna, wa humon bii gedimu zebiha ashan humon bi amulu zina be zuna be siri. Yala shab al ma bi fahim bi jadau tehet. ¹⁵ Hhta inta,Israel, irtakab zina, kede judah ma tala galtanin. Mata ruwa le Gilgal, intum shab; mata ruwa le Beth Aven, wa mata alifu, gul, Ze Yahwa aish." ¹⁶ Israel biga giladab, ze bagara suker. Yahwa bi jibu humon kef le akil ze koruf fi mahal ges? ¹⁷ Ephraim limu nefsu ma asnam; sibu huwo barau. ¹⁸ Hata kan shirab tomon al gowi bga mafi , humon bi istemir amulu zina; Ruasa tou bi hibu fadiya tomon. ¹⁹ Hawa bi lifu humon be jina tou; .wa humon bikun khajlanin ashan zebihat tomon