¹ Zaman umun mururu be mudun Amfibulis wa Apolonia, umun ja fi medina ta tasalonikiya, mahal al kan fugu majma ta Yahud. ² Bulus dakalu le umun ze tabiya tuo, le fetera ta talat ayamat ta sebit uwu bi akidu le umun min Kutub. ³ Uwu kan bi fata Kutub wa bi wadihu le umun anu lazim kan Al Messih bi ligu taab wa bi gum min mutu tani mara. Uwu kelim,. ''Yesua al ana bi beshiru le itakum de uwu yau al Messih.'' ⁴ Baad min Yahud kan igtene wa doum le Bulus wa Sila, sawa ma adat kebir min Yunanin al Mutaabidin, wa adat ma besit min nusuwan al gi gedimu. ⁵ Lakin Yahud al ma amin, gira gubudu umun, umun shilu rujal ashrar min souk, wa limu sawa, wa amulu muzaharat fi Medina. Umun hujumu bait ta Yason, umun der jibu Bulus wa Sila bara le Nas. ⁶ Lakin zaman umun ma ligu umun, umun juru Yason wa baad min Ikewa gidam musuolin ta medina, umun bi kure, ''Rujal delin al gilibu donia fuk tehet umun ja hini kaman. ⁷ Rujal del al al Yason rahibu, umun gi isahtakal did garar ta Gaisar; umun kelim anu fi melik tani - Yesua.'' ⁸ Jumhur ma Musuolin ta medina bega ma murtahina wekid umun asuama kalam de. ⁹ Lakin baad ma hukam ta mednia sibu Yason wa bagi nas dafa gurush ze kafala, baad kida umun sibu umun ruwa. ¹⁰ Fi nefsu yom dak ikewa rasulu Bulus wa Sila le Biriya. Zaman umun wusulu hinak, umun dakalu fi majama ta Yahud. ¹¹ Hasa nas de kan ahsen mindelin al fi Tasalanukia, lanu umun ligu kelima be geliba al jahiz, wa bi fata kutub kulu yom ashan bi arufu kan kalam de sa. ¹² Ashan kida ketir min umun amin, sawa ma baad min nusuwan ta Yunanin al itasir wa rujal ketir. ¹³ Lakin zaman Yahud ta Tasaluniki arufu inu Bulus kan kaman bi beshiru kelima ta Allah fi Biriya, umun ruwa hinak wa haiju jumhur. ¹⁴ Tuali, ikewa rasulu Bulus kede ruwa le safa bahar, lakin Sila wa Timusaus fadulu hinak. ¹⁵ Delin al kan gi gedimu Bulus umun shilu uwu le Asina. Ze ma umun sibu Bulus hinak, uwu weri le umun inu kede Sila wa Timusaus ja le uwu guwam. ¹⁶ Hasa wekit Bulus bi istenna umun fi Asina, geliba tuo tala zalan wekid uwu ayinu medina kulu malian be asnam. ¹⁷ Uwu nagishu fi majma ma Yahud wa nas tanin al bi abudu Allah, bardu fi suk ma delin al hinalk. ¹⁸ Baad min nas ta falsafa al Abigurien wa Rawagien limu ma uwu. Baad min umun kelim, ''De shunu de al abu kalam de bi hawil wunuso?'' Tanin kelim, ''Uwu bi zahir ze zol al bi nadi nas kede ruwa wara rabunat al garib,'' ashan Bulus kan bi beshiru Yesua wa Giama. ¹⁹ Umun shilu Bulus wa jibu uwu le Areus Bagus, wa kelim, ''Mum inna bi arufu talim al jedid al ita kan bi wunuso de? ²⁰ Lanu ita bi jibu hajt al garib le adanat ta nina. Ashan kida, inna der arufu hajt de mana tu shunu.'' ²¹ (Hasa Asiniin kulu wa ajanib al bi geni hinak ma bi amulu ayi haja be aw bi weri aw bi asuma haja jedid.) ²² Bulus wegif fi nus ta Areus Bagus wa kelim, ''itakum ya rujal ta Asina, Ana bi ayinu itakum nas ta din al saab be ayi teriga. ²³ Lanu zaman ana bi mururu wa bi ayinu asnam takum ta ibada, Ana libu sanam be isim de, ''Le Ilah mujuhul.'' Haja al itakum bi abudu wa bi jahilu de , yau ana alinu le itakum. ²⁴ Allah al kalagu dunia wa kulu haja al fugu, ze ma uwu Rabuna ta sama wa al ard, uwu ma bi geni fi hayakil al abinu be iddenat. ²⁵ Wele bi kadimu uwu be iddenat ta nas, ze uwu muhtaj le ayi haja, ligu uwu be nefsu yau bi wedi le nas haya wa nefes wa ayi haja tani. ²⁶ Min insan wahid uwu amulu kulu nas ashan bi ish fi ard, wa uwu hadidu mauasim tumun wa hudud ta manatik al umun bi ish fugu. ²⁷ ashan umun bi fetishu Allah, wa umun bi nadi uwu. Ma inu uwu ma bait min ayi wahid min inna. ²⁸ Ashan fugu uwu inna bi ish wa bi harik wa bi ligu haya ta nina, bes ze wahid min shuara takum kelim, 'Lanu inna bardu nesli tuo.' ²⁹ Ashan kida, kan biga inna nesli ta Allah, kede inna ma fekir inu gima ta ta shukul gerib ma Rabana de ze dahab, aw fidda wele hajer- souwar al amulu ma rasamin wa kayalat ta insan. ³⁰ Ashan kida, Allah sibu zaman ta shukul jahala, lakin hasa uwu ammiru nas kulu fi ayi makan ashan bi tub. ³¹ Ashan uwu Kutu yom al fugu uwu bi hakimu dunia fi bir be wasat rajil al uwu iktar. Allah wedi takid ta zol le ayi zol be wasat guwumu ta tuo min amuwat.'' ³² Zaman nas ta Asina asuma an giama ta amuwat, tanin alisu Bulus; Lakin tanin kelim, ''Inna bi asuma le ita tani an kalam de. ³³ Baat kida, Bulus sibu umun. ³⁴ Lakin baat min rujal duom le uwu wa amin, Diunisus al Ariubagi, mara isim tuo Damris, wa nas tanin ma umun.