¹ Ubu bo ubusetuli bwa Yesu kilisiti wo Chala ampile ukuti anangishe ku babombi bake. Findu fyo fibaghile pakubombiwa lilino. UKilisiti asetwile chicho pakutuma umutumiwa wake u Yohani. ² Yohani yuyo yo akuyugha fyosi to akafiketa we ukamboni wa mashu ya Chala ni fyosi fyo uYesu kilisiti akafibomba nukuyugha. ³ Ayindikiwe umundu yuyo akubelenga amashu gha busololi gho mwakukwesya amashu, popo bakughindikiwa bo bakupulika nukusunga fyo fisimbiwe mumumo pakuti kabalilo Kali papipi. ⁴ Ukufuma kwa Yohane, ukufika Ku mupingo iya Chala yihano ni yibili yo yili my Asiya. Ubwisa nu lughano fibe numwe fyakufuma kwa Chala, yo alipo, yo akaba kuko, tiise abeko sona. mukapoke sona ulughindiko ukufuma ukwa mbepo shingonde ni shibili syo sili pandashi pa mpando ubwuyindikiwa bwa Chala. ⁵ Nukufumila ukwa Yesu kilisiti kamboni wabusubalila, wabwalilo kushuka kubufwe po yuyo akulamula, banyafyale ba chisu chapasi we yuyo atighanite sona nibanda lyake atusatwile Ku mbibi syitu, ⁶ Po akatughalusya ukuba abanyafyale bwanaloli nabaputi ukuti tumubombele uChala uTata wake po ukwa Yesu kilisiti ko kube ulughindiko namaka gha bwila bwila. Ameni. ⁷ Keta wakwisa namabingu weshi akwisa pamuketa bo bakamutasa bope bajwisa pamuketa. Imutundu yosi yamuchisu cha pasi bakwipa kulila ichifujwa cha yuyo. Naloli mo tikubile. Ameni. ⁸ Une ne Alefa nu Omega , ukuyugha malafyale uChala, ne mwene maka ghosi. Wali kuko,yo aliko, po tiise sona. ⁹ Une Yohani luko lyinyu nayo kukulya nawe poka mwa Yesu my ndamyo ubunyafyale was Chala nukufwililapo nukukatamila. Bakambika pakasi pa Patimo pachifukwa chakufumusya amashu gha Chala nu kuba kamboni wa Yesu. ¹⁰ Pisuba lya malafyale nali mumbepo po kunyuma kwangu ngapulika amashu ghakulu ghoghagho ghapulikikwagha nga mo imbata yikulilila. ¹¹ Ghakuti, Simba mubuku fyosi fyo ukufiketa po tumisha kumipingo ya Chala yingonde na yibili, waku Efeso, uwakuSimukina, waku Pelegamo, waku Tiyatila, waku Siladisi, waku Filadefiya nawaku Laodekeya ¹² Ngaghaluka ukuti nukute yo akayughagha. pakughaluka sona ngaketa ifyakubikapo nyali fingonde ni fibili fya golidi. ¹³ Po pafyakubikapo nyali fila pimiliye yumo yo akaba numwana wa mundu. !were afwele umunjilila uwo wukafika na mufilundi, nu lamba wa golidi yo akipinya nawe palufukwe. ¹⁴ Umutu wake ni sisi lyake likaba lyelu sa mo tonje lyelu ngani sona ngati unyatutwe. Amaso ghake ghakaba ghakumwekuka ngati mulilo wakwaka. Ifilundi fyake fikaba ghakumwekeka ngati ichisulo cho chengiwa munganjo ya mulilo. ¹⁵ Amasyu ghake ghakaba ngati ichongo cha misi mingi. ¹⁶ Umundu yula akakola inyenyesi ishingonde ni shibili munyobe yake kulyela, sona nulupanga lwakutwa kosa kosa lwo lukafumagha mumulomo wake. Ichisyo chake chikaba ngati isuba lyo likubala na maka ghosi ¹⁷ Po ngamuketa ngafumagha pasi mufilundi fyake, po nyali ngati nifwile. Lole po abikite inyobe yake indilo pangu, po atile, Manyi ghopaghe, ne wakwanda nu wabumalilo. ¹⁸ Sona ne bumi. Nafwile sona keta ndi bumi kwa bwila bwila ngani. Ndi nafyo fyakwighulila ukwufwe nu kugehena. ¹⁹ Po simba fyo akuketa, fyofiliko na fyo tifibombeghe kundashi. ²⁰ Iching'anamulo cho chitakuboneka icha nyenyeshi isingonde nisibili syo ukaketa Ku nyobe yangu indilo, sona nicha fyakubikapo nyali fingonde ni fibili, fya golide fila, cho ichi. Nyenyeshi ishingonde ni shibili sila bo abatumiwa ba mipingo ingonde na yibili, po nyali ishingonde ni shibili shila wo imipingo yingonde ni yibili.