¹ Ovenyera wa miyaano Paulo*, oyo kiithaniwe mu opaalla wa Mulluku wi kikhalle murummwa* a Khrisitu* Yesu. Navettho ovenyera wa mwanamunnihu* Sostene. ² Kinalembella mpingo* wa Mulluku oyo ori m'muzindani wa Korinto, wa ayo yeeriwe aweella mwa Khrisitu Yesu nave yiithaniwe wi ekhalle athu a Mulluku. Navettho kinalembella wa athu attheene enaallapella Apwiihu Yesu Khrisitu m'mapuroni mattheene. Olliye tti Apwiiwa ni awihu. ³ Echisomo ni murendelle dda Mulluku Attiitthiihu ni Apwiya* Yesu Khrisitu ddikhalle ni nyuwaano. ⁴ Kinnamuthokoza Mullukwaaka mallapo mattheene ekaamba ya nyuwaano, vawi ohuuvahani echisomwaaye mwa Khrisitu Yesu. ⁵ Vawi mwa Khrisitu mohaakhella ddeko, mawu mattheene ni odduwella ottheene mwawaata. ⁶ Ekaamba yawi othenga woollota dda Khrisitu wookeraattheya mwa nyuwaano. ⁷ Sika kheyaavo emphaso ya Mulluku muyelleelleenyu, munatiyereenyu wuupullulliwa wa Apwiihu Yesu Khrisitu yaawaaka. ⁸ m Aneerewuullipihani murima ophiyera va mamallihesu wi muhikhalle ni yoochimwa va Nllapo na Apwiihu Yesu Khrisitu. ⁹ Mulluku tti oororomelleya, oyo aawiithanilleni nyuwaano wi mukhalle mu eyaattano ni mwanaye Yesu Khrisitu, Apwiihu. ¹⁰ Mu nnddina na Apwiihu Yesu Khrisitu kinimuuvekani nyuwaano attheene, asinnaka ni arokoraka, wi mwiiwananeke va nnddo munalloteenyu wi vihikhalle okawaneya variyari vanyu. Mukhalleke awaattana m'murimani mwanyu ni m'maganizoni mwanyu. ¹¹ Vawi athu amodda a mu nibanyu, asinnakanyu ni arokorakanyu. ¹² Kinallotattho nndda ekaamba yawi arive muthu a nyuwaano anallota ddoohiyana. Mmodda anallota wi, "Kinamuthwara Paulo,"mmodda wi, "Kinamuthwara Apollo*," mmodda wi, "Kinamuthwara Petro*," nave mmodda wi, "Kinamuthwara Khrisitu." ¹³ Ethiyo Khrisituookawaneya? Ethiyo Paulo sika aatthomeyiwe vamutandani ekaamba ya nyuwaano? Ethiyo mwaabatiziwa mu nnddina na Paulo? ¹⁴ Kinnamuthokoza Mulluku wi ngaamubatizalle naari mmodda a nyuwaano ompatula Krispo ni Gayo. ¹⁵ Sika khaavo mmodda a nyuwaano anaallote wi abatiziwa mu nnddina naka. ¹⁶ Ddawoona kaamubatizattho Stefanasi ni nibanja naye koma nginuupuwella wi kaamubatizattho muthu mmodda. ¹⁷ Khrisitu khaakirumalle miyaano wi kibatize. Koma aakirumalle wi killalleye othenga waphaama moohipharihani mutteko mawu a ezeru manchichi wi okhwa wa Khrisitu vamutandani ovirellelle okhalla ni masiva. ¹⁸ Othenga wa okhwa wa Khrisitu vamutandani tti wookarangeya wa ayo enaawoonongeye. Koma wa hiyaano ninaavullusiwe ori masiva a Mulluku. ¹⁹ Ddaalembiwattho mu mawu a Mulluku* wi, "Kineerosakaza ezeru dda athu a ezeru, ni ochenjera wa athu oochenjera." ²⁰ Sika vano, nndda ddinaaphiyihe wuuwi athu a ezeru, apaalle Ahuddihi a malamulo*, apaalle athu odduwella ollota, ayo eri a ellapweella? Mulluku oheeriha wi ezeru dda athu a ellapweella ddikhalle ddookarangeya! ²¹ Vawi Mulluku mu ezeru ddaye aheeriha wi athu ehimudduwelle olliye voopharihsnk mutteko ezeru ddiwa. Koma Mulluku aapaalla waavullusa athu ookhulupilila mwa othenga wookarangeya ninallalleyeehu. ²² Ayuda enaveka ezizindikiro nave ayo ehiri Ayuda enaashaasha ezeru. ²³ Koma hiyaano, ninallalleya dda Khrisitu ootthomeyiwa vamutandani. Othenga yoolla tti wookukhumulla wa Ayuda ni wookarangeya wa athu ayo ehiri Ayuda. ²⁴ Koma wa ayo yiithaniwe ni Mulluku, Ayuda athu ayo ehiri Ayuda Khrisitu tti masiva a Mulluku ni ezeru ya Mulluku. ²⁵ Vawi naari ello ya Mulluku eyo enooneya wi tti yookarangeya, tti ya ezeru ohiyana ni ezeru ya athu. Naari ello ya Mulluku eyo enooneya wi tti yoofooka, tti yamasiva ohiyana ni masiva a athu. ²⁶ Vano asinnaka ni arokoraka, upuwellani enthawi eyo mwiithaniweenyu. Anchichi a nyuwaano khamwaarina ezeru vamiitthoni va athu a va ellapo yavatthi, anchichi khamwaarina masiva, anchichi khamwaayariwe mu nibanjani noodduwanyeya . ²⁷ Koma Mulluku aathoolla nnddo ddiri ddookarangeya vamiitthoni va athu wi aawullihe muru athu a ezeru. Aatthoolla nnddo ddiri ddoofooka wa athu wi aawullihe muru athu a masiva. ²⁸ Aatthoolla eyo eri yoohikhalla ni mutteko vamiitthoni va athu ni yoovevulliwa, eyo ehiri ello, wi eerihe ohikhalla ni mutteko eyo athu eneesiiwa yookhalla ni mutteko. ²⁹ Sika khaavo muthu anawora wiitukhulla vamiitthoni va Mulluku. ³⁰ Koma Mulluku sika awaattanihalleni ni Khrisitu Yesu nave oomweera Khrisitu wi akhalle ezeru ddahu. Vawi oweella mwa Yesu Mulluku ooneera oolungama, aweella ni oottaphulliwa. ³¹ Sika vano, wonanko mmo mawu a Mulluku yelembelliwiiwa wi, "Oyo anapaalla wiitukhulla, iitikhulleke ni nnddo ddeeriwe ni Apwiya.