¹ Ollota ddawoona, asinnaka ni arokoraka ngaawonre ollota ni nyuwaano wonanko mmo kinalloteemi ni athu ookhalla ni Munepa. Koma kaaphwanella ollota ni nyuwaano wonanko athu a ellapo yavatthimva, wonanko anamwani mu echikhulupililo ya Khrisitu*. ² Kahuuwiryihani mukaka, ohiri wuuchihani ddoollipa, kaambiiwa khamwaawonre ocha. Nave naari vano khamuwora ocha ³ Kaambiiwa munakhallave wonanko enakhallella athu a ellapo yavatthi Ella. Vaakhalla ehache ni okangana variyari vanyu, nndda khaddinoonihera wi nyuwaano tti a ellapo yavatthi ella, ni okhalla ni makhallello a Muthu? ⁴ Mmodda a nyuwaano allota wi, "Miyaano tti a Paulo*." Nave mmodda allota wi, "miyaano tti Apolo*.", khamunakhalla wonanko athu a va ellapo yavatthi ella? ⁵ Ni okhalla wene, Apolo ttaani? Nave Paulo ttaani? Hiyaano tti oorumeyella a Mulluku, ayo yuuhoollelleni o echikhulupililo. Arive muthu a hiyaano anaphara mutteko Apwiya* yaamvahilliiwa wi aphare. ⁶ Miyaano kaamidda mmiddo, Apolo aahellella maaddi nave tti Mulluku eerihalle ddoomella wi ddunnuwe. ⁷ Oomidda naari oohellella maaddi tti oohipaalleya. Tti Mulluku ari oopaalleya kaambiiwa anneriha ddoomellannddo wi ddunnuwe. ⁸ Ohiyana khawiivo variyaari va oomidda ni oohellella maaddi. Nave Mulluku aneeromuthuva arive muthu moollikana ni mutteko aphanreeye. ⁹ Vawi hiyaano tti allupa mutteko akhwaaye a Mulluku nave nyuwaano tti emata ya Mulluku. Nyuwaanottho tti enyumba ya Mulluku. ¹⁰ Moollikana ni echisomo* kaavahiweemi ni Mulluku, kaaphara mutteko woomaka phaama nave kaakeraatthiha matthiphellello nave muthu mmodda animamakavo. Nave arive muthu achenjere ni mamakellwaaye. ¹¹ Vawi Mulluku oomuhiyavo khalle Yesu* Khrisitu okhalla matthiphellello yaayove nave matthiphellello mamodda khekeraatthihiwa. ¹² Amodda ennamaka vamatthipellellomvo ni golide* apaalle siliva apaalle malluku oowallamella mutengo; amodda ennamaka vamatthipellellomvo ni mitteekho apaalle ni manasi apaalle mittatthi. ¹³ Nave oreera wa mutteko wa arive muthu oneerowuupullulliwa va nllapo na echiweluzo vawi nllaponno nineerophiya ni munllo nave munllooyo sika onaalinge mitteko dda arive muthu. ¹⁴ Eyo yaamakiwe va matthiphellello yaahisha ni munllo, oomaka oyo annerothuviwa. ¹⁵ Koma mutteko wa mmodda washa olliye khathuviwa komave aneerovullusiwa wonanko oovulluwa m'munlloni. ¹⁶ Ethiyo khamunadduwella wi nyuwaano tti enyumba ya Mulluku nave Munepa wa Mulluku onakhalla mwa nyuwaano? ¹⁷ Sika muthu oononga enyumba ya Mulluku, Mulluku aneeromoononga olliye. Vawi enyumba ya Mulluku tti ya weella nave nyuwaano tti enyumbaaye.w ¹⁸ Ahikhallevo muthu aniilleke yeekhaaye. Muthu mmodda variyari vanyu aaddeeseka wi tti a ezeru owaaka ezeru dda a ellapo yavattheella, aambe okhalla ookarangeya wi akhallena ezeru. ¹⁹ Vawi eyo enneriwa ya ezeru va ellapo yavatthimva tti yoohikhalla ni ezeru vamiitthoni va Mulluku. Moollikana ni mawu a Mulluku*awi, "Mulluku anaphariha mutteko ochenjera wa athu a ezeru wonanko musampha vowaapharani alliwaayo," ²⁰ nave mawu a Mulluku amodda enallota wi, " Apwiya unnadduwella wi maganizo a athu a ezeru tti oohikhalla ni mutteko." ²¹ Vano ahikhallevo awiitukhulla ni ddawwera dda athu. Ddeko ddittheddene tti ddaanyu: ²² Paulo, Apolo, ni Petro*; ellapo yavatthi ella, okumi ni okhwa, ddamuttano Ni dda muhoollo, ddittheddenenndda tti ddaanyu, ²³ nave nyuwaano tti a Khrisitu nave Khrisitu tti a Mulluku.