¹ Wa hasil fi Igonia Bulus ma Barnaba dakalu fi majma ta Yahud wa wunuso be teriga al jumhur ketir min Yahud wa Igrik amin. ² Lakin Yahud al kan ma bi tii gum fuk fi nu nus ta Umam wa sibu umun zalanin did Ikeua. ³ Uwmun geni hinak le fetera tuwil, bi wunuso be mujahara be gowa ta Rabana, wekit uwu bi wedi isbatat an risala tuo. Uwu weri be ajaib wa mujizad al hasil be wasat ta Bulus wa barnaba. ⁴ Lakin adad kebir ta medina gesimu: tanin wegif safa ta Yahud, wa tanin safa ta rusul. ⁵ Zaman Yahud wa Umam hawil ashan bi agna giadin tumun ashan bi taabu wa rejimu nas Bulus ma Barnaba, ⁶ Umun arufa kalam de wa tefes le mudun ta Likaunia: Listira wa Darba, wa mahalat al be taraf tumun, ⁷ Wa umun kan gi beshir Injil hinak. ⁸ Fi Listira fi rajil gi geni, ma indu gowa kurenat tuo ma bi duru, mushlul min batna ta uma tuo, ma duru ta kulu kulu. ⁹ Zol de asuma Bulus bi wunuso. Bulus rekiz ena tuo fugu zol de wa arufu inu uwu indu iman al be kutu uwu tala kwes. ¹⁰ Tuali uwu wunuso le uwu be sout fuk, ''Wegif fuk be kura taki.'' Tuali rajil nutu fuk wa bada duru. ¹¹ Wekit jumhur ayinu haja al Bulus amulu, umun arfa sout tumun ,wa kelim be luga likaunia, ''rabuna nezil le inna fi shikil ta insan.'' ¹² Umun nadi Barnaba ''Zefs,'' wa Bulus, Hermus,'' ashan uwu yau kan negit fi kalam. ¹³ Abuna ta Zefs, al Haikal tumun fi bara medina, jibu teran wa akalil fi bab; uwu ma jumhur ashan bi gedimu zebiha. ¹⁴ Zaman rusul de Bulus wa Barnaba asuma, imun seretu gumasat tumun wa guam ruwa bara le jumhur, bin kure ¹⁵ wa wunuso, Ya rujal malu itakum bi amulu hajat de? Inna bardu nas be nefsa ihsas ze itakum. Inna bi jibu le itakum kabara al kues, ashan itakum bi geru min hajt al min indu faida le Allah al Hai, al kalagu samawat wa al ard wa bahar wa kulu hajat al fi fugu. ¹⁶ Fi sinin al wara, uwu sibu nas kulu bi ruwa hasab sikat tumun. ¹⁷ Lakin Bardu uwu ma sibu nefsa tuo bedun shahid, wa uwu bi amul kues bi wedi le itakum muturu min sama wa zaman ta kuruju al akil bi tala fugu ketir, wa bi mala gulub takum be akil wa farah.'' ¹⁸ Be kelimat de, Bulus ma Barnaba agder sibu umun ma gedimu zabaih le umun. ¹⁹ Lakin baad Yahud ja min Antakia wa Igonia ja wa agni jumhur. Umun rejimu Bulus wa juru uwu bara min medina, umun fekir gali uwu mutu. ²⁰ Wa ze talamis kan gi wegif hawli uwu, uwu gum fuk wa dakalu juwa medina. Fi yom nimra itnin, uwu ruwa le derba ma Barnaba. ²¹ Baad ma umun beshiru injil fi medina dak wa telmizu talamiz ketir, umun rija le listira, le Igonia, wa le Antakia. ²² Umun istemir gewi nefus ta ta talamiz wa sheja umun kede fadulu fi iman, wunuso, ''Inna lazim be dakalu Mulukut ta Allah bewasat taab ketir.'' ²³ Zaman umun ayinu le umun shiuk fi kulu Kenisa,wa seli be siyam, umun selimu umun fi iden ta Rabana, al umun amin fugu. ²⁴ Umun mururu be Besidia wa ja le Bamafilia. ²⁶ Zaman umun beshiru kelim fi Birja, umun ruwa le Attalia. ²⁵ Min hinak umun arkab sefina le Antakia, hinak gedimu umun le naima ta Allah le shukul al umun amulu. ²⁷ Wekit umun wusulu fi Antakia wa nadi Kenisa sawa, umun weri kulu hajat al Allah amulu ma umun, wa kef uwu fata bab ta iman le Umam. ²⁸ Umun geni le fetera tuwil ma talamiz.