¹ Sampailah buhannya di sabarang danau, di daerah urang-urang Gadara. ² Pas Yesus turun dari jukung, langsung saurang dari kuburan nang dirasuki roh najis mandatangi Yesus. ³ Inya badiam di kuburan-kuburan. kadada urang nang sanggup manjaratnya, bahkan lawan rantai. ⁴ Sabab, inya rancak dijarat wan dibalanggu batisnya awan rantai, tatapi inya mamagati rantainya wan mamatahakan balanggunya. Kadada saurang pun nang kawa manundukkannya. ⁵ Siang malam inya bakuciak di kuburan wan di bukit-bukit wan malukai diri inya saurang lawan batu. ⁶ Katika urang nitu malihat Yesus dari kajauhan, inya bukah wan basujud dihadapan Yesus. ⁷ Lalu, sambil bakuciak nyaring inya baucap, "Apa urusan ulun lawan Pian, Yesus, Anak Allah Yang Mahatinggi? Ulun mohon ka Pian demi Allah jangan manyiksa ulun!" ⁸ Sabab, Yesus sudah baucap ka inya, "Kaluarlah dari urang ini, hai roh najis!" ⁹ Lalu, Yesus batakun ka urang nitu, "Siapa ngaran ikam?" Inya manjawab, "Ngaran ulun Legion' sabab kami banyak." ¹⁰ Inya baulang-ulang mamohon ka Yesus supaya kada mangusir buhannya dari daerah nitu. ¹¹ Di sana ada sakumpulan babi haratan makan parak bukit. ¹² Lalu, roh jahat nitu mamohon ka Yesus, awan baucap, "Suruhlah bubuhan kami masuk ka babi-babi nitu sahingga kami kawa masuk ka dalam babi-babi." ¹³ Yesus mangabulakannya. karana nitu, roh-roh najis kaluar wan marasuki babi-babi. Sakumpulan babi nang jumlahnya kurang labih dua ribu nitu bukah tajun ka jurang sampai sampai ka danau, lalu tanggalam di dalam danau. ¹⁴ Imbah nitu, panjaga-panjaga babi bukahan wan mambaritahukannya ka kota wan ka kampung. Urang-urang kaluar malihat apa nang tajadi. ¹⁵ Lalu, urang-urang datang ka Yesus wan malihat urang nang tadi karasukan roh jahat, nang baisi legion, haratan duduk, sudah babaju, inya sudah waras. Buhannya manjadi takut. ¹⁶ Lalu, buhan nang malihat kajadian nitu, mangisahi ka urang-urang kayaapa kajadian nang tajadi lawan urang nang karasukan roh jahat wan tantang babi-babi nitu. ¹⁷ Sabab itu, urang-urang maminta Yesus maninggalakan daerah buhannya. ¹⁸ Imbah nitu, parahatan Yesus naik ke jukung, urang nang tadinya karasukan roh jahat nitu mamohon supaya inya kawa umpat lawan Yesus. ¹⁹ Namun, Yesus kada mangijinakannya, tapi baucap ka inya, "Buliklah ka dingsanak ikam. Kisahi ka buhannya sabarataan nang sudah Tuhan lakuakan ka ikam bahwa Tuhan mangasihihi ikam." ²⁰ Lalu, urang nitu tulak wan mulai mangisahi ka urang-urang di Dekapolis sabarataan hal nang sudah Yesus lakuakan ka inya. Maka sabarataan urang manjadi heran. Anak Yairus Dibangkitakan wan Binian nang Pandarahan Disambuhakan ²¹ Waktu Yesus manyabarang pulang pakai jukung ka sabarang, urang banyak bakumpul parak Sidin wan Sidin ada di pinggir danau. ²² Lalu, saurang pamimpin sinagoge ngarannya Yairus datang wan imbah malihat Yesus, inya basujud di kaki Sidin. ²³ Inya sunguh-sungguh mamohon ka Yesus, ujarnya, "Anak binian ulun nang halus handak mati. Datangi wan andaki tangan Pian kaatas inya supaya inya kawa disambuhakan wan hidup." ²⁴ Lalu Yesus tulak baimbai Yairus. Banyak urang nang maumpati Yesus wan mangarumuni Sidin. ²⁵ ada saurang binian nang pandarahan salawas dua balas tahun. ²⁶ Inya sudah rancak mandarita oleh banyak tabib, wan sudah mahabisakan sabarataan hartanya, tapi kadada hasilnya malah kaadaannya tambah parah. ²⁷ Pas mandangar tantang Yesus, binian nitu mandatangi Yesus dari balakang di tangah-tangah kumpulan urang inya manjapai jubah Sidin. ²⁸ Binian nitu baucap, kalau ulun kawa manjapai jubah Sidin haja, ulun cagar sambuh." ²⁹ Saat itu jua pandarahannya ampih wan inya marasakan awaknya sambuh dari panyakitnya. ³⁰ Yesus langsung tahu saurang bahwa ada kuasa nang kaluar dari Sidin. Sidin babalik ka arah karumunan urang banyak wan baucap: "Siapa nang manjapai jubah-Ku?" ³¹ Lalu murid-murid Yesus baucap ka Sidin, "Pian malihat karumunan urang badasak-dasak wan Pian baucap, 'Siapa nang manjapai-Ku?'" ³² Lalu, Yesus mancangangi sakaliling gasan malihat siapa palakunya. ³³ Namun, pas tahu apa nang sudah tajadi padanya, binian nitu takutan wan manggeter. Inya datang wan basujud di hadapan Yesus lalu mambaritahu Yesus sabarataan kajadiannya. ³⁴ Imbah nitu, Yesus baucap ka binian nitu, "Anak-Ku, iman pian sudah manyalamatakan ikam. Buliklah dalam damai sajahtra wan sambuhlan dari panyakitmu." ³⁵ Parahatan Yesus masih bapander, datanglah babarapa urang dari rumah pamimpin sinagoge yang baucap, "Anak ikam sudah maninggal. Mangapa masih mahauri Guru?" ³⁶ Akan tatapi, Yesus kada mau mandangar apa nang sudah dipanderakan, Sidin baucap ka pamimpin sinagoge itu, "Kada boleh takut, parcaya haja." ³⁷ Lalu, Yesus kada mangizinakan saikung urang pun maumpati Sidin, kacuali Petrus, Yakobus, wan Yohanes, dingsanak Yakobus. ³⁸ Lalu, buhannya sampai di rumah kapala sinagoge nitu, Sidin malihat kaributan, wan urang-urang manangis maratap awan suara nyaring. ³⁹ Pas Yesus masuk, Sidin baucap ka buhannya, "mangapa buhan ikam ribut wan manangis? Anak nitu kada mati, tatapi guring." ⁴⁰ Buhannya mananawai Yesus. Namun, Sidin manyuruh buhannya kaluar lalu Sidin mambawai abah wan uma anak nitu, wan urang-urang nang basama Sidin, lalu masuk ka ruangan wadah anak nitu barada. ⁴¹ Imbah nitu, dipingkuti Sidin tangan kakanakan tu wan Sidin baucap ka inya, (Artinya, "Kakanakan halus binian, Aku baucap ka ikam, bangunlah!") ⁴² Kakanakan binian nitu hancap badiri wan mulai bajalan-jalan, sabab umur inya dua balas tahun, langsung sabarataan urang sangat takjub. ⁴³ Lalu, Yesus ba pasan nang karas ka kuitan nitu supaya kadada saikung urang pun nang tahu hal ini, wan mangatakan ka buhannya supaya anak nitu dibari makan.