¹ Mmodda a nyuwaano akhalla ni mullatu ni ookhulupilila munkhwaaye, enamullipiha mwiilli tti tini wi amusumelle wa oohimullapella Mulluku, ohiri wa athu a Mulluku wi yeeluze mwahooyo? ² Ethiyo khamunadduwella wi athu a Mulluku eneeroweeluza ellapo yavatthi? Nave mwawora weeluza ellapo yavatthi, khamuwora weeluza millatu dding'onong'ono? ³ Ethiyo khamunadduwella wi nineeroweeluza angelo? Sika Nineerowona weeluza ddeko dda okumi yoolla. ⁴ Vano mwakhalla ni millatu dda ddeko ddenndda munaddisumella tini wa athu oohikhalla ni olamulello mumpingoni wi yeeluze? ⁵ Muwulliwe muru! Ethiyo vookhalla muthu mmodda a ezeru variyari vanyu oyo anaawore weeluza mullatu variyari va ookhulupilila? ⁶ Koma vano ookhulupilila Anaya o nthato na millatu omusumella ookhulupilila munkhwaaye wi athu oohimullapella Mulluku yeeluze mullatooyo! ⁷ Vawi munnakhalla ni millatu variyari vanyu, ddohooniha khalle wi nyuwaano tti oolephela wunchichi. Waaweerokhalla phaama wi muhiipaneke mullatu koma mwaahiye athu eweerellekeni ddoonanara nave ewiiyerekeni. ⁸ Koma tti nyuwaano munaweerella ddoonanara ni owiiyera naari eri ookhulupilila ankhwiinyu. ⁹ Ethiyo khamunadduwella wi athu aweera ddoonanara kheyaakhella omwene wa Mulluku? Muhiddoottotthe weekhiinyu! Ooraruwa apaalle oollapella mafano apaalle ookonana ni allopwana akhwiiwa, ¹⁰ apaalle awiiya apaalle a nrima apaalle oolezela apaalle oolalata, khaavo a yaalla anaawaakhelle omwene wa Mulluku. ¹¹ Amodda a nyuwaano mwaari awi ddiidda. Koma machimwaanyu yaakhululukiwa, mwaheellihiwa nave mwaheeriwa oolungama vamiitthoni va Mulluku mwa nnddina na Apwiya* Yesu* Khrisitu* navettho Munepa wa Mullukwaahu. ¹² Athu amodda ennallota wi, " Kinnaakhullelliwa weera erive ello" Ddawoona, koma khe ddeko ddittheddene ddiri ddaphaama. Miyaano kinallota wi Kinnaakhullelliwa weera erive ello koma ngilamulelliwa ni erive ello. ¹³ Athu amodda ennallota wi, "Ddoocha tti ddooya m'mirimani nave m'mirimani tti mwawaakhella ddoocha." Ddawoona koma Mulluku aneerewoononga ddeko piilli ddenndda. Mwiilli khe waweerana ddooraruwa koma tti woowaarumeyellana Apwiya nave Apwiya sika enavaha ddoopaalleya dda mwiilli. ¹⁴ Mulluku ahaavenyiha wa ookhwa Apwiya, sika aneeronivenyiha hiyaano ni masivaaye. ¹⁵ Ethiyo khamunadduwella wi miilli ddanyu tti eziwalo dda mwiilli wa Khrisitu? Miyaano ttuukusa eziwalo dda Khrisitu ni odditthatusa eziwalo dda mutthiyana ooraruwa? Khe ddiiddo! ¹⁶ Apaalle khamunadduwella wi muthu oyo anakona ni mutthiyana ooraruwa ennatthattuwa mwiilli mmodda? Mawu a Mulluku* ennallota wi, "Eellaayo oneerokhalla mwiilli mmodda." ¹⁷ Koma oyo anaattana ni Apwiya anakhalla mmodda ni alliwaayo m'munepani. ¹⁸ Thawani oraruwa. Erive yoochimwa eneeriwa ni muthu khenananariha mwiillaaye, koma muthu ooraruwa anananariha mwiillaaye. ¹⁹ Ethiyo khamunadduwella wi mwiillaanyu tti enyumba ya Munepa Waweella Oyo anakhalla mwa nyuwaano navettho aavahiwe wa nyuwaano ni Mulluku? Khamunakhalla a nyuwaano weekhiinyu. ²⁰ Mwaakulliwa nave aallivella, sika pharihani miilli ddanyu wi mumutitimihe Mulluku.