¹ Bulis aiynu adil le ada al mejles wa kelim, " Akuwana, ana geni gidam Allah be kulu demir saleh lakadi yom ta alela." ² Al rais al kahana Ananias amiru delin al wagifin gerib ma uwo kede dugu uwo fi kasma. ³ Biga Bulis kelim le uwo, " Allah bi dugu ita, ita heta abiat al kasulu. Ita bi geni le hukumu ana ma al ganun, lisa amiru amiu kede dugu, dit al ganun?" ⁴ Delin al wogifin jambu tou kelim," De yau kef ita gi sitimu rais al kahana ta Allah?" ⁵ Bulis keim, " Ana kan ma aruf, akuwani, gali uwo kan rais al kahana. Li anu moktub, Ita kede ma wonusu batal le a hakim ta sab taki." ⁶ Zaman Bulis aiynu gali juzu wahid min al mejles umon Sadukien wa al tanin Parasien, uwo wonusu sedid fi al mejles, "Akuwana, Ana Parisie, jena ta Parisie. De ashan Ana be taakit bi itwaka al giama ta al mayitin yau de ana bi hukumu." ⁷ Zaman uwo keim zede, al nikas bada fi nus ta al Parasien wa al Sadukien, wa al jumhur kan gesimu. ⁸ Lianu al Sadukien klim gali mafi al giama, mafi malaikat, wa le aruah, lakin al Parasien be gedir umon kulu. ⁹ Kida nengneng sedid hasil, wa juzu min al mualimin al tabien le al Parasien wogif fok wa nakis, keim, "Nina ma ligo ayi haja galat le rajil de. Malu kan roh au al malayik kan wonusu le uwo?" ¹⁰ Zaman inak kan gam nikas kebir( sehdid), kait kebir kafu gali Bulis gi rua seretu le gitat ma umon, kida uwo amiru al asakir ada ashan bi nezil tehet wa silu uwo be guwa min nus ta mejles, wa jibu uwo le harasa. ¹¹ Fi nefsa lel Rabana wogif jabu uwo wa kelim,"Mata kafu, ze ma ita kalas sahidu an Ana fi Urshelim, kida ita kaman lazim bi ashad fi Roma." ¹² Zaman wata biga nahar, bat Yahudin kowunu moamara wa nadi al laana le nefsa tomon ma alifa ma bi akulu wele asurubu ayi haja lakadi umon kan katulu Bulis. ¹³ Inak kan aktar min arbein rujal al kowunu moamara de. ¹⁴ Umon rua le rais al kahana wa al shiuk wa kelim," Nina kalas kutu nufus ta nina tehet laana kebir, ashan ma bi akulu ayi haja lakadi nina kan katulu Bulis. ¹⁵ Hasa, lezalik, kede al mejles wori le kait al kebir ashan bi jibu uwo tehet le itakum, nina jahisin le katulu uwo gabli uwo ma wosulu ini." ¹⁶ Lakin weled ta ukut ta Bulis asma gali umon kan gi istena, kida uwo rua wa dakalu le harasa wa wori le Bulis. ¹⁷ Bulis nadi wahid min al dubat wa kelim," Silu rajil suker de le kait kebir, lianu uwo indu haja der wori le uwo." ¹⁸ Kida al dabit silu weled de wa jibu uwo le al kait al aala wa kelim, " Bulis al mosjun nadi ana le uwo, wa asalu ana kede jibu weled de le ita. Uwo indu haja der kelim le ita." ¹⁹ Al dabit al aala silu uwo be iden le mahal kas wa asalu uwo, " De sunu al ita der wori le ana?" ²⁰ Al weled de kelim, " Al Yahudin kalas tafik ashan bi asalu ita kede jibu Bulis bukura tehet le al mejles, ze ka-anu umon kan gi rua asalu hagiga aktar an gedia tou. ²¹ Lakin mata asma le umon, ashan inak fi aktar min arbein rujal al dusu wa gi istena le uwo. Umon kalas nadi laana tehet le nufus tomon, mabi akulu wele bi asurubu lakadi umon kan katulu uwo. Hata hasa umon kalas jahis, gi istena le netija min ita." ²² Kida al kait sibu al weled de kede rua, bat wodi ta-alimat le uwo, "Mata wori ayi wahid gali ita kan kelim kalam de le ana." ²³ Yela uwo nadi itniin min dubat wa kelim, "Silu miten asakir kede kun jahisin le mamoria lakadi Kaesarea, wa sebeen rujal be hasasin kaman, wa miteen rujal musalahin be hirab. Itakum bi safir fi sa talata bi lel." ²⁴ Uwo kaman wodi taalimat le umon ashan wodi haiwanat al Bulis bi arkab, wa kede silu uwo kuwes le Felix al hakim. ²⁵ Biga uwo katibu waraga ze de: ²⁶ "Klaudius Lysias le said al Wali al akbar Felix, tehiat lek. ²⁷ Al rajil de kan gobudu ma la Yahudin wa kan kalas deru katulu ma umon, zaman ana ja fi nus tomon ma asakir wa ankisu uwo, ze ma ana aruf gali uwo muatin Romani. ²⁸ Ana kan der aruf le umon tahamu uwo, kida ana silu uwo gidam mejles tomon. ²⁹ Ana aruf gali uwo kan gi tahamu an sualat bi khus ganun tomon, lakin gali kan mafi tohuma dit uwo al bi istehik al mut awu bi siginu. ³⁰ Biga kan ana ja fahim gali fi kuta batal dit raji de, kida ana tawali rasulu uwo le ita, wa wedi taalimat le nas al gi isteki uwo kaman kede jibu sokuat tomon al did uwo fi gidam taki. Tekerim." ³¹ Kida al asakir ti taalimat tomon. Umon silu Bulis wa jibu uwo bi lel le Antibatris. ³² Fi yom al tani, aglabia min al asakir sibu al rujal al be hasasin wa rua ma umon wa umon be nefsa tomon rija le al harasa. ³³ Zaman al rujal be hasasin wosulu Kaesarea wa wedi waraga le wali, umon kaman gedimu Bulis le uwo. ³⁴ Zaman al wali agara waraga, uwo asalu fi yatu wulaya Bulis kan min fogo. Zaman uwo aruf gali uwo kan min Silisia, ³⁵ uwo kelim, "Ana bi asma ita be kamil zaman mustekin ja ini." Biga uwo amiru uwo kede hafisu fi riasa ta hakuma ta Herodos.