¹ Wa fi zaman dak Melik Hirudis mido iden tou le baad min nas min Kenisa ashan uwu bi azibu umun. ² Uwu katulu Yagub aku ta Yuhanna be sef. ³ Zaman uwu ayinu kalam de farihu Yahud, uwu gubudu Buturus kaman. De kan fi ayam ta al fatir. ⁴ Baad ma uwu gubudu uwu, uwu kutu uwu fi sigin wa wedi musuli le arba arbat min jesh ashan bi harisu uwu; uwu kan indu niya ashan be gedimu buturus le shab baad al fes-hi. ⁵ Kan Buturus bi harisu fi sigin, wa delin al fi Kenisa kan gi seli le Allah be lajaja. ⁶ Wa fi bilel al gubal ma asbah saba ashan Hirudus bi gedimu uwu le shaab, Buturus kan naim bainu itnin asakir, murbut be itnin janazir, ligu hurras al fi gidam bab kan gi harisu sigin. ⁷ Faja malibna ta Rabana zahir le uwu, wa nor wala fi jua sigin. Uwu dugu Buturus be jamba wa tuoru uwu wa kelim, ''Gum fuk guam,'' wa janazir fiku fiku min iden tuo. ⁸ Malika kelim le uwu, Libisu gumash wa shiship taki.'' Buturus amulu nefsa haja. Malika kelim le uwu ''Libisu gumash taki ta kati gisim wa dauru wara tai. ⁹ Buturus rua wara ta Malaika wa tala bara. Uwu ma aruf inu haja al amulu ma Malaika kan hagiga. Uwu fekir uwu kan gi ayinu rauya. ¹⁰ Zaman umun mururu min haras nimra wahid wa itnin, umun ja le bab ta hadid al bi ruwa le medina; bab de fata le umun barau. Umun tala bara wa nezil fi sika, wa malaika sibu uwu tuwali. ¹¹ Zaman Buturus rija le nefsa tuo, uwu wunuso, ''Hasa ana arufu hagiga inu Rabuna rasulu malaika tuon wa hariru ana min ida ta Hirudus, wa min ayi haja al Yahud kan gi itwaka.'' ¹² Wekit uwu lahisu kalam de, uwu ruwa fi bait ta Mariam uma ta Yuhanna, al bardu isim tuo Murkus, mahal al nas ketir limu wa bi seli. ¹³ Zaman uwu dogu bab, biniya al kadam isim tuo Roda ja ashan bi juabu. ¹⁴ Wekit hiya arufu de sout ta Buturus, min farah hiya nesitu fata bab; hiya jere dakalu jua odda; wa weri inu Buturus bi wegif fi kasma bab. ¹⁵ Umun kelim le hiya, ''Itta gi hezar.'' Lakin hiya gi sir inu kalam de sah. Umun kelim, ''De malaika tuo.'' ¹⁶ Buturus istemir dogu bab, wab zaman umun fata bab, umun ayinu uwu wa umun kan mustagrabin. ¹⁷ Buturus ashiru le umun be iden tuo kede umun askut, wa uwu weri le umun kef Rabuna tala uwu bara min sigin. Uwu kelim, ''weri takum kalamat de le Yagub wa ikwa. ''Baad kida uwu ruwa le mahal tani. ¹⁸ Zaaman wata biga nahar, kan fi idrab kebir fi nus ta asakir be kalam ta haja al hasil le Buturus. ¹⁹ Baad ma Hirudus fetishu uwu wa ma agider ligu uwu, uwu asalu hurras wa wedi awamir inu kede katulu umun. Baad kida uwu ruwa min Yahudia le Gaisaria wa geni hinak. ²⁰ Hasa Hirudus biga zalan min nas ta Sur wa Sida. Umun ruwa le uwu sawa. Umun agna Blastus, Musaid ta melik, ashan bi saidu umun. Yala umun asalu salam, ashan beled tumun bi ligu akil tumun min beled ta melik. ²¹ Wa fi yom muayen Hirudus libisu gumas malabis ta mulkia wa geni fi kursi ta melik; wa wunuso le umun. ²² Shaab bada kure, ''De sout ta illah, ma ta insan! ²³ Tuwali malaika ta Rabuna durubu uwu, ashan uwu ma wedi mejid le Allah; akulu uwu be dod wa uwu mutu. ²⁴ Ama kelima ta Allah raba wa zidu. ²⁵ Zaman Barnaba wa shaul timu irsaliya tumun, umun rija min Urshelim, jibu ma umun Yuhanna, al isim tuo Murkus.