¹ Sona pa fyo tukuyugha fipinyiwe fyakuti, tuli nu muputi usongo, we yuyo akwikala chinama cha ulyelo ilya chisumbe icha unyafyale songo kumwanya. ² Umwene mubombi sona muputi usongo mmalo ghakusalibwa nganila umuchalichi chocho chitakaghengibwa numundu lole nu Malafyale. ³ Pakuti umuputi usongo we yoshi akusaliwa ukuti baye bamupe uChala ichakubinda napo isembe. Sona chitabaghile ukuti uputi songo uyu wepe abe nacho ichakubinda. ⁴ Sona akabe ukuti Ali pachisu chapasi pano ngali tewe muputi pachifukwa balipo kale abaputi bo bakapeleka ifyabupe kwakufwana ni ndaghilo. ⁵ Imbombo iyi iya buputi cho chimanyikwilo nu musyesye mumalo mumalo ghakusalibwa kumwanya. Pakuti u Mozesi akayugha ukuti muyenge ichalichi, uChala akababula, "Fyoshi kwakufwana nifimanyikwilo cho chikabonekwa uwe pighamba. ⁶ Sona namo ifindu fili ukilisitu akapokela imbombo yapamwanya kupala nambombo sha baputi ba piyolo bala. Pachifukwa lipangiwe. Po akalaghilasha fisa kukinda filaghisho fya ndaghilo sha piyolo. ⁷ Pakuti pala indaghilo lakwanda lila likaba lambula nongwa ngali kutaliko na malo gha ndaghilo ishabubili. ⁸ Lole Chala akwagha inongwa mubandu bake pala akuyugha ukuti, uMalafyale akuyugha ukuti, "Mashiku tighafike papo tingapange ulupinyo lupya muluko lwa Isilayeli nu luko lwa Yuda. ⁹ Pangano ili tilikafwane linine. Pashiku lyo ngabakola panyobe nikubalongosya kuse kufumu mu hisu icha Igipite. Pakuti batakasunga indaghilo sho mphanganite nabo, po lelo une mbalekile bulo, momo akuyughila uMalafyale . ¹⁰ Po lelo ulu lopinyibwe lo nguya pakupangana ni nyumba ya Isilayeli po panyuma pamasuba ghoghala, Malafyale akatiz "Nguya pakubika indaghilo shangu muminong'ono yabo nukughasimba mundumbula shabo. Une nguya pakuba uChala wabo, babo tibakabe abqndu bangu. ¹¹ Po umundu weshi takamanyishe umuyeghibwa bwake bwake, sona numundu ukuti akamanyisye umwana munine ukuti, "Ukamumanye uMalafyale". Pakuti woshi bamenye kwanda ubunandi ngani mpaka kubusongo ngani. ¹² Pakuti nguya pakubahobokela mubibi ghabo po tingakumbukesona imbibi shabo shosa. ¹³ Pakuyugha isha ndaghilo nyipya Chala ukuyugha indaghilo sha piyolyo lyaba lyabubo, po cho chikughalabuka ukuba chamwalwe, ni chapiyolo cho chili papipi nukumala.